【愛情】如地下情一樣嘅癮，係我對你嘅定義: 78. 朋友
「陸修然，你癲咗係唔係？」黎昕淇怕陸修然真係做得出，連忙上前擋喺佢面前，「唔準去！」
「你睇下你驚到。」陸修然望住黎昕淇雙眸中閃過嘅一絲慌亂不禁一笑，「去咗嘅話佢會懷疑我點解要話你唔喺度，陣間發生咗你唔想發生嘅事就唔好啦。」
「嘖⋯」黎昕淇瞪咗陸修然一眼，下一秒表情逐漸柔和落嚟：「會長平時唔係連邊個係支援人員都唔知？做咩連佢係樂時嗰班嘅都記得？」
「因為上次佢嚟同你自我介紹，嘈住我瞓覺，所以認得佢。」陸修然嘅嘴角帶住一絲唔明顯嘅笑意，呢個只不過係其中一個理由
「真係小氣鬼。」黎昕淇開玩笑道，「小小事都咁記仇。」
「幾啦。」陸修然毫不避諱直接點頭
下一瞬間，陸修然就伸手捧起黎昕淇嘅臉頰，另一隻手放喺黎昕淇嘅後腰將佢拉近自己，耷低頭喺黎昕淇嘅頸上輕吻一下
酥麻嘅感覺由頸往四周擴散，黎昕淇下意識就提起手拉住陸修然嘅衫袖，另一隻手抵喺佢嘅膊頭上，熾熱嘅鼻息令佢耳根發紅
喺陸修然鬆開手後，黎昕淇第一時間拎出手機，利用手機嘅螢幕照向自己嘅頸，陸修然望住黎昕淇嘅行為反應，大概都估到黎昕淇睇緊啲咩
「唔洗望啦，冇呀。」陸修然將黎昕淇放喺頸上嘅手移開，「冇留啲咩喺度。」
黎昕淇嘅眼神裏係滿滿嘅不信任，手不自覺提起，指尖喺陸修然啱啱錫過嘅位置掃過，輕哼一聲後將報名表放喺櫃上面
陸修然拉開櫈坐低，托住頭望住黎昕淇嘅背影
「好彩最後忍住咗，如果唔係⋯又要嬲啦⋯」陸修然喺心裏悄然一笑
本來佢真係有打算留一個記號，不過諗到黎昕淇會嬲之後就放棄咗呢個念頭，畢竟佢唔想又迎嚟一次冷戰
⋯
鄭洛苡行入車廂，坐喺貼近玻璃嘅位置，喺車廂響起提示聲嘅時候，黎昕淇啱啱好趕得切上車
「有位坐～」黎昕淇見到有空位，坐低喺同鄭洛苡相隔兩個座位嘅位置
兩人對望一眼，微微點頭，雖然之前因為江清懿相約而一齊出去玩過一次，不過實際上兩人並唔熟
「媽咪今晚要番嚟啦～陣間買啲嘢食都好～」黎昕淇諗到今晚爸媽要番嚟就覺得開心，佢嘅外賣日子終於到盡頭
黎昕淇將書包放喺大脾上，手上拎住手機，完全冇留意到鄭洛苡一直默默糾結緊
「要唔要同佢打招呼⋯？」鄭洛苡猶疑不決，佢對黎昕淇有啲興趣，但又唔敢靠近佢，「得佢一個唔係好機會？早知上次出去玩就問佢拎IG啦⋯！」
鄭洛苡覺得黎昕淇好吸引，嗰種吸引係單純覺得外表性格都好好，嗰份帶住少許高冷嘅氣場令佢有啲興趣，想同佢做朋友
「佢應該未有咁快落車⋯」鄭洛苡抬頭望向對面車門上方嘅站牌
「今晚要唔要食好啲？媽咪佢地今晚番嚟」黎昕淇拎住手機send message問陸修然
「有咩關係？」陸修然不解咁望住訊息嘅內容，佢唔明白兩者有咩關係
「外賣嘅日子要結束，食餐好嘅慶祝下」「好，睇你想食咩」
