【愛情】如地下情一樣嘅癮，係我對你嘅定義: 25. 假設
「冇咩⋯」黎昕淇緩緩搖頭，將手機放番喺枱上面，「你啱啱講到邊？」
「冇呀，我講緊陣間晏晝嗰堂可能會突擊小測咋嘛～」宋楚妍重複一次佢啱啱講嘅嘢
「哦⋯都唔驚嘅，有聽書嘅話。」黎昕淇勉強咁擠出一個笑容
「今日放學得唔得閒呀？得閒嘅話陪我去買嘢呀～」宋楚妍邀請道
「好呀。」黎昕淇猶疑咗一陣，但都係答應咗宋楚妍
⋯
「你要買咩呀？」黎昕淇陪宋楚妍到書店，「書？」
「之前我追緊嗰本書出咗下集啦，所以我要嚟買！」宋楚妍略帶點激動道，「好似已經有，係燙金版嚟！」
黎昕淇本來就對睇書呢樣嘢冇太大興趣，所以佢都唔知可以比啲咩唔會掃興嘅反應宋楚妍先好
黎昕淇攬住冷衫跟喺宋楚妍身後，視線喺放喺黑色木枱上嘅書上掃過，不過封面再吸引都好都引唔起黎昕淇嘅興趣
「搵到啦！」宋楚妍忽然加快腳步，行到其中一張枱前拎起一本書，黎昕淇緩步行到宋楚妍身邊
「就係呢本？」黎昕淇望住宋楚妍愛不釋手嘅書問道，「講咩㗎？之前見你成日睇。」
「講緊一對青梅竹馬因為佔有慾而起嘅相戀，上集係講緊呢個～」對上集已經倒背如流嘅宋楚妍好快咁比咗答案，「下集係講副線主角。」
「哦⋯」聽到內容簡介嘅黎昕淇下意識一樣皺一皺眉頭，「唔會好奇怪？青梅竹馬、佔有慾、相戀⋯」
「點解會奇怪？」今次到宋楚妍唔理解，「唔係好正常咩？日久生情。」
「現實中嘅話，唔會好奇怪⋯？」黎昕淇試探一樣開口問，喺宋楚妍提起嘅瞬間，佢已經諗到陸修然
「現實中呀⋯我嘅話就要對方睇下靚唔靚仔啦～如果靚仔嘅話相戀都冇損失～」宋楚妍笑道，只係簡單咁幻想一下佢都覺得好刺激又興奮，「你諗下，如果你有個青梅竹馬，你基本上係比其他人更接近佢，咁樣唔係近水樓台先得月咩？」
「係幾有道理嘅⋯」黎昕淇遲疑咁作出認同
「你諗下，如果你同會長係青梅竹馬，你係唔係比其他人更更更接近佢？」宋楚妍又提出一個假設性問題，「假設，假設性問題。」
「係⋯」黎昕淇微微點頭，心入面悄悄嘆氣道：「雖然對我嚟講都唔係假設，係事實⋯不過如果否認嘅話就會好⋯奇怪⋯」
「咁咪係囉！」宋楚妍用力點頭，「所以唔奇怪呀，你習慣咗你同佢嘅關係最接近，點會接受其他人走近佢？所以最後一齊係好正常，除非真係大家完全唔係對方中意嗰類型啫～」
黎昕淇沉默不語，所以佢先唔想比人知道佢同陸修然嘅關係，一講咗，大家就好自然會聯想，宋楚妍就係個最大嘅例子
「我地再番去啱啱嘅例子，會長咁受歡迎，係咁多女仔嘅仰慕對象，作為青梅竹馬嘅你一啲都唔會妒忌？」宋楚妍問道，佢心入面已經有預設好嘅答案
「點解我要妒忌？」黎昕淇卻一臉質疑咁反問宋楚妍
「吓？」宋楚妍一臉愕然，黎昕淇嘅反應同答案同佢本來諗到嘅完全唔一樣
「既然本來係青梅竹馬，我自然比其他人更加了解佢，眼中嘅佢亦同其他人所見嘅唔一樣，其他人睇嘅係佢嘅表面，但我睇到更真實嘅佢，所以我做咩要妒忌其他人？」黎昕淇認真又正經咁反問，宋楚妍都答唔到佢
「你都⋯代入得幾快⋯」宋楚妍仍然處於震驚當中
「假設性問題嘛。」黎昕淇微微點頭，順住宋楚妍嘅問題回答，但事實上佢嘅假設問題嘅答案係出於佢嘅真實想法，「你係唔係要去比錢？」
「哦！係呀係呀！」宋楚妍即刻行去收銀處排隊比錢，黎昕淇企喺隊外嘅位置等佢
黎昕淇企喺一邊，腦袋卻忍唔住思考宋楚妍啱啱問嘅問題
「會妒忌先係唔正常⋯我都離佢咁近，仲可以妒忌其他人啲咩⋯佢都唔會妒忌啲咩啦⋯」黎昕淇喺心裏道，「唔係，唔係唔會，係本來都唔會有呢個情況。」
如果會因為異性接近而妒忌，會妒忌，即係有佔有慾⋯感情就會變得唔再純粹
「好難想像陸修然識女朋友，有咩幻想都會破滅⋯」黎昕淇不禁一笑
「咦？嗨～」忽然有人行到黎昕淇身旁
「嗨⋯」黎昕淇一抬頭就見到莫淮禮，心入面有種隱隱約約嘅奇怪感覺，「咁啱呀⋯」
「係呀，我嚟買少少嘢⋯」莫淮禮擰轉頭望咗一眼，又朝遠處望一望，「會長人呢？」
黎昕淇頓時知道自己隱隱約約嘅奇怪感來源，見到莫淮禮，但見唔到陸修然，平日佢兩個多數都會一齊
「你行咁慢㗎⋯」莫淮禮見到陸修然慢悠悠咁喺轉角位行過嚟
「會唔會係你行太快？」陸修然走向莫淮禮同時見到黎昕淇
「Okay搞掂啦～」宋楚妍幾找番嚟嘅錢先擺番入銀包，「咦？咁啱嘅？」
莫淮禮以前有同黎昕淇同宋楚妍同過班，以前都算熟，不過比起黎昕淇，莫淮禮同宋楚妍熟啲
「你買呢本，我之前有見人推薦過。」莫淮禮指住宋楚妍手上嘅書，「好似係講⋯青梅竹馬？」
「好好睇，啲人推薦得冇錯～」宋楚妍點點頭，然後望向黎昕淇笑道，「你快啲同我一齊睇。」
「你咁望黎昕，我仲以為黎昕又有青梅竹馬添～」莫淮禮笑道
黎昕淇同陸修然對望咗一眼，然後又若無其事咁將視線迅速移開，刻意喺另外兩人面前迴避
「現實邊有咁多青梅竹馬。」黎昕淇淡然又認真嘅回答令陸修然微微咁將眉挑起
「答得好認真，完全唔會有人諗到佢係講緊大話。」陸修然耷低頭，嘴角小幅度上揚偷笑，抬起頭嘅時候已經收起笑容
「咁我地行先啦～聽日番學見～」宋楚妍同黎昕淇先行一步
莫淮禮行喺前面，陸修然跟喺佢身後，喺莫淮禮睇唔到嘅時候send咗個message比黎昕淇
啱啱行到門口踏出書店嘅黎昕淇就感覺到手機喺裙袋入面震咗一下
陸修然：「講大話講得好自然」
IG Link: https://www.instagram.com/nd_cotttoncandy/?hl=zh-tw