【愛情】如地下情一樣嘅癮，係我對你嘅定義: 48. 一觸即發

「你咁攰仲叫我出嚟做咩？」黎昕淇留意到陸修然嘅倦容

陸修然咩都冇講，只係拖住疲倦嘅步伐走向黎昕淇，將黎昕淇抱喺懷中

突如其來嘅擁抱，黎昕淇一時間都反應唔切，呆呆咁抬頭望一望陸修然，手自然咁提起放喺陸修然嘅腰間，拉住佢嘅裇衫

「阿然？」黎昕淇嘅語氣變得柔和，試探般嗌咗陸修然一聲

「嗯。」陸修然低聲回答，抱住黎昕淇嘅力度又加大咗少許，但好快又鬆開手，同黎昕淇之間嘅距離由0拉番去1





「你到底—」

黎昕淇嘅說話講到一半，陸修然耷低頭將黎昕淇接住落嚟要講嘅嘢直接推番去，想講嘅說話卡喺黎昕淇嘅喉嚨

突如其來嘅熱吻令黎昕淇不禁臉頰羞紅，大腦仍然未反應得切，但喺本能下都係作出回應；本來規律嘅呼吸聲已經變得紊亂，手下意識拉住陸修然嘅衫裇，腰間嘅位置已經捏出皺褶

「等、等陣⋯！」黎昕淇輕力將陸修然推開，微張開嘴喘氣，「陣間⋯哈⋯有人出嚟見到⋯」

黎昕淇將陸修然攬住佢嘅手推開，拎鎖匙轉身開門，陸修然跟喺黎昕淇嘅身後行入去，牛奶企喺走廊邊探頭望出嚟，一見到陸修然即刻小跑到門前蹭陸修然嘅腳





只係咁短嘅時間，本來平靜嘅黎昕淇心底嘅癮已經比陸修然撩起，乾澀嘅感覺令黎昕淇忍唔住焦急起嚟，伸手拉起陸修然朝自己嘅睡房行去

黎昕淇將房門閂上，將牛奶攔喺房門外面，牛奶默默咁行番去梳化灘低；房門一閂埋，黎昕淇伸手捉住陸修然嘅校呔，陸修然耷低頭嘅時候一手放到黎昕淇嘅後腰，另一隻手捉住校呔嘅領結，將校呔向下拉鬆咗啲

黎昕淇伸手攬住陸修然嘅頸，手喺度佢嘅頸後交搭，佢嘅癮令佢將唇主動湊上去，陸修然隨即作出回應，吻逐漸變得熱烈，空氣又一次熾熱起嚟，既然黎昕淇作主動，咁陸修然⋯就更加唔可能鬆開佢

