兒時恐怖回憶

十多年前的一個暑假，
其時正值七月時節，
家人因工作關係需到外地一星期，
我和堂弟只好暫住在嫲嫲家。

嫲嫲手捧着一個大膠盤，
上面有香燭、衣紙、紅色碟、芽菜、水、白飯、龍眼、豆腐、白酒、花生、生果…等祭品，我和堂弟總會跟隨在後，
嚷著要和嫲嫲一起到街上燒街衣，
由細到大對這種儀式深感好奇，
一直懷疑神明與鬼魂是否存在。





『乖乖地，唔好亂噤走呀！
要小心，踢到人地嘅食物就唔好啦！』
嫲嫲叮囑我們要慢行。

『嫲嫲！點解要將食物比透明人食嘅？』
我好奇地問。

『透明人曾經都係人，曾經有家人、朋友，不過因為衰老、疾病、意外而離開左人間，變左透明人，一部分無家可歸，只可以流連喺街上面，佢地都會肚餓，我地需要尊重先人，表達孝道和盡下善心，希望佢地食飽可以投胎做人！』





我和嫲嫲蹲在路邊把衣紙點燃，
然後一一放進化寶筒，
而堂弟湊巧碰見同學，
便擅自離開我們的視線範圍，
更急步走進馬路旁的公園，
他調皮的行為是司空見慣的事，
我高聲說：『喂！傑仔！你要去邊度呀？』

『傑仔，你唔好周圍走呀！』嫲嫲高呼著。






燒完街衣準備回嫲嫲家時，
堂弟從公園跑回來笑著說：
『家姐，我想去士多買零食呀！』
我回答：
『我喺門口等你，你隻胃食鬼，落街都掛住食，快D買完跟嫲嫲上返去啦！』

堂弟亢奮地拿著薯片，
跑上前：
『好野！返上去一路睇電視一路食薯片！』

『你幾時帶左噤多錢落黎，而我都唔知嫁？』我好奇地問。

『總之我就有辦法啦！』堂弟得意地回應。





到了深夜時份，嫲嫲已經上床休息了，
仍然精力充沛的我和堂弟在客廳看電視食薯片，突然，傑仔捉住我的手臂，
他把眼睛合起，聲音抖震地說：
『家姐，你見唔見到露台果邊，
好似有個男人望住我地呀？』

『唔好玩啦！咩都冇喎，係唔係你太攰呀？不如快點去訓啦！』我回答他。

『你關燈…』傑仔都未講完呢句說話，
就慌張地衝左入房，客廳中的我感到一絲寒意，剛剛看見傑仔迴避的眼神和驚慌的反應，我相信他所看見的影像一定比我想像中更恐怖，我從未見過堂弟如此驚惶失措。
我硬著頭皮將洗手間、客廳的燈逐一關上，我唯有閉起眼睛…慢慢地走近露台，扶著牆壁摸索著露台的燈制，只想關燈後衝入睡房，為求不要遇上堂弟口中的『露台透明人』。

客房房門突然呯一聲關上，
奇怪的是我已經關掉所有門和窗開了冷氣，
客房沒有人、沒有開風扇為何門會自動關上，愈想愈匪夷所思，感到一絲寒意包圍著我，我迅速返入睡房把門和燈關上，爬上碌架床上層準備休息。





當我在半睡半醒嘅時間，隱約聽到睡在下格床的傑仔在喃喃自語，更時不時發出令人心寒的笑聲…

這時，令我聯想起剛剛在客廳發生的事，
一切純屬巧合嗎？

毛骨悚然的笑聲在我耳邊徘徊，
我鼓起勇氣把頭向下探望說：
『傑仔！傑仔！你冇嘢呀嗎？』

這時，我看見一團猶如散發著綠光的煙霧般的半透明體，當我擦擦眼睛，看見這個半透明體似是一個瘦削男人的身影，它坐在傑仔的床邊，一瞬間，從傑仔的床邊移向牆壁，我更看見它慢慢穿入牆壁，漸漸消失在我眼前…

在漆黑的房間遇到這種難以解釋的現象，
如此恐懼的感覺前所未有，
我唯有安慰自己看錯，




由於擔心傑仔的安全，
我立刻爬梯落床打開房燈。

『傑仔！發生咩事呀？』我揭開傑仔張被說。

『家姐…我好驚，頭先好似有個人坐咗喺我床邊，佢喺我耳邊講嘢…』眼神慌張的傑仔說。

『冇事！冇事！家姐喺度！』情緒仍然未平復的我只能安慰他說。

整夜失眠的我們夾雜著疲倦與驚恐的狀態等待日出的來臨，因為我們知道嫲嫲一定會在較早的時份起床，只想第一時間向嫲嫲說出這晚所發生的一切怪事。

『嫲嫲，我地真係冇講大話嫁！』傑仔正經地說。

『哎呀，有怪莫怪，細路仔唔識世界！
嫲嫲相信你地講嘅野！




係唔係你地返上黎屋企嗰陣多手多口呀？』
嫲嫲雙手合十說。

『冇呀，我地買完薯片就衝返上嚟啦！』我說。

『我尋晚喺公園見到好多錢喺地下…然後我拾左幾個銀仔，跟住就同家姐買零食返上嚟！』傑仔回答。

『哎喲～唔怪得知啦！七月時節地上面嘅錢係『過路錢』，係比透明人用，唔可以亂掂嫁，原來係傑仔你唔聽話，求個安心今日要同你去求道平安符啦！』嫲嫲說。

之後，傑仔病了大約一星期，
幸好沒有再發生其他古怪事，
可能他一直把平安符放在身邊吧。

事隔十年有多，
他偶然都會接觸到靈界的朋友。
他曾經分享過一個經歷，
他說在七月時節的時候比較容易與他們『邂逅』，
他住在舊式屋邨，
有一次深夜獨自回家的時候，
行完樓梯轉入燈光昏暗的長長走廊時，
低頭按著電話的他感到一陣寒風，
抬頭向前一望，
看見走廊盡頭站著一個長髮白衣女人，
再望清楚一點，
發現那個女人只有上半身，
他唯有扮作看不見那靈體，
同時保持前進的速度。

正當他站在家門口掏出門匙時的時候，
突然，
瞥見那個長髮半身女向著他移動，

他立刻用最快的速度打開鐵閘和大門，
衝入屋企關門，
再背誦經文為求安心，
只想令透明人明白他並無惡意，
亦安慰自己她只是路經此地探望家人。

我很佩服他能保持鎮定面對，
藉著自己宗教的信仰、力量，
鼓起勇氣盡力地去面對他們。

而我經歷過那十多年前的恐怖事件後，
幸好沒有再接觸和目睹過有關於靈界的物體，我是一個沒有宗教信仰的人，
但我認為尊重生命和他人的信仰是很重要的。

『靈魂』存在與否大家看法不同亦難以深究，在這光怪陸離的世界，
總有些現象是人類永遠都不能解釋的。

-----------------------------------------------------------
感謝讀者用了寶貴的幾分鐘進入此文章細閱
本人只想與讀者有所共鳴、共同成長

FACEBOOK 專頁: 自卑紀念碑
希望可以榮幸地得到你們的 『讚好』