[農曆七月應節故] 校園鬼故事 - 紅衣女孩: 彩蛋（三）：陳子鋒與小詠 – 小詠拜師之後
「條友都傻傻地，好地地想我拜佢為師，發佢個夢啦！封完身，等我去打返場波鬆下先！」我剛從天命叔那裏逃了出來，雖然還能看見些怪東西，但心情是愉快的。
就在我正想踏入籃球場的時候，我聽了一聲大喊：「喂！」，但附近除了球場裏，可是一個人也沒有。
「唔係呀，岩岩先封完身，個維園阿叔係咪玩我架？」我心想。
「佢無玩你呀！」我又聽到一把聲，但好像是直接在我腦中響起的。
「大佬饒命呀，冤有頭債有主，我平時除左把口衰D同鍾意睇下女，都無做過咩傷天害理嘅事，你唔好纏住我啦！你要人幫手嘅話，我介紹個型英帥又法力高強嘅大師過你啦，好無！」本以為封身後便不用再怕，怎料到馬上便撞鬼，我嚇得馬上跪在地上求饒，希望不再纏著我吧！
「哈哈，你搞咩呀？快D起身啦，你望下我係邊個先啦？」那聲音不但沒有離去，反而繼續纏著我。
「我唔會信你架，我有前科架啦，唔會再中計，求下你走啦，唔好再纏住我啦！」我幾乎哭出來了。
「唏，講極你都唔聽！同我抬頭！」我只感到一陣怪風在我下巴吹過，使我不自覺的抬起頭來！
就在抬起頭的同時，我看到一個樣貌清秀的「女人」，只是她是飄著的。怎麼這麼眼熟？
「啊！小詠！唔怪得把聲咁熟口面啦！點解你係度架？你唔係應該留左係天命叔度咩？」我站起來對著她說。
「嘻嘻，頭先全靠你，我拜左佢為師啦！」小詠在我面舉起她的手，做了一個勝利手勢。
「我多謝你就真啦，又可以封到身，又可以跣佢一鑊，諗起都開心！係喎，咁點解你會出現係度架？你係邊度捐出黎架？」我好奇的問。
「其實……是咁的……」小詠把剛才道壇發的事，我天命叔的要求告訴了我。
「呀，呢個維園阿叔，仲唔死心！仲想叫D鬼黎搞我，痴線架，我死都唔會拜師！」我不滿道。
「你唔好咁啦，其實天命叔都係為你好者。」小詠在我身邊這樣說。
「吓，唔係呀，連你都幫個維園阿叔？我唔制呀，我寧願打下波好過，唔好阻住我，我要入球場鬥波！」說罷，我步入了球場，但剛才正在打波的人全不見了，還有數人剛離開球場，用詭異的眼神看著我，而且還在竊竊私語的！
「搞咩呀？做咩D人走晒架？唔係驚左我順利邨櫻木花道呀？」我一邊抱怨，一邊坐在球場旁的椅子上。
「佢地見到你一個人口up up咁，咪嚇到走左囉！」小詠在我眼前飄浮著。
「一個人？呀！係喎，佢地睇你唔到架喎！咁我頭先咪成個傻仔咁？」我這才恍然大悟。
「無事嘅，我以前有時都會咁，遲下你會習慣架啦！」小詠安慰我。
「以前你都係咁？」我不解的問。
「係呀，其實係我變成鬼之前，由細到大，都成日見到D奇怪野架！直到最近，天命叔話我地呢種命格，係容易D見到，同埋身體弱果排就更加易見到。所以我以前，有時都會以為同人傾緊計，但原來係其他人眼中，我成日都自言自語，搞到無朋友咁滯。之後去到中學，開始知道點分鬼同人，就開始慢慢識返多D人，點知就遇到小敏，之後嘅野……你都知啦。」小詠帶點幽怨地說。
聽著小詠的說話，我又不期然想起她的身世，心情略帶一點沉重，不懂得怎樣回應。
「所以呢，你真係應該拜天命叔為師架！」小詠又再度勸說我。
「嗱嗱嗱，等等先！你講嘅野無論點樣諗，都同拜師無關喎！」我馬上警戒起來。
「梗係唔係啦，都不知幾有關係。你諗下，我就係細細個見到D奇怪野，搞到無乜朋友。到後期識分鬼同人，先至可以識返D朋友，但可惜唔識揀朋友，揀著D損友，仲搞到玩碟仙出埋事，你話係咪好慘啦！如果我一早識分鬼同人，咁就唔會無朋友，就唔會識到D損友，就唔會搞到死左，你話岩唔岩先！」小詠連珠爆發的說了一些東西，我被弄得頭昏腦漲。
「咁……咁點同呢，你細個就唔識分者。我依家識分架啦，同埋我都有朋友啦！唔會有咁大影響嘅！」我隨便回答了她。
「哼，你識分，好呀，咁你話俾我知，對面著黃色衫，同你差唔多年紀果個靚女，係人定鬼呀？」小詠不服氣的道。
我定神一看，不知何時，在球場另一邊，坐著一個外貌清純的少女，一身健康的古銅色，烏黑的長髮剛好及肩。而她身穿黃色小背心，下身則穿著一條白色短裙，而鞋子則穿著一雙白色涼鞋，很有夏天的氣息，啊，真想跟她做朋友！啊，不對，我是在猜她是人還是鬼！
「雖然佢好靚女，但好地地無理由有個靚女係個無晒人打波嘅籃球場。仲要著到咁，佢唔係人，肯定係鬼！」我裝作分析得頭頭是道的說。