喺將呢個深不見底嘅癮帶嚟嘅嗰一日，係一個令人躁動不安嘅雨天，兩人只係坐埋一齊睇電影，可能係因為劇情、可能因男女主角之間嘅感情、可能係內心嘅好奇⋯

陸修然靠近嘅時候黎昕淇冇避開，可能冇人諗到，心入面嘅癮會因為一次嘅氣氛渲染而撩起嚟，什至一發不可收拾⋯





今次嘅吻感覺漫長又纏綿，鼻尖前除咗喺熾熱嘅氣息，就係對方身上嘅香味；陸修然嘅背貼住門，眼前嘅人雖然有小辣椒嘅性格，但係到嘴邊嘅時候係清甜嘅味道

黎昕淇一直踮起腳尖，腳已經有啲酸軟嘅感覺，佢嘅腳踭向下踩番喺地上面嘅時候，無力感由腳踭傳到膝上，黎昕淇頓時腳一軟就向下滑落去癱坐喺地上

陸修然喺黎昕淇腳軟下滑嘅時候，跟住佢一齊蹲低跪喺地上，本來疲倦嘅佢宜家顯得更攰，靠住門坐喺地上，仰起頭呼吸

雖然忽然嘅抽離會令大腦瞬間變得空虛，但係好似應該要暫停一下⋯

因為接吻而帶嚟嘅濕潤感仍然停留喺唇上，黎昕淇癱坐喺陸修然嘅雙腿間，滿臉都係因為微微缺氧而帶嚟嘅疲倦，搭喺陸修然頸後嘅雙手無力咁鬆開，沿住佢嘅膊頭滑落

黎昕淇將頭靠喺陸修然嘅鎖骨前，唇微張開喘氣；陸修然嘅雙手輕輕抱住黎昕淇，喉核上下一郁，口水沿住喉嚨而下

「最衰就係你⋯點解要撩起我⋯」黎昕淇微喘住氣抱怨道，「搞到宜家，一發不可收拾⋯」

「你當初，點解回應我？」陸修然反問黎昕淇





黎昕淇一言不發咁提手喺陸修然嘅手臂上不輕不重咁搣咗一下，陸修然習慣黎昕淇嘅脾氣，佢向來都係由得佢，隨黎昕淇喜歡

「又搣我⋯」陸修然嘅手輕輕捉住黎昕淇仍然放喺佢手臂上嘅手，將佢嘅手拉咗落嚟

房間內好安靜，黎昕淇冇開口回應佢，陸修然側一側頭望咗黎昕淇一眼，黎昕淇合埋眼靠喺佢身上，睇起嚟安靜到好似乖巧嘅貓一樣

「我都未瞓著⋯」陸修然無奈一笑，佢唔知道佢宜家要點起身，「坐喺地板都瞓得著⋯」

陸修然將落喺黎昕淇臉龐上嘅髮絲繞到耳後，望住黎昕淇安心嘅睡顏，陸修然仰起頭嘆氣

最近喺學校佢都要好努力咁保持住佢嘅形象，要壓抑住佢心入面真實嘅感受，亦要同黎昕淇保持距離，最近覺得呢件事愈嚟愈難⋯

「好煩⋯」陸修然喺心裏抱怨道，呢種感覺成日圍繞喺心頭令佢好唔自在





黎昕淇疲倦咁用力睜開眼，緩緩坐好，陸修然感覺到身上嘅重量減輕後望向黎昕淇，黎昕淇睇起嚟就嚟要瞓著

「眼瞓就去瞓啦，我番去啦。」陸修然以柔和嘅語氣對黎昕淇講道，聽起嚟好似氹小朋友一樣，「起身啦。」

陸修然早一步企起身，然後彎腰伸手捉住黎昕淇嘅手踭打算將佢扶起，但黎昕淇仍然坐喺地上

「冇力⋯」黎昕淇嘅聲線又一次變得軟綿綿，「冇力起身⋯」

陸修然無奈咁放開黎昕淇嘅手，然後將腰再彎低多啲，將黎昕淇一下抱起企好喺地上

黎昕淇拖住腳步到床邊坐低，然後直接灘低喺床上面；陸修然見安頓好黎昕淇，佢就行出玄關著鞋番去

「下次再同你玩。」陸修然喺開門前蹲低伸手摸一摸行到佢面前嘅牛奶

聽到大門閂上嘅聲音之後，側身瞓喺床上嘅黎昕淇將雙腳曲起，將自己捲縮起嚟，牛奶喺呢個時候行入睡房，跳到黎昕淇面前趴低





「牛奶呀牛奶～」黎昕淇攬住牛奶，牛奶乖乖地趴喺床上唔郁，「點算⋯？」

黎昕淇嘅大腦都有啲空白，一合埋眼嘅時候腦海浮現嘅都係陸修然，睜開眼嘅時候用唔平靜嘅內心感受住房內嘅安靜

「好亂呀⋯」黎昕淇完全冇睡意，啱啱嘅佢有幾眼瞓，呢一刻佢就算合埋眼都瞓唔著

陸修然留過喺佢間房之後，黎昕淇總覺得房內有佢殘餘嘅氣味，偶爾聞到熟悉嘅味道嘅感覺令佢平靜嘅內心總係泛起漣漪

「如果得我一個人有咁奇怪嘅想法點算⋯」黎昕淇將頭埋到枕頭，「快啲冷靜落嚟啦黎昕淇⋯」

心入面泛起漣漪嘅人唔係只有黎昕淇一人，番到屋企嘅陸修然都渾身唔自在，特別係望到掛喺書枱嘅小白兔毛公仔之後

反常嘅行為會令人唔自在係事實，但如果要壓抑呢種反常，就會變成又唔自在又難受





「煩呀煩呀。」陸修然坐低喺書枱前垂頭，苦惱咁摸着自己嘅後尾枕，「唔好再諗啦⋯」




IG Link: https://www.instagram.com/nd_cotttoncandy/?hl=zh-tw