[農曆七月應節故] 校園鬼故事 - 紅衣女孩: （十）

五人在確定小詠已經被綁好後，總算得到一點喘息的時間。
堅叔首先提問：「發生咩事，點解你地會搞成咁？」
 
三位同學相對而視，像是不知道怎樣交待才好。
此時男同學Ａ指著小詠：「一切都係因為佢，係佢叫我地黎呢度！」
男同學Ｂ：「係呀，係佢呀，佢都唔知係咪痴線架，叫晒我地黎呢度，開頭都仲好地地，但突然發晒癲咁，反晒白眼又係咁用指甲抓自己，我地先會壓住佢ja！仲有，佢呢期都唔知痴左邊條線，成日自己一個匿埋，跟住又失驚無神咁叫我地黎，痴線架佢！」
 
堅叔：「者係點呀？我完全唔明你地講咩喎。」
女同學Ａ：「算啦，都係等我黎講俾你地知啦！我地懷疑小詠撞左邪，因為自從上次玩完碟仙之後，佢一直都好唔妥！」
 




堅嬸：「我地都睇到，佢真係好唔妥！」
女同學Ａ：「唔係架，其實佢一開始無咁嚴重架！嗯……點講好呢？我諗我都係由碟仙之後第二日同你地講返啦！我記得第二日，小詠係請左假嘅，我就同佢兩個一齊食飯，晏晝果陣我地都有講返碟仙單野！嗯……咁……其實……」
 
堅叔聽她吞吞吐吐的，忍不住問：「咁之後點呀，你依依哦哦都唔知你講乜。」
女同學Ａ欲言又止，眼神望向其餘兩人，但他們都裝作看不見，女同學Ａ只好繼續說下去：「其實，其實當日碟仙遊戲，原本只係一個局，一個為左整蠱小詠嘅局！」
 
堅叔：「咩話！！！點解你地要咁做？」
同時堅叔心想：「咁我當日遇到嘅事，又點解釋。」
 
女同學Ａ接下來的說話，解答左堅叔心入面嘅疑惑：「我地原本諗住整蠱下小詠架ja，鬼叫佢成績咁好，平時又扮晒野咁，咪諗住教訓下佢囉。開頭都好順利架，去到小詠開始喊嘅時候，我地以為計劃成功，仲諗住推返隻碟去原位。點知，隻碟之後就跟住郁啦。果下我地都嚇親架。」




 
堅嬸：「有咩唔好玩，要拎鬼神嘅野黎玩呀，仲要諗住用黎嚇人，唉，你地真係。」
女同學Ａ：「我地知錯架啦，所以第二日返去，我同佢地傾返件事，都覺得之後要對小詠好Ｄ。咁之後星期六，日都放假，我地就諗住約小詠出黎玩，睇下佢有無事，同請佢食野補數架！點知我地由星期五夜晚開始，就一直搵佢唔到啦，打去佢屋企，佢媽媽仲問我地，小詠唔係同我地去左學校宿營咩？於是我求其作左個理由，呃左小詠媽媽就算啦。我地當時都諗緊，駛唔駛同小詠媽媽解釋或者報警架。」
 
堅叔：「咦，即係話，出事之後三日，你地都無見過小詠？甚至乎連佢媽媽都唔知佢去左邊？」
女同學Ａ：「應該就係啦。結果我地都係星期一返到黎學校，就見到小詠啦。我見到佢之後仲同佢打招呼，佢都好似無乜野架。跟住我諗住關心下佢佢，問下佢呢幾日去左邊？點知佢好似好反感咁，仲走左出課室，一直到上堂先返黎。跟住到食Lunch，我地三個仲諗住叫埋佢，但佢好似朝早咁，又唔知去左邊。」
 
堅叔用懷疑的口氣問：「吓，唔知去左邊？你地一齊上堂架喎？咁大個人都會唔見左？」
女同學Ａ：「我講真架！一到Recess同Lunch Time，我地望向佢個位，佢已經唔見左啦！」
 




堅叔雖然抱有疑問，但怪事連連，也不差這麼一件小事，於是向女同學Ａ點了點頭，表示相信，並示意女同學Ａ繼續講述事件。
 
女同學Ａ：「咁我地見搵唔到小詠，咁就去食飯啦！一直到課堂開始，先見到小詠突然出現在座位！跟住去到放學，我地諗住又去搵小詠。今次，佢唔單止無消失到，仲主動行過黎搵我地。當時唔知點解，佢行過黎果陣，我感覺一股寒意，係背部慢慢滲出黎。最後佢黎到我地面前，講左一句說話。」