陸修然雖然唔明白有咩要慶祝，不過既然黎昕淇想嘅話，咁就慶祝啦
「嗨⋯！」鄭洛苡鼓起勇氣起身坐到黎昕淇隔離
「嗨⋯」黎昕淇嚇咗一下，望向鄭洛苡嘅同時下意識將手機鎖屏
「你今日自己一個走嘅？平時見你都係同楚妍一齊⋯」鄭洛苡嘅心緊張咁噗噗跳
「楚妍今日有嘢做，所以冇搭地鐵。」黎昕淇回答
因為唔熟嘅關係大家一安靜落嚟就顯得有啲尷尬，鄭洛苡打從心底想同黎昕淇做朋友，但唔知點樣開口先好
「下次，再約出去一齊玩，上次江清懿約大家出嚟⋯」鄭洛苡先打破沉默開口道
「好呀。」黎昕淇爽快咁答應，微微一笑道，「佢同個個都熟，約出嚟玩都方便啲。」
「上次佢突然問我去唔去，我仲有啲擔心同大家唔熟會尷尬⋯」鄭洛苡尷尬一笑，手一直將拎喺手中嘅手機捏嚟捏去，「好彩周晟祐同副會長都有去，又唔係真係咁尷尬⋯」
「楚妍都話佢連副會長都捉到出嚟好厲害。」黎昕淇笑道
「我可唔可以拎你IG呀？上次出嚟玩冇問到你⋯」鄭洛苡喺內心糾結咗一輪後鼓起勇氣問道
「可以呀。」黎昕淇直接打開自己嘅IG code比鄭洛苡
鄭洛苡高興咁即刻follow咗佢，見到黎昕淇嘅request嘅時候心入面一陣興奮，好想搵人同佢一齊分享佢嘅快樂
「你隻手錶同會長戴開嗰隻好似。」鄭洛苡咁啱留意到戴喺黎昕淇手腕上嘅手錶
「哦⋯係呀，同款，不過只係咁啱。」黎昕淇心臟一縮，以為全日都唔會有人發現，最後都係有人留意到
「比師妹見到嘅話應該會話係情侶裝～」鄭洛苡笑道，「佢地太留意會長。」
「喺佢同副會長隔離好大壓力。」黎昕淇無奈道，「行到邊都會受大家矚目。」
「冇辦法呀～受大家愛戴都係一件好事嚟。」鄭洛苡笑道
鄭洛苡有時都會聽到其他人講起學生會嘅會長同文書，「合襯」同「羨慕」係對話中出現頻率高，佢都有偷偷地關注呢啲緋聞趣事
喺鄭洛苡到站落車後嘅第一件事，係將拎到黎昕淇嘅IG呢件開心事同鍾安而加自己嘅一個班上朋友講
已經番到屋企附近嘅鍾安而睇到鄭洛苡嘅message，佢唔太知道應該比咩反應，不過佢心入面都係開心，畢竟鄭洛苡同佢分享佢嘅開心事
黎昕淇番屋企一轉，沖咗個涼先再去樓上搵陸修然，做晒功課嘅佢兩手空空咁上去陸修然嘅屋企
「你沖咗涼呀？」黎昕淇望住陸修然未乾透嘅頭髮問道
「嗯。」陸修然跟喺黎昕淇身後行入房，順手將門閂上
「今日好涼，外面好大風。」黎昕淇上前雙手捉住陸修然嘅前臂，「你好暖。」
「你隻手做咩咁凍？」陸修然嘅手搭喺黎昕淇啲手背上，手心傳嚟涼意
「沖完涼一陣啦嘛，今日係有啲涼。」黎昕淇都習慣咗自己容易手腳冰冷，風大啲吹一吹都會覺得手凍
IG Link: https://www.instagram.com/nd_cotttoncandy/?hl=zh-tw