【愛情】如地下情一樣嘅癮，係我對你嘅定義: 49. 午飯

翌日朝早鬧鐘響嘅時候，陸修然覺得自己完全唔夠瞓，想直接閂咗鬧鐘繼續瞓

「嘖⋯」陸修然起身嘅時候床氣比平時明顯好多，散發住一個生人勿近嘅氣場

將白裇衫著上身嘅時候，裇衫上仍然殘留住少許唔屬於佢本人嘅香味；本來深鎖嘅眉頭有少少紓緩嘅跡象

陸修然將校呔繫好，用衫領蓋住；將裇衫拉直、扣好皮帶；拎起放喺衣櫃前嘅書包，行出去玄關著上皮鞋

今日就算眼瞓，仍然喺同平時同一時間踏出屋企嘅大門





𨋢落咗兩層，門打開嘅時候，企喺𨋢外嘅黎昕淇一眼就見到企喺最前嘅陸修然，𨋢內啱啱好仲有一個位，黎昕淇行入𨋢企喺陸修然身旁

「早晨⋯」黎昕淇望住𨋢門嘅鏡面對陸修然道，一企喺佢隔離就感受到陸修然嘅低氣壓

「早晨。」陸修然連回答嘅語氣都比平時冷淡

「你唔夠瞓⋯？」黎昕淇小心翼翼咁細聲問

「嗯。」陸修然嘅說話唔多，因為眼瞓而躁底到口都唔想打開講嘢





睇起嚟黎昕淇睡眠充足，朝早都好精神，同陸修然正好相反

喺差唔多要行到地鐵站嘅時候，黎昕淇抬頭望咗陸修然一眼

「我行先㗎啦⋯」黎昕淇眼見陸修然嘅低氣壓，佢講嘢嘅時候下意識都變得小心翼翼

「你咪行。」陸修然頷首，佢冇預黎昕淇會同佢一齊行到地鐵站先分開，平日都唔會

「哦。」黎昕淇心入面有啲意外，陸修然好少會低氣壓到呢個地步，不過既然陸修然叫佢行，咁黎昕淇就同平日一樣加快腳步





黎昕淇有啲莫名嘅擔心，兩步一回頭望向陸修然；行喺後面嘅陸修然對黎昕淇嘅舉動有啲困惑，佢係怕佢會盪失路定係會直接喺街瞓低⋯？

陸修然從褲袋拎出手機，send咗個message比黎昕淇：「我喺你後面，唔會走失」

黎昕淇睇到message之後又一次回頭望向陸修然，陸修然頷首示意黎昕淇繼續行

喺番到學校附近時候，江清懿行上前拍黎昕淇，黎昕淇嘅餘光見到陸修然喺佢身旁經過行喺佢前面

「突然又行咁快⋯」黎昕淇望住陸修然嘅背影，喺心中默默無奈，「真係唔明佢⋯」

小息嘅時候，宋楚妍靠住黎昕淇食嘢，黎昕淇淨係買咗盒嘢飲

「好攰呀⋯」宋楚妍講道，「陣間又上啲好悶嘅堂呀⋯」

「我都好攰，上完頭兩堂已經好似上咗一日咁⋯」黎昕淇都搖搖頭，佢已經覺得大腦都有轉唔郁，「好攰⋯」





「咁快已經食緊嘢啦？偷走？」江清懿同蘇序然朝兩人行去

「偷走就冇，腳長行得快啲咁解～」宋楚妍企番好，口中仲咬緊佢買番嚟嘅餃子

「哦，係喎～」江清懿打量將宋楚妍由頭到腳打量，帶住嘲諷值滿點嘅笑容附和

「江清懿，比啲尊重！」宋楚妍叉住腰，一副兇惡嘅模樣

「我已經附和你，仲唔夠尊重你？」江清懿覺得好笑，同蘇序然一齊笑道，「宋楚妍你真係好好笑。」

