【愛情】如地下情一樣嘅癮，係我對你嘅定義: 24. 沒關係
「叩叩—」黎昕淇攬住兩疊A4紙去到會室門口，扭動門柄就推門行入去
陸修然都喺會室執緊櫃上面嘅嘢，佢望一望黎昕淇然後若無其事咁繼續執嘢
黎昕淇將A4紙擺喺枱上面，回頭望咗陸修然一眼
「今日出門口嘅時候明明都冇事，做咩突然間氣場全開⋯？」黎昕淇望住有一層氣場嘅陸修然，心入面疑惑咁問道，兩秒過後試探一樣開口：「會長，疊A4紙我放喺呢度。」
「嗯，好。」陸修然連頭都冇擰過去望一眼，只係望住書櫃冷淡咁回答一句
「會長，我喺呢度。」黎昕淇企喺枱前翹埋雙手對陸修然嘅背影道，「你真係知我放喺邊？」
「你話放喺枱嘛。」陸修然仍然唔擰轉頭，繼續執架上嘅嘢，「我知道。」
黎昕淇一步一步行到陸修然隔離探頭望咗一眼，佢想知陸修然做咩突然間唔高興，畢竟佢地嘅完美會長係好少有呢種情況
「邊個惹到你？」黎昕淇回頭望咗門口一眼，見真係冇人入嚟先問
「冇。」陸修然帶住寫滿不悅嘅表情否認，「同你冇關係。」
「哦，咁算囉。」黎昕淇聽到後半句之後瞬間煩躁起嚟，轉身大步行去開門
黎昕淇番到課室，宋楚妍本來仲想起身去迎接黎昕淇，但一眼就睇得出佢忽然間成個人嘅心情超差
「佢又做咩突然氣場全開？」宋楚妍又坐番低喺櫈上面，視線跟住黎昕淇移動
「做咩？」黎昕淇察覺到宋楚妍困惑嘅眼神，喺番到位嘅時候問咗一句
「冇，冇咩⋯」宋楚妍露出尷尬又不失禮貌嘅不安微笑，腦袋入面已經諗晒可以令黎昕淇煩躁嘅事，但就更加諗唔明：「今日學生會發生大事啦⋯？個個都一秒變面、氣場全開嘅⋯？」
宋楚妍好少見黎昕淇發脾氣，正因為平日嘅黎昕淇都好冷靜，所以黎昕淇一嬲，宋楚妍就會即刻察覺到
「黎昕，陣間lunch你想食咩呀⋯？」宋楚妍壓抑住壓張轉身問道
「隨便都可以。」黎昕淇嘅回答令宋楚妍不知所措，「睇你。」
「邊個激親你啦⋯？」宋楚妍低聲問道，「做咩嬲⋯？」
「嗯？」黎昕淇一怔，佢都冇留意到自己咩表情，難怪宋楚妍一直欲言又止一樣，「冇咩⋯」
「今日學生會有事發生？」宋楚妍問道
「冇⋯」黎昕淇收起煩躁嘅表情變番本來嘅平靜，「諗緊嘢啫⋯」
「今日你地個個都咁凝重咁。」宋楚妍笑一笑，想舒緩一下氣氛
「唔係呀⋯」黎昕淇除咗唔係都唔知可以答咩，但宋楚妍咁樣提一提起，黎昕淇嘅內心又有啲唔忿氣：「好心關心佢，一句就話同我冇關係⋯！都唔知邊個惹到佢⋯！」
⋯
「隨筆後日記得交番嚟，從來都冇試過一次過收齊你地啲功課⋯！」中文老師略帶點氣憤，大概因為今日嘅中文功課又收唔齊，「放飯啦！」
「今日好大怨氣⋯」宋楚妍望住老師行出課室時低聲講咗句，「今日做咩個個都咁躁底⋯」
「今日太多人欠功課，佢會有怨氣都正常。」黎昕淇屬於交咗功課嘅人，所以佢都明白Miss會嬲係正常，「行啦，去食飯啦。」
