【愛情】如地下情一樣嘅癮，係我對你嘅定義: 68. 觀察
「黎昕？」陸修然困惑咁叫咗黎昕淇一聲，正當陸修然向前彎腰，伸出手想拍一拍黎昕淇嘅時候，黎昕淇嘅反應迅速到陸修然都嚇咗一跳
黎昕淇一下子企起身，右腳提起跪喺陸修然嘅雙腿之間，左手㩒喺床上支撐住佢成個人，右手㩒喺陸修然嘅膊頭上面，二話不說就錫喺陸修然嘅唇上
喺呢個時候「獻吻」，係唔係有啲突然⋯？突然嘅吻，陸修然完全冇時間反應，大腦都未諗到發生咩事，黎昕淇已經湊上嚟
黎昕淇坐喺床邊、喺陸修然嘅雙腿之間跪坐喺右腳上，陸修然伸出右手攬住黎昕淇嘅腰
突如其來嘅吻卻同平時一樣熾熱，陸修然嘅喉核一動，唾液腺嘅分泌有啲太多，黎昕淇身上嘅氣味就喺佢鼻尖前，一呼一吸間所吸到嘅氧氣中都夾雜住黎昕淇身上獨有嘅味道，呢種味道令人有啲⋯著迷⋯
黎昕淇輕皺起眉頭，舌尖同唇上傳嚟嘅觸感令佢嘅癮完全冇辦法壓抑落去，佢習慣嘅係咩？係人、癮、定係氣味？呢種觸感令人好上癮，只要輕碰一下都會勾起心底想要壓抑嘅癮⋯
「原來⋯你係為咗解藥而嚟⋯？」陸修然微喘着，抬頭撞上黎昕淇帶點迷離嘅雙眸
「我慣咗放學之後⋯」黎昕淇低聲講道，佢冇辦法做到好似陸修然一樣平靜咁講呢啲說話
「嗯？」陸修然故意扮唔知道黎昕淇嘅意思，「唔明。」
「你特登係唔係⋯！」黎昕淇用力喺陸修然嘅膊頭上拍一下
「所以你⋯」陸修然想引黎昕淇開口講
「冇呀⋯！你諗多咗啦⋯！」黎昕淇輕哼一聲，明明係佢先主動錫陸修然
兩人定睛凝視住對方嘅雙眸，眼底好似有一層無法講出口嘅情愫，黎昕淇先移開視線垂眸
「好奸茅⋯」黎昕淇忽然細聲咁講咗三個字
「點解？」陸修然今次有聽到黎昕淇低聲講嘅說話但唔明白
「我好似背住大家，對大家仰慕嘅會長做咗唔應該做嘅事⋯」黎昕淇將額靠喺陸修然嘅膊頭上
「放學之後，我就唔係大家嘅會長。」陸修然輕攬住黎昕淇
黎昕淇坐好抬頭望住陸修然，眼前嘅人總會令佢不知所措，但佢一直都係毫無波瀾一樣嘅平靜，只有黎昕淇自己會覺得緊張一樣
「阿然⋯」黎昕淇雙手捧起陸修然嘅臉頰，先低頭喺佢嘅唇上輕碰一下，就算係輕碰一下都會觸動身上每一條神經線，壓抑咗嘅癮都會一湧而出
陸修然雙手將黎昕淇輕鬆抱起坐喺佢嘅大髀上，黎昕淇早已因為坐喺右腳上而覺得麻痺，陸修然嘅手托喺黎昕淇嘅後腰令佢唔會向後跌落
黎昕淇無暇思考佢同陸修然之間嘅關係奇唔奇怪，就算奇怪到難以言語都好，又有咩所謂⋯？
⋯
「會長，Miss Chung啱啱搵你。」黎昕淇行上前將陸修然叫住，「佢叫你陣間第二個小息去搵佢。」
小息時間嘅小食部人來人往，兩人企喺一旁嘅空位顯得有啲顯眼，特別係呢個空位喺講台嘅樓梯前
「好，唔該。」陸修然禮貌咁微微點頭，「佢淨係叫我搵佢？有冇話幾時過嚟聽下個活動嘅大綱？」
