【愛情】如地下情一樣嘅癮，係我對你嘅定義: 77. 待着
「手好攰⋯」黎昕淇感覺自己梳極都梳唔好，雙手垂低後拎走陸修然手中嘅髮圈行去廁所
陸修然起身跟喺黎昕淇身後，靠住喺廁所門嘅門框望住黎昕淇梳頭髮；黎昕淇感覺自己雙手酸軟到好似唔屬於佢一樣，連拎住梳梳頭都覺得手冇力
「你仲湊熱鬧。」黎昕淇從鏡中望向陸修然，望住陸修然一副悠悠閒嘅模樣就忍唔住抱怨起嚟
陸修然行到黎昕淇身後，將梳從黎昕淇手中拎走，將頭髮簡單捉起成一條馬尾，再用梳將頭髮梳順後綁好髮圈
「唔識梳你平時個髮型。」陸修然將梳放番原位，探頭望黎昕淇一眼
「都Okay啦，合格。」黎昕淇輕哼一聲，心入面其實一早已經喜滋滋咁笑，提手整理一下額旁嘅碎髮
⋯
「黎昕今日梳馬尾嘅？」宋楚妍喺轉堂嘅空檔send咗個message問道
「今朝遲咗起身，懶得梳平時嗰個髮型。」黎昕淇回覆道
「宜家好少見你梳馬尾」宋楚妍回頭望咗黎昕淇一眼，因為少見所以覺得新奇
「遲起身怕遲到咪會梳」黎昕淇回覆道
「晏晝食咩好？」「照舊？問下江清懿先」
「佢仲未瞓醒，上一堂瞓到下一堂都未醒」「陣間阿sir嚟到佢會醒啦」
3秒後阿sir就喺門口行入嚟，黎昕淇望住所有人都拎嘢出嚟上堂，除咗仲未坐起身嘅江清懿，於是拎起筆戳咗江清懿嘅手臂一下
「醒啦江清懿。」黎昕淇喺江清懿緩緩坐起身嘅時候講道
「嗯⋯」江清懿皺起眉頭垂頭，一時間未適應到課室裏嘅燈光
黎昕淇掀開早前派番嚟嘅工作紙，江清懿嘅動作慢半拍，大腦仲思考緊要拎咩出嚟上堂先啱
「工作紙⋯」江清懿望向黎昕淇嘅枱面，慢動作咁彎腰望入櫃桶，「唉⋯眼瞓⋯」
另一邊廂，隔離上緊連堂嘅鍾安而一直微微點頭恰緊眼瞓
「居然恰眼瞓⋯？」鄭洛苡訝異咁望向鍾安而，又望一眼黑板，「好少見⋯」
鍾安而向前墜咗一下，頓時清醒過嚟，挺直腰坐好後拎起水樽飲啖水清醒一下
「你恰眼瞓。」鄭洛苡細聲道
「好攰⋯」鍾安而淺笑一下，將眼鏡托起後捏捏鼻樑，「好想瞓⋯」
「陣間小息恰一陣？」鄭洛苡提議道
「嗯⋯」鍾安而深呼吸，吸一啖新鮮空氣後稍微精神咗少少
小息嘅鐘聲響起，鍾安而嘅內心鬆一口氣：「終於放小息⋯」
鍾安而將自己嘅冷衫摺好放喺枱上，雙手攬住冷衫當枕頭咁靠住瞓
「上堂嘅時候明明好眼瞓，宜家完全瞓唔著⋯」鍾安而調整角度，但點瞓都好都係瞓唔著，佢坐好起身默默垂低頭
「唔係要瞓一陣？」鄭洛苡嘅餘光留意到鍾安而又坐起身，轉頭望向佢
「落咗堂就瞓唔著⋯」鍾安而無奈苦笑道
「做咩今日咁攰？」鄭洛苡向住鍾安而嘅方向坐，帶住微笑問道，「唔夠瞓。」
「嗯⋯鍾樂時琴晚半夜突然尖叫話有好大隻蟲，嘈醒晒我地所有人⋯」鍾安而無奈搖頭
「你洗唔洗飲咖啡呀？我可以幫副會長你買㗎～」鄭洛苡笑道，但都夾雜咗真心
