[農曆七月應節故] 校園鬼故事 - 紅衣女孩: （三十三）
「唔係你諗果個張真人！」天賜簡單的回答我。
聽了後我更加混亂！
「咩唔係果個張真人呀？我唔明喎！仲有呢兩日你去左邊？我打極都打唔到俾你？仲有……」我有一大堆的問題想知道，但突然肚子發出「咕咕咕咕」的聲音，我連說話的氣力都沒有了。
「唏，你地講咁多做乜鬼，你睇呢條友仔，餓到就黎死咁，食少少野先啦，成朝無食過野！呀，新抱仔，你幫我去廚房拎D野食出黎，廢事餓死呢個細路。」天命叔對我們吩咐著。
「世……世伯，我叫阿詩呀，呀！等我入去幫你拎野啦！」只見阿詩臉上通紅，然後害羞的跑向廚房。
「怕咩呀新抱仔，都係一句啫！」天命叔嬉皮笑臉的道。
「老豆！唔好玩啦下！」只見天賜滿臉通紅，既尷尬又帶點高興的神情，真想給他一個正拳，可惜我實在是太肚餓了。
我看了看牆上的時鐘，原來已經是早上十時，由於整間屋都被那些古人畫像和其他八卦的吊飾封閉著，害我完全忘卻了時間，我原來已經暈倒了半日。
我突然想起，我半夜跑了出去，媽媽找不到我，應該會很擔心的。
於是我想先致電給她，天賜像看穿了我的內心般：
「唔駛打啦，我今朝打左俾你媽咪，同佢講左你黎我屋企同朋友慶祝生日，我話你仲未醒，所以代你打俾佢。」
「唔該晒……好肚餓啊！」我再次無力的道。
然後我們四人一起吃早飯，阿詩仍然維持著臉紅紅的狀態，真的很可愛！而天賜這小子則把臉轉向另一邊，大慨是害羞了吧！
這時，不識趣的大叔又來破壞這種氣氛：「新抱仔你同天賜做咩坐咁開呀，坐埋D啦，唔駛怕醜喎！」
只見阿詩臉變得更紅，只懂低頭吃飯。
「老豆你咪亂up啦，搞到阿詩鬼咁尷尬！」天賜紅著臉說。
「咩亂up啫，你知老豆有呢種能力架，我一見到阿詩就知佢會係你未來老婆仔啦。想當年，我都係第一眼見到你阿媽，就知佢係我一生中的另一半。有D野係整定架！」天命叔說的頭頭是道，讓人不得不認同他。
兩人聽完後，都紅著臉，低頭沉默不語的。
「好啦，食飽啦，又到天命叔問答環節啦，有問必答，細路你有咩想問？」天命叔像個節目住持人一樣，坐在椅子上看著我。
「我叫陳子鋒，唔係咩細路！我係好多野想問你，但係天賜，我更加想知道你呢兩日發生左咩事，同埋點解會突然出現係學校？」我把視線投向天賜，希望得到答案。
「好，咁等我講返俾你地知呢兩日我做左D咩啦！」天賜開始回憶這幾天發生的事。
───────────回憶分隔線，張天賜視角───────────
那天，和子鋒分別以後，我就來到了這個道壇。
由於我父親的因由，我每星期總有一、兩天來到這裏，替他照顧他的「病人」。
我如常的替父親照顧那些病人，就在結束時，我準備先行回家，卻被他阻止了。
「衰仔，唔好走住，你留一留係度先！」
「咩事呀老豆，我仲有野做呀！」
「叫你留低就留低啦，唔好咁多野講！」
送走了所有病人後，我便準備替他收拾道壇。
「唔駛執住，衰仔你今日去邊黎？」天命叔用嚴肅的語氣詢問我。
「吓？無呀，咪一直係學校囉，放學就直接返黎啦。」我不解的問。
「無？你俾我睇下你D眼白！」沒有徵詢我的同意下，他就把我的眼皮強行向上推。
「好痛呀，搞咩呀老豆？」我馬上把父親的手撥開。
「衰仔你知唔知你俾人落左降頭呀，你眼白位置有條深黑色嘅直線！」父親緊張的對我說。
然後他就端出了一碗灰黑色的水，讓我喝了它。
過程就跟子鋒剛剛的情況差不多，只不過我沒有感到太大的痛楚，便把如指甲大小般的血塊吐了出來。
「好在發現得早，如果唔係有排搞。衰仔你做過咩黎呀？無啦啦俾人落降都有嘅？」父親緊張的問。
「吓，無做過D咩喎……」
我愈想愈奇怪，懷疑是不是跟子鋒的事情有關，所以我把事情一拼告訴父親，也可順便打探張真人的事。
父親聽完了以後，便問我有沒有吃過甚麼東西？
「早餐係屋企食，晏晝同子鋒出左街食飯。就無食過野啦，呀，上完PE堂我係小食部買左支可樂飲囉，但飲左幾啖，覺得好似有D奇怪，就無再飲啦。」
「支可樂仲係唔係度？俾我睇下！」