黎昕淇行喺前面先一步行到課室門口，宋楚妍跟喺佢身後，但當黎昕淇要踏出門口嘅時候忽然剎掣，宋楚妍嚇咗一跳，直接撞落黎昕淇嘅背
「做咩突然剎車呀⋯？」宋楚妍探頭望咗一眼
黎昕淇緩緩踏出一步行出課室，陸修然行喺佢前面，啱啱都唔知道係佢冇見到定點，直接喺佢面前快速行過
「冇嘢。」黎昕淇搖搖頭
「你今日做咩呀？」宋楚妍有啲疑惑咁探頭望一望黎昕淇，總覺得今日嘅黎昕淇有啲奇怪，「心情唔好？」
「又唔係，算唔上心情好唔好。」黎昕淇自己都有啲不明所以，「只係有啲莫名嘅煩躁。」
「煩緊咩呀最近？講嚟聽下？可能我可以幫到你呢～」宋楚妍翹埋雙手，擺出一個專業嘅模樣
「咁又冇煩緊咩，就係突然間有啲煩躁。」黎昕淇解釋道，隨便就搵咗個理由解釋
黎昕淇同宋楚妍行到餐廳，咁啱陸修然同莫淮禮佢地都係食呢間，黎昕淇隨即將視線移開
「會長喎。」「嗯。」
「你好冷淡⋯」宋楚妍望向黎昕淇，無奈咁搖搖頭
陸修然聽到後面傳嚟宋楚妍把聲，估到黎昕淇都喺度
「你諗好食咩未？」陸修然轉身問莫淮禮，餘光望到黎昕淇
「啱啱先同咗你講我食B餐呀會長⋯」莫淮禮捉住陸修然嘅膊頭，「你有冇聽人講嘢㗎⋯」
「係咩，唔記得咗。」陸修然淡然講咗一句，然後跟喺侍應身後行入去
「你都唔聽我講嘢嘅⋯！」莫淮禮不滿咁扁起嘴，「好過份囉會長！」
「知啦，B餐。」陸修然隨意咁提一提手比咗個Okay手勢
「嘖嘖⋯」莫淮禮搖搖頭，「太令人失望啦⋯」
「落單啦。」陸修然敷衍咁點頭
黎昕淇同宋楚妍坐嘅位置喺陸修然佢地嘅斜對面，喺陸修然嘅餘光嘅可視範圍內
宋楚妍耷低頭睇餐牌嘅時候，黎昕淇裝作不經意望向陸修然嘅方向，陸修然拎起水杯飲水，視線卻係朝住黎昕淇嘅方向瞄咗一眼
「如果呢個時候，楚妍見到我同陸修然對望，我要點樣解釋比佢聽⋯？」黎昕淇忽然諗到呢個問題
問題嘅答案本來可以好簡單，但係黎昕淇反而覺得好難解釋清楚，要解釋嘅話，好似講咩都好似藉口一樣
陸修然將水杯放低同時，先一步將視線移開
「黎昕，你睇好食咩未？」宋楚妍一句令黎昕淇回過神，迅速將視線落番喺宋楚妍身上
「睇好啦。」黎昕淇微微點頭，「落單啦可以。」
黎昕淇低頭望手機，只係想分散自己嘅注意力，偏偏呢個時候收到陸修然嘅message：「？」
「？？」黎昕淇回覆番兩個問號比陸修然
「冇嘢」陸修然只係覆咗兩個字過嚟，黎昕淇喺心入面嘆咗一口氣，朝陸修然望過去嘅時候見到佢啱啱好將手機放低喺枱上
「黎昕，你發咩呆？」宋楚妍伸手喺黎昕淇面前揮兩揮，「心不在焉咁⋯」
IG Link: https://www.instagram.com/nd_cotttoncandy/?hl=zh-tw