「唔洗啦⋯唔麻煩你特登行一轉，我伏低恰下可以啦⋯」鍾安而微笑道，然後將眼鏡除落嚟放喺枱上，再次攬住冷衫伏低喺枱上補眠
「唔麻煩⋯點會麻煩呢⋯？」鄭洛苡將呢句回答放喺心入面
佢知道鍾安而唔會想麻煩人地幫佢，但如果鍾安而開口請佢幫呢個忙，鄭洛苡都係好願意幫佢
鄭洛苡側住頭伏低喺枱上，偶爾悄悄望向鍾安而，自從成為鄰座同學之後，視線總會不自覺咁落喺鍾安而嗰邊
「瞓一陣⋯」鄭洛苡耷低頭，雙臂間嘅範圍稍稍收窄
⋯
「你交去會室啦，會長好似好常會喺會室。」正準備行出課室嘅女同學對眼前嘅男同學講道
「哦，咁我交過去㗎啦～」男同學若有所思，然後笑一笑，「你地都填晒啦係咪？」
「填晒啦～該填嘅人都填晒啦～」女同學將紙從男同學嘅手中拎走望一眼，「交啦～」
男同學拎住報名紙上一層，行上樓梯嘅時候諗緊陣間開門嘅人會係邊個，會係會長，定其他人？
「會唔會係師姐⋯？」男同學喺心中帶住少許嘅期待，佢指嘅師姐，除咗黎昕淇都冇第二個
佢行到會室門口，喺木門上敲咗兩下，企咗兩後會室嘅門打開，突然打開咗門令佢一頓
「係？」行嚟開門嘅陸修然望住眼前嘅男同學，望到佢手上拎住嘅紙就知道佢嚟嘅目的
「會長。」男同學禮貌咁點一點頭，「我地班嘅報名表填好啦，遲咗交過嚟唔好意思，師姐喺唔喺度？上次話要交過嚟比師姐就可以。」
「你話黎昕？佢唔喺度。」陸修然露出淡淡嘅笑容，行出一步用鞋踭頂喺門前，左手放喺門後將門拉住，「報名表交比我可以啦，你係樂時嗰班？」
「哦，係呀！不過鍾樂時唔喺課室，所以我親自交過嚟。」男同學點頭笑道
「唔該，我會轉交比黎昕。」陸修然道
「唔該會長。」男同學微微點一下頭，心入面有少許嘅失望，因為冇見到佢想見到嘅人，佢嘅微表情都比陸修然睇喺眼內
陸修然後退到會室嘅範圍，等會室嘅門自動閂上後，將報名表遞比企喺門後嘅黎昕淇
「上次嚟自我介紹嘅師弟嚟搵你交報名表。」陸修然收起剛才嘅淡笑，將表格遞到黎昕淇嘅面前
「唔該喎會長。」黎昕淇一手就將報名表從陸修然手上拎走，推開陸修然一直擋喺佢腰前將佢輕攬住嘅手
黎昕淇一直企喺門後，陸修然左手一直都輕攬住黎昕淇嘅腰，捉住門柄嘅人一直都係黎昕淇
「會長你幾時學識講大話唔眨眼？」黎昕淇行到枱前，拎起收集番嚟嘅各班報名表，跟番年級班別順好疊齊
「話佢知你喺度比較好？」陸修然行到黎昕淇身旁轉身靠坐喺枱邊
「會長你中意啦。」黎昕淇拎起萬字夾將報名表夾好，方便下次Miss Chung過嚟嘅時候交比佢
「好啦，咁我去同佢講聲其實你喺會室啦。」陸修然企起身走向會室門口，黎昕淇一臉難以置信咁望陸修然，「不過，要點解釋好？」
IG Link: https://www.instagram.com/nd_cotttoncandy/?hl=zh-tw