然後我把可樂交了給父親，他把可樂都倒在盤裏，查看了一會之後：「果然，入面混左一D材料係度！好在你飲得少，無咁快會發作！睇黎果個乜鬼堅叔真係好可疑呀！」
「吓，但我今日先聽子鋒講單野，佢咁快就知道？弊，咁子鋒咪好危險！我要通知佢！」我正準備致電給子鋒的時候，卻給父親阻止了。
「搞咩呀老豆，做咩唔俾我搵子鋒呀？」我詢問著父親。
「死蠢，你冷靜D先啦，頭先聽完你講果單野，我懷疑唔係咁簡單。頭先對你落嘅降頭，純粹係一D令你好辛苦，無辨法活動嘅降頭。我估對方唔係主力想對付你，只係想阻止你介入呢件事。我估佢黎緊會諗辨法對付你朋友，而且會用一D可以操控佢嘅降頭。如果你打俾你朋友，令佢有所戒備，咁對方可能會再用其他方式對付佢，咁到時就難搞啦！」
「吓，咁點呀？唔通由佢死咩？」我激動地說。
「可以咁講！」父親一臉嚴肅地跟我說。
「吓？！」我知道父親並不是見死不救的人，但此刻實在弄不清他在想甚麼。
「阿仔，你聽我講先，頭先你咪問過我知唔知果個張真人係乜水嘅？我可以答你，果個係我師兄，樣樣以錢為先，但佢的確有真材實料嘅！佢做果個法事，我大慨知道係咩一回事！有一樣野我覺得好奇怪，因為呢個法術的確可以維持十年，無可能無啦啦無左效，俾隻野出返黎！所以，今次推你個朋友去送死係必要嘅，睇下究竟背後究竟係咩人要咁做！我只希望唔係我想像中最壞嘅情況！」父親一臉憂心的樣子，讓我感到事態的嚴重性。
「最壞情況係咩呀？同埋無理由真係睇住我朋友死架！」
「我無話睇住佢死，只係叫你唔好通知佢者。嗱，我個計劃係咁咁咁咁，你明唔明呀？」
「老豆，你淨係講咁咁咁咁我真係唔明囉，唔該你唔好玩啦！」我無好氣的回應他。
「超，玩下都唔得。好啦，首先，聽日我會幫你請假，等對方以為已經成功阻止左你。跟住，你放學就暗中跟住你個朋友，我估佢放學嘅時候，如無意外應該中左招架啦。總之，你跟實佢就得啦，同埋，搵個機會，襯佢唔知，塞呢舊八卦吊咀俾佢，應該可以幫佢擋到一劫嘅。記住，無論你見到咩，你都千祈唔好出手！」
「但係，萬一佢真係有生命危險呢？都唔可以出手？」我依然不死心。
「照我估計，佢係學校外面應該好安全。如無意外，隻野只會係學校整死佢，所以佢極其量只會係俾人操控住，唔會有咩事！另外，我俾定D符你，我有預感你可能會用得著。」
接下來，就像你知道的，我跟阿詩通話，讓她替我幫你查出那幾個學生的事情。
然後，第二天，我一直在學校附近徘徊，在暗中監察著你。
在放學時，我看到你吃了那支雪條，原本也有衝動阻止你的，但想起父親的說話，便放棄了。
然後我本想偷偷的跟你搭同一班車，但此時我卻看見阿詩，我看見她整個人也迷迷糊糊的進了學校附近的停車場，我心裏泛起了一絲的不安感，於是便偷偷的跟著她來到停車場的頂層。
竟然看見她想從停車場跳下去，於是我衝上前阻止她，但不知怎的，就是拉她不住。
幸好我想起父親給了我的符咒，我馬上貼了在她身上，然後她便暈倒了。
待她清醒過來後，我把事情的經過告訴她，幸好阿詩沒有懷疑我，跟了我回道壇，然後情況就跟我差不多，只是由於阿詩吸收的材料比我多，所以要多些時間休養，才待在這個道壇過了一晚。
把她安頓好後，我才發現已經是傍晚了，只好待星期六再來暗中監察你。
想不到你這小子卻比我想像中還要有行動力，竟然一早便出發到圖書館，幸好我致電給你母親，才知道你去了哪裏。
看見你在圖書館睡著後，便偷偷的把八卦墜子塞到你褲袋裏。
然後，我一直跟蹤你，直至來到學校，我本想跟你一同進入學校的，但卻看到，有一個人影把校門給鎖上了。
我只好不斷尋找著有甚麼方法可以進來找你，然後當我去到後門時，便看見你給那紅衣女人抓著。
幸好我來得及時，總算是把你救走了。
───────────回憶結束，切回陳子鋒視角───────────
「事情經過就係咁啦！」天賜看著我。
我默默的思考著他的說話，然後抬頭對他說：「原來……你同阿詩唔係同居！」
然後我感到肚子吃了一拳。