「冇，佢淨係叫你陣間去搵佢，可能有嘢比你、要同你講咗先。」黎昕淇聳肩道
「好，我陣間去。」陸修然道
「你睇下呢個身高差⋯唔係一樣咩？」梳住髮髻嘅女仔嘅目光落喺離佢半個小食部遠嘅兩人，「我都係覺得我地冇認錯人。」
「但師姐話唔係佢⋯」梳住高馬尾嘅女仔側向髮髻女細聲道，「憑身高差認嘅話好似唔太準確。」
「但好難有實際嘅證據證明，又冇睇到樣。」另一個女仔道，「真係口講無憑。」
「如果真係拍緊拖，一定有破綻嘅⋯」高馬尾女輕嘆一口氣，「哎呀～好想知呀～」
「可能會喺卸任之後公開呢～」髮髻女豎起手指公講道，「仲有機會！」
「比你地咁樣講，搞到我都想知呀⋯！」另一個女仔托住頭，望向遠處嘅兩人，「我覺得就算佢地係一齊都唔出奇，只係宜家唔係公開嘅適合時機。」
「我番上去先啦。」黎昕淇講道，下一秒忽然回頭望咗一眼
「做咩？」陸修然抬眼朝黎昕淇身後望
「忽然有啲唔自在⋯」黎昕淇收回視線後輕皺一皺眉頭低聲講道
「咁你番上去先啦。」陸修然微微點頭
黎昕淇向小食部門口行去，啱啱剎那間嘅感覺令佢有啲唔自在，不過宜家呢種感覺又消失咗
陸修然買咗盒朱古力奶就番上課室，莫淮禮仍然坐喺位睇緊手機
「你咁耐嘅？」莫淮禮抬頭望咗一眼又耷低頭睇手機，「好多人？」
「還好。」陸修然講道
「你唔係唔中意食甜嘢？朱古力奶唔甜？」莫淮禮轉身望到陸修然枱上嘅朱古力奶，問出佢心中一直都有嘅疑問
「還好，都唔係太甜。」陸修然拎起飲咗一啖後道
「唔太甜？你味蕾係咪有事？」莫淮禮嘅質疑放到臉上，「之前飲過好甜。」
「我覺得可以接受，飲完可以飲水沖。」陸修然飲咗一大啖
陸修然坐喺位，枱上已經放咗下一堂嘅書，準備好陣間上堂
⋯
一日放學後嘅會室
「Miss Chung話再改一改，呢度咁樣好唔好？」
「定係呢度再轉少少會好啲？」
「問下問下。」
「黎昕！」鍾樂時同張詩楠行到黎昕淇身旁，拎住手上嘅草稿紙遞比黎昕淇，「你覺得咁樣改好唔好？」
「唔⋯」黎昕淇放低啱啱買番嚟嘅嘢飲喺枱上，然後接過草稿紙
黎昕淇認真睇清楚之後思考一陣，然後比少許嘅建議，鍾樂時同張詩楠認真咁聽住黎昕淇嘅建議
「會長會長⋯！」鍾樂時喺呢個時候見到喺外面番嚟嘅陸修然，即刻將佢叫住然後問佢嘅想法
鍾樂時將張詩楠拉開少少，留番少少位置比陸修然，陸修然自然行到黎昕淇同張詩楠中間嘅空位
「會長你覺得邊個改法喺執行上會易啲？」張詩楠將草稿遞比陸修然睇，「黎昕嘅建議係好似左邊寫嘅呢個咁樣。」
陸修然接過草稿認真思考，張詩楠喺一邊解釋，陸修然側着頭專心咁聽住張詩楠嘅見解，微微點着頭示意明白
IG Link: https://www.instagram.com/nd_cotttoncandy/?hl=zh-tw