「哼，你輸左啦！佢係人黎架！都話你分唔到架啦！」小詠嚣張的對我說。
「咩……咩呀，你講就係架啦？你證明俾我睇佢係人呀？」我一早預計好，只要對方是人的話，小詠根本沒有辨法證明，所以才說她是鬼，使自己立於不敗之地。
「你……你好奸呀，我現身嘅話佢肯定會走，你明知我證明唔到先咁樣講，唔制呀！」小詠裝作向我打過來，但她只是一團能量集合體，根本碰不到我。
就在我倆吵鬧之際，想不到那少女居然站了起來，並向我們的方向走了過來。
我和小詠都呆了一呆，如果你在街上看見有人在球場裏一個人在和空氣吵架，即使不逃走，也不會主動接近吧！
「小詠？佢真係唔係鬼？點解佢會走過黎架？」我有點擔心的問。
「佢肯定唔係鬼，我都唔知點解佢會走過黎！但我覺得佢有D特別！」小詠專注的看著這個少女。
然後，這個少女終於走到我們面前：「你好呀，我叫黃炎冰呀，火炎個炎，冰雪聰明個冰。請問你叫咩名呀？」
她的聲音很特別，我不知應怎樣形容。
舉例來說：阿詩是屬於小鳥依人的類形，是很吸引人，想讓人保護的感覺。
小詠則是那種小女孩，天真而帶點稚氣，和帶有少許活潑的聲音。
兩人都屬於很有女孩氣息，而又吸引人的聲音。
而眼前這位少女，她的聲音絕對屬於吸引的類別。
她的說話，一字一語也很有力，很有夏天的感覺，但她的聲線和感覺，卻帶點冰冷感！
大慨是這種自然溶合在一起的違和感，形成了特別的吸引力吧。
我回過神來，不自覺的回答了她：「我叫陳子鋒，孩子個子，鋒利個鋒。」
她向我笑了笑，然後稍向右轉：「多多指教呀子鋒！咁呢位小姐，呀，姐姐先岩，你又點稱呼呢？」
她說完後，我立刻緊張的站了起來，而小詠則飄到我的背後。
我對著她說：「你究竟係咩人？點解你會睇到佢？」
她向我的方向轉過來，視線卻一直看著我背後：「我咪叫黃炎冰囉，我無惡意架！」
我：「唔係，你唔係普通人，你散發住一種感覺，一種令人唔舒服嘅感覺，雖然唔係敵意，但你有野隱暪緊！」
炎冰：「係咩？咁依家好唔好D？」
只見她呼了一口氣，然後剛才那種不舒服的感覺消散了！她究竟是甚麼人？
我死盯著她不放，不敢回答。
小詠在背後忍不住問她：「我叫李麗詠，你頭先究竟做左D咩，同埋點解會見我。」
炎冰把視線從小詠轉向我：「哦，李麗詠，咁我叫你小詠啦。我頭先無做D咩，只係將保護我嘅術式解除左者。照道理呢個術式只會影響到非人類嘅事物，估唔到子鋒你都感覺到！」
我稍為放鬆了些：「我唔知你講乜。不過睇黎你真係無咩敵意，你究竟搵我地有咩事？」
炎冰：「無，只係頭先見到你地係公園咁樣傾計好有趣，先過黎打聲招呼者。咁我唔阻你地啦，子鋒，我覺得我地應該會再見面！下次見啦！拜拜！」
說完她便轉身走了，不知是否她把術式解除了的關係，剛剛那種冰冷的感覺消失了。看著她的背影，不知怎的，竟吸引著我的目光，久久不能離開。
「咸濕佬！！！」小詠在我一旁大叫著。
「哇，撞鬼你咩，咁大聲！唔係喎，你咪就係鬼囉！」我掩著耳朵說。
「你做咩眼甘甘咁望住人地個屁股呀，好變態呀你！」小詠用鄙視的眼神看著我。
「咩呀，我望住佢個背影Ja，咁佢真係幾靚呀嘛！不過，佢應該真係唔係普通人，感覺真係有D奇怪！」我沉思著說。
「係，佢應該唔係普通人，我覺得佢有種同天命叔差唔多嘅感覺！」小詠對我說。
「你咁講，又好似係！難怪個感覺有D熟！」我仍然沉思著，回想著炎冰的說話。
「不如咁啦，我地返去搵天命叔，話唔定佢知道D咩呢？」小詠慫恿著我。
我還在猶豫著，我實在不太想繼續踏入這個世界，畢竟我何不想再碰見小敏這種惡鬼！
「唔好諗啦，反正你都要學識點樣分人同鬼，同埋天命叔講過，你今年係大陰之年，呢種命格可以維持足足十年。你唔學返一兩招傍身，第時有事咁點算？」小詠口上這樣說，心中在想：「如果你唔學，咁我又點樣係天命叔度偷師，咁我咪有排都唔駛成仙！」
我看著她：「學唔係問題，但我唔想拜個維園阿叔為師囉！俾人知道我仲駛出黎行嘅！」
小詠開心的道：「到時去到再諗下點樣偷學囉，唔一定要拜師嘅！」
我：「你都講得岩，同埋我都有野想問佢，點解頭先個女仔同佢會散發出一種壓逼感，我明明係人黎架嘛！」
小詠在背後作勢推我前行：「係啦，快D去啦！去啦！」
我：「我唔拜師架！仲有，你以後唔好失驚無神係我個身度捐出黎！仲有……」
完