我係喜達,撈麵界既亞視: 黑林頓篇(3)

升左上中六既黑仔

無參加學生會,無參加學校各樣活動

李嘉欣原校升唔到中六,去左第二間學校

黑仔又再變返中一既黑仔,每日起身就係為左讀書

班房既讀書氣氛好濃厚,偶爾都會有同學會同黑仔討論功課





黃俊走之前,介紹左黑仔去幫佢既表弟妹補習

黑仔係唔洗同人補習既時候,就會留係屋企讀書

同年黑仔一家收到房屋署,終於排到公屋,可以上樓了

黑仔去超級市場貼紙幫人補習

黑仔需要多d學生





黑仔知道新屋裝修買家具將會洗好多錢

黑仔好幸運,有三個家長搵佢

黑仔每日放學都要同小學生補習

有時候為左就學生既時間

好多時黑仔都要成十一點先返到屋企





黑仔媽媽擔心黑仔唔夠時間休息,唔夠時間學習

黑仔叫媽媽唔洗擔心,拎左三千蚊比媽媽

有一晚黑仔係屋企溫緊書

電話響

『喂?』黑仔用膊頭夾住電話

『喂黑林頓呀唔該』

一把好熟悉既聲音

『我係,邊位呀?』





『我呀!呀俊呀!黃俊呀』

黑仔無出聲

出唔到聲

黑仔用手遮住電話既收音位

黑仔喊,黑仔都唔知點解,只係佢一聽到黃俊把聲,佢就忍唔住d眼淚

『屌做乜唔出聲呀,仲嬲我呀?』

黑仔左手掩住塊面,眼淚係手指罅不停咁留落黎





『黑仔,原諒我啦,雖然我唔知你點解嬲左我,但係我咁大個仔,真係得你一個兄弟』

『我係呢邊識左個女朋友呀,佢台灣人來架,返香港一定要介紹你識』

『呢邊好撚凍呀,又落雪』

『黑仔你其實嬲我咩野姐』

『...』

『黑仔呀,對唔住呀』

黑仔知道黃俊為左一段友情,就算佢知道自己無做過對黑仔唔住既野,佢都道歉,因為佢珍惜衣段友情

黑仔用手背抹乾眼淚,乾咳幾聲





『對唔住呀,俊』

『下?黑仔你講咩呀?對咩唔住呀?』

『我話對唔住呀!對唔住呀』



俊,對唔住


黑仔同黃俊談天說地左一晚,傾過去,傾現在,傾未來

黑仔無講點解避黃俊,黃俊亦都無再追問





『傾左成晚你idd好貴架喎』

『唏,我呢d富二代,少少電話費算得d乜』

『我呢邊天光啦』

『我呢邊都天黑』

『得閒你要打比我』

『一定會,大家保重』

『你都係呀,保重』


『呀俊同你都幾好兄弟喎』味粉已經溶晒落我到

『..』黑仔正想講落去,門外突然有人好用力拍門

『開門啦屌你老母,黑林頓還錢呀仆街』

黑仔即刻跑去防盜眼到望下

『仆街洗唔洗咁多人呀』

黑仔好細力咁慢慢行返床邊

『你差人好多錢咩?』我問黑仔

『多與少都好啦,無得過,幾多都係一樣』

『你讀得書架喎,點解搞成咁呀』

『係呢,結果入左邊間大學呀你?』

『邊個話我有讀大學』

『下?!你讀書咁叻都無大學讀?』

『屌你老母,你再唔還錢我就燒你老豆個春袋』收數佬又發功

『咁撚毒?!』辣醬都忍唔住出聲

收數佬最尾好用力咁踢左幾下門,就收隊走左

『中七果年既下學期,我去左坐監』

黑仔又點起左支煙



黑仔係中七既上學期,有次幫完學生補習

等緊巴士既途中

佢見到李嘉欣

李嘉欣主動叫黑仔

『喂黑仔』

『嘉..李嘉欣..hi』

『你去邊呀』

『同人補完習..同恆仔補習..返屋企..衣家返屋企』

『屌,講句野都講唔好,你去死啦仆街仔』黑仔係個心入面鬧自己

『咁耐無見,抵請食飯啦』李嘉欣搭住黑仔膊頭,個雞心就掂住黑仔隻手臂

『抵呀..好抵呀..食咩呀』

就係咁

黑仔同李嘉欣食左第一餐飯,然後又好順利咁食左第二,第三餐

當然都係黑仔比錢啦

黑仔就專登為左隨時等李嘉欣搵佢,走左去買左一部二手既手提電話

黑仔肉赤

但係為左隨時準備為佳人提供服務,就忍痛出左第一部電話

而知道呢個電話號碼既人就只有黃俊,父母,同李嘉欣

有次黑仔同李嘉欣睇戲

黑仔鼓起勇氣

『嘉欣,你可唔可以做我女朋友呀』

『可以』

李嘉欣答得好快,無望過黑仔一眼,一邊食熱浪,一邊睇住戲咁答黑仔

黑仔即刻拖住李嘉欣隻手

『我唔想咁快』李嘉欣推開黑仔隻手

黑仔無失望,好開心,好開心,黑仔都知道唔可以咁快

黑仔一路保持住個笑容,望住套戲,一時又偷望下李嘉欣

李嘉欣望返佢,黑仔又即刻望返住套戲

...