「好笑得過你？」宋楚妍打開手中第二個膠袋食埋佢嘅小食

黎昕淇只係安靜咁喺隔離睇住大家打鬧，好少會參與其中，偶爾都會附和一下，但今日明明都有精神，但佢唔太想開口講嘢





「黎昕你又發呆，最近你好似成日都係咁⋯」宋楚妍輕捏咗黎昕淇嘅手臂一下，「最近學生會好忙？」

「但最近鍾安而同鍾樂時都好早番嚟。」江清懿口中咬住飲管，將剩低嘅半盒檸檬茶一飲而盡

「冇好忙呀。」黎昕淇望向宋楚妍道，「只係⋯唔⋯唔識講。」

黎昕淇尷尬咁笑一笑，佢冇覺得自己最近好常發呆，不過宋楚妍有成日叫佢就係

宋楚妍臉上寫住「擔心」二字，不過黎昕淇冇咩唔開心，正確嚟講係佢唔太知道自己最近為咩事發呆

眼見黎昕淇好似唔太想講，宋楚妍冇再追問落去

黎昕淇望向小食部門口，一眼就見到陸修然嘅身影，陸修然好容易就係可以得吸引到其他人嘅目光，係因為佢嘅氣場定因為佢有身高優勢？

陸修然等埋莫淮禮掉完垃圾先轉身行，行咗兩步就有一個女仔上叫住咗陸修然，對方帶住微笑同陸修然講咗兩句，陸修然微微點頭之後就轉身行





「原來係同班同學⋯」黎昕淇望清楚嗰個女仔係邊個之後默默咁收回視線

⋯

中午食飯嘅時候，江清懿同蘇序然先一步去攞位，黎昕淇同宋楚妍執好嘢先過去，但一行入餐廳，黎昕淇就呆咗

「點解會一齊坐⋯？」黎昕淇嘅頭上出現一個大大嘅問號，眼神中係無盡嘅疑惑

「咁啱見到又有大枱，所以就搭枱，大家都識就冇咩所謂啦～」江清懿見兩人有啲疑惑就主動開口解釋

宋楚妍行過去拉開鐘安而隔離嘅櫈坐低，拉佢同江清懿之間嘅櫈推開啲等黎昕淇易啲行入嚟坐；黎昕淇雖然有啲遲疑，但都係拉開櫈坐低

陸修然坐喺黎昕淇對面，對望嘅時候兩人默契咁同步將視線移開





「你地食咩呀？」宋楚妍向黎昕淇嗰邊湊近，江清懿望過嚟嘅時候宋楚妍將餐牌放喺中間

「我食A餐。」江清懿嘅膊頭同黎昕淇嘅膊頭之間靠得有啲近

「會長你食咩餐？」莫淮禮問陸修然

「B餐。」拎住餐牌嘅陸修然默默咁挺直腰坐起，然後將餐牌放低喺枱上

黎昕淇聽到餐牌放低嘅聲音，下意識就抬眼偷瞄一眼，本來今日陸修然因為唔夠瞓所以低氣壓，宜家再望就覺得佢比今朝早更加低氣壓

「我都食A餐」黎昕淇邊講邊默默咁向宋楚妍嗰邊靠，陸修然坐喺佢對面佢已經夠唔自在，「好逼呀⋯你地自己咪有餐牌，做咩要逼晒過嚟睇我嗰個？」

宋楚妍同江清懿都坐番好睇餐牌嘅時候，黎昕淇忽然縮咗一下，黎昕淇微微耷低頭望咗一眼，佢同陸修然嘅鞋頭咁啱唔小心踢到，黎昕淇若無其事咁坐好，雙腳向後收咗半步

黎昕淇趁其他人冇留意到即刻瞪咗陸修然一眼，用眼神對陸修然「嘖」咗一聲




IG Link: https://www.instagram.com/nd_cotttoncandy/?hl=zh-tw