【愛情】如地下情一樣嘅癮，係我對你嘅定義: 67. 直接

鄭洛苡微微側住頭定睛望住鍾安而抹眼鏡，鍾安而將鏡片抹好後戴番眼鏡，餘光留意到鄭洛苡嘅視線

「做咩？」今次到鍾安而問鄭洛苡

「冇咩。」鄭洛苡露出佢平日嘅甜美笑容道

「咳咳⋯！」坐喺對面嘅周晟祐已經忍唔住，直接明顯且故意咁咳咗兩聲，「我洗唔洗走先⋯？我好似好阻埞⋯」

「唔洗。」鍾安而拎起放喺枱上嘅樽裝水，周晟祐嘅一句令兩人有啲尷尬





鍾安而喺枱底踢咗周晟祐一下，示意佢唔好亂講嘢，周晟祐嘅腳縮咗一下

鄭洛苡望向鍾安而，鍾安而托好眼鏡，周晟祐喺對面望住一切嘅發生，呢個望住鍾安而嘅眼神完全唔係朋友咁簡單

鍾安而察覺到鄭洛苡嘅視線，佢自然就望向鄭洛苡，視線一對上，嘴角就忍唔住自動上揚起嚟

周晟祐都冇眼睇，自己咁大光識發光嘅物體坐喺度顯得好礙眼，但對面兩個人掛住講嘢都冇心理佢太多

每一句說話聽起嚟好似同平時講嘅嘢冇咩分別，但認真聽就會發現語氣完全唔一樣，說話講起嚟都係小心翼翼，就好似怕會一唔小心中斷咗話題一樣





「唉，我想走⋯」周晟祐嘅內心無奈咁嘆氣

⋯

「你份堂課係咪做完？」黎昕淇朝江清懿問道，然後擰轉頭望一眼自己嘅堂課簿，「17b你點計？」

「咪用番同一條式計。」江清懿掀起前一頁尋找17b嘅身影後道，「你係咪中間戳錯機？」

「可能係。」黎昕淇耷低頭重計一次





「你放學之後番屋企？」宋楚妍擰轉頭細聲問道

「應該係，做咩？你想去食嘢？」黎昕淇上身向前傾細聲問道

「都好，去食個下午茶再番屋企～」宋楚妍笑一笑

「好呀。」黎昕淇微微點頭，向後靠住櫈背，將手機從裙袋拎出嚟放到櫃桶，將螢幕較到最暗，然後send咗個message比角修然：「今日放學同楚妍食嘢」

黎昕淇下意識就同陸修然報備一樣通知佢一聲，佢地嘅關係本來就唔需要做到呢個地步，但或者因為放學習慣咗會一齊，所以情理上通知佢一聲

陸修然：「好」

黎昕淇見到陸修然嘅回覆後就將手機收番入裙袋，諗到今日放學同宋楚妍去食嘢，忽然有種唔自然嘅感覺喺心頭

放學之後黎昕淇同宋楚妍搭車去食下午茶，宋楚妍拎起啱啱送到放低喺枱上嘅凍奶茶飲咗一啖





「你最近都冇睇小說嘅？」黎昕淇問道

「睇完啦～」宋楚妍抬起頭，將視線由手機嘅螢幕上移開，「唔知佢會唔會出第三季。」

「仲有得出？故事咁長？」黎昕淇笑一笑，指尖戳喺杯身上，攔住滑落嘅水珠嘅去路

「佢每次都係唔同主線嘛～」宋楚妍托住下巴，望向窗外嘅行人，「好期待下一條主線呀～」

「你最中意邊條線？」黎昕淇純粹好奇咁問一下

「唔⋯好難揀！」宋楚妍思考咗一陣之後苦惱道，「青梅竹馬啦⋯！青梅竹馬真係好正！」

「點解？」 黎昕淇問道





「我中意呢種養成類～」宋楚妍笑言

「養成類⋯？聽起嚟好奇怪⋯」黎昕淇輕皺起眉頭，顯然地覺得「養成」呢兩個字將成件事變得好奇怪

「講笑講笑！我中意嗰種習慣對方存在，然後後知後覺嘅關係啦～」宋楚妍望住黎昕淇嘅嫌棄臉，「我覺得咁樣嘅關係好有⋯情調，就係因為習慣咗對方嘅存在，所以喺對方唔喺度嘅時候先會發現唔習慣。」

黎昕淇聽完宋楚妍嘅說話後若有所思咁拎起飲管放到嘴邊

「習慣⋯」黎昕淇喺心裏默念宋楚妍一番說話中嘅重點

食完下午茶之後，兩人一齊搭車番屋企，畢竟上咗一日堂都有啲攰；黎昕淇將手機握喺手中，望住螢幕思前想後，喺宋楚妍掛住耷低頭睇手機嘅時候send咗個message比陸修然

「你喺唔喺屋企？」

陸修然拎起電腦旁嘅手機，望住呢個奇怪嘅message，喺鍵盤上打字：「喺，點解會唔喺屋企？」





「打唔打機？」「你唔係同friend一齊食嘢？」

「食完嘢搭緊車番嚟」「都得，你直接上嚟？」

「好」黎昕淇回覆道，嘴角上揚一個微小嘅弧度

黎昕淇嘅心情忽然間有啲愉悅，唔係同宋楚妍一齊食嘢唔開心，而係呢一刻嘅愉悅感比起剛才嘅愉悅感更明顯，感覺就好似本來已經係情天，但薄薄嘅雲散開後陽光直接照到地上

宋楚妍留意到黎昕淇嘅微表情，心入面有啲好奇令黎昕淇忽然開心嘅原因，但感覺問出口之後，黎昕淇唔會講

黎昕淇落車之後加快步伐番屋企，然後直接去到陸修然住嘅嗰一層後行到門前㩒鐘；屋內傳嚟腳步聲，門「咔」一聲打開，陸修然企喺門前

「做咩突然想打機？」黎昕淇行到陸修然嘅睡房時，陸修然問道





「冇咩，就係突然想打機，諗起未過關。」黎昕淇將書包放喺門邊，行到放喺床尾嘅矮櫃前蹲低，熟手咁開遊戲機，「唔係可以係咩原因。」

「仲以為你係因為唔習慣放學唔係同我一齊，所以特登上嚟。」陸修然坐低喺床上，上身微微向後仰，雙手撐住喺床上

「唔係⋯你諗多咗。」黎昕淇下意識一樣迅速否認，將佢要玩嘅遊戲放到遊戲機嘅卡糟中，「講到好似你好習慣咁。」

「我？我唔習慣呀。」陸修然對於黎昕淇嘅反問有啲意外，但仍然可以臉不紅心不跳嘅回答，「我慣咗放學之後同你一齊。」

陸修然嘅說話直白到黎昕淇無言以對同時內心又有啲手足無措，黎昕淇拎手掣嘅手都一頓，諗起嘅係宋楚妍同佢講嘅說話，習慣⋯

「你點解可以講得咁直接⋯」黎昕淇細聲咁問咗一句

「你講咩？」陸修然聽到黎昕淇講咗啲嘢，但聽唔清楚內容

黎昕淇蹲喺原地合埋眼，聽完宋楚妍嘅說話之後令佢嘅大腦混亂一片，佢冇辦法好好咁整理內容令自己冷靜落嚟




IG Link: https://www.instagram.com/nd_cotttoncandy/?hl=zh-tw