[扮工中環傳] 頹務署職員篇: 第零章　原來見工可以咁HEA的

[扮工中環傳] 第零章 原來見工可以咁HEA的 


俾人話太短，寫多篇前傳，我吹到份工幾HEA幾HEA，咁額外講下要點入。 
政府工見工慢到，我3定4月申請，1月入職，生仔咁耐， 
等開飯千萬唔好，餓死未天光，做下其他工先，唔好當搵政府工係人生目標， 
你要當係入來見識，見識香港頭號HEA工，到底有幾HEA。 
等於爬富士山見識有幾高一樣，增廣見聞。 






好多人貪呢份工Working Life Balance (WLB)， 
我入職當然係因為Holiday Enjoying Attitude (HEA)， 
聽講搵工要搵鐘意做既野，如果你好似我咁，鐘意既野係偷懶，咁就報啦。 
唔知係咪我勁，全個求職過程都覺得好低能， 
面試最大建議，要講得好明自己有乜專長，一個就夠，原因下述。 


今年7萬人爭1000個位，其實唔難，幾個原因， 
因為實在太耐，好多人係唔係都年年申請，好多人到見工時，已經做緊第份。 
非正式統計，搵政府工，100%人收到面試信/OFFER信，反應都係 




「下乜我有申請過咩，唔記得左囉」。(樣本數量: 1個) 
同一年我FD入唔到，原因係「呀唔記得左報名」，建議好想入政府既入自己搵APP。 


因為唔係個個年輕人，好多母親級，養到仔大想做返野，十年無做過野， 
好多同社會脫節既人爭，貪佢唔太睇工作經驗，比起出面工真係好唔睇，面試無問。 
總之申請既人千奇百趣，重點係佢地電腦好廢，你正常人又識用電腦就贏一半。 
例子係打字測試果陣，佢俾5分鐘時間，我1分鐘就打完，但見到好多人打唔完。 






好多人打字都唔識，你識打字，識WORD EXCEL，就好威， 
如果你係年輕人，未讀完書，教你點準備將來做呢份工， 
就係打多D機，多用電腦，多打字吹水，識WORD EXCEL，習慣HEA，夠。 
講緊入面做緊既人，平均年齡40c9，你識WORD拉闊個margin，已經好威。 
如果你年輕，返緊文職，無乜前途，每年報啦。 


政府工申請流程: CRE、基本法、申請、交證書、電腦試、面試、等寂寞到夜深。 
我有考CRE，係好野來，我覺得搵工有筆試公平好多， 
起碼唔駛被以貌取人，例如我本身太靚仔，成日招人妒忌唔請我。 
我有考CRE，有拎晒中英2級，難度低過會考好多， 
你當係一個筍野，可以易過會考好多，又拎到同等資格。 
背基本法唔好以為辛苦，要背既其實，係目錄架咋，我就是成功的例子。






份工最最最難果關，就係準備學歷工作證明證書，要有正本，工作經驗要有證明， 
少條毛都唔得，我履歷表有二份一，係因為俾唔夠資料，索性成件事刪左去算。 
好記得要去補交資料，去到係人山人海，心諗見呢份工既，包括我， 
好多人都係準備文件都未搞得掂既level。我入到，你唔好理。 


去到面試，面試我覺得表現好差，但個面試本身都好HEA，我發揮到專長。 
佢首先睇你英文，俾篇文你，照住讀，完全照住讀完全唔駛用腦... 考我係咪啞。 
然後自介，下一段講，然後問我兩三條問題，先係時事題， 
問題一，「你知唔知政府近期既膠袋徵費計劃呀」 
我當時淨知4月1，其他幾乎都唔知，我懷疑呢題只係， 
佢睇你夠唔夠八，因為入職後同八婆相處，傾八掛野，係必要技能。 
問題二，「你知唔知，我地呢份工，職位有九大範疇呀，係邊九大呀？」 
面試果陣，完完全全，唔知。其實而家都唔知。 
照答左唔知，然後佢介紹邊九大，我就認C認P，應下話我適合邊類。咁我都入到。 






面試最最重要，就係好明確咁講自己有乜勁， 
我自我介紹，就好明確堅定咁講，我電腦好勁 (語氣好D)， 
而入職做左N個月之後，上上上司同返我講，當時有人問佢要咩人， 
上上上司話「總之要電腦勁既」，結果就揀我入去。 
見工既人係完全唔關份工事，佢地只係好機械式做matching， 
「哦你話你電腦勁，呀呢個位主管係話要個電腦勁，咁你入去」，所以要強調勁乜。 
上上上司，係你疏忽，你唔記得講，要個勤力。(奸笑emoji)