成個傻西咁




黑仔自從同左李嘉欣拍拖之後

平時可以用一個月既錢,變左五日就用完

黑仔明白,拍拖絕對要用錢,黑仔都有睇電視

要買花,要去海邊

但係李嘉欣都唔鐘意,只愛食野,買野

佢只係鐘意突然打比黑仔,同黑仔講要食乜,黑仔就去衝去李嘉欣樓下接佢,再出去食佢想食既野

都係唔比拖手

黑仔夜晚想同李嘉欣傾電話

李嘉欣限住只可以傾十五分鐘,有時十分鐘都未夠就話夠鐘

黑仔唔緊要,就算只有一分鐘黑仔都會好好珍惜

黑仔知道自己終於可以戀愛,好事一定會跟住來

黑仔買左好多彩紙返屋企

兩日無休息過

整左一個好大既紙牌,上面寫住

『李嘉欣,我愛你,比我拖下你隻手可以嗎?』

黑仔望住個牌,好滿足咁笑

黑仔有日去李嘉欣樓下等佢

黑仔想比個驚喜佢

黑仔由朝早七點坐到夜晚七點

十二個鐘

黑仔累啦,黑仔想返屋企

黑仔見到後樓梯有人激吻

黑仔感覺個女人唔係好願意

呀!黑仔知道啦!係非禮

黑仔放低手上個紙牌,慢慢行過去

女仔係李嘉欣呀

黑仔好嬲,非常嬲

拎起個垃圾筒,推開防煙門

起勢咁扑住個頭

『色狼,扑你老母個臭西,死仆街』

黑仔扑到好似唔撚洗錢咁,扑到彭彭聲,仲要有節奏

應該係四拍四來

『唔好打喇』李嘉欣好緊張,好用力咁推開我

『..』黑仔仍然扑得好撚陶醉

『唔好打喇,佢係我男朋友來架』

『我梗係你男朋友啦』黑仔扑到手都累埋

李嘉欣衝過來抱住比黑仔扑到仆晒街既男仔

『我話佢係我男朋友呀!』

『下,咩呀,我係你男朋友喎,咁佢點會係呀?』黑仔唔明白

『佢同我玩分手唔搵我,我搵你同我攝時間咋,你做咩扑到佢咁呀!死仆街!』

黑仔呆左,郁唔到,仍然渣住手上既垃圾筒

差人來到

捉住黑仔

『佢非禮我女朋友,我制止佢』黑仔仍然呆左望住李嘉欣

『佢話你係佢條女喎,係咪呀』警察問李嘉欣

『梗係唔係啦,我唔識佢架!佢成日跟住我架,變態,呢家又打我男朋友』李嘉欣嚎哭

黑仔眉頭好輕力咁皺住望住李嘉欣,黑仔個樣好可憐,好似八哥,黑仔好心痛,但仍然想過去幫李嘉欣抹眼淚

警察拉住黑仔,用力拍埋牆

『個牌係咪你整架』

『呀sir係呀..我用來向我既女朋友示..』

『女你老母朋友咩,人地都話左唔識你咯,你仲拎個牌寫埋d核凸野』女警忍唔住差把口過來

『唔係呀..唔』

『你收聲啦變態佬,上車啦』




『李嘉欣,我愛你,比我拖下你隻手可以嗎?』


黑仔返到差館,落口供好似電視劇咁要求搵律師

黑仔識西律師咩,原來佢打電話比李嘉欣

留言信箱

『嘉欣對唔住,我唔知我做錯咩野,我淨係知道我又做錯野』

...

黑仔比人困到第二日就直接上庭

不準保釋,還押壁屋監獄

就係咁

黑仔唔想講太清楚係入面既事比我地知

就係講左最後判左入勞教中心

爸爸無探過佢,媽媽探左一次

李嘉欣無來過

出獄之後

爸爸對黑仔好冷淡,媽媽既笑容都再見唔到

黑仔需要工作,去補習,家長問黑仔有無案底,黑仔話有

黑仔再做唔到補習老師

黑仔最後做車房

會考二十四分既黑仔做車房

黑仔日日係車底做野

黑仔變左黑人

『無緊要啦,搵食』

黑仔收工回家好累,需要睡眠

岩岩坐上床,爸爸又入來指責黑仔

鬧黑仔有學唔讀,走去打人,要去做車房..

黑仔失眠,但五個小時後又要再工作

四點了

黑仔收到一個sms

『喂黑仔~~~我返來囉』

..黃俊