[扮工中環傳] 頹務署職員篇: 第三章　同事三倍HEA

[扮工中環傳] 第三章　同事三倍HEA

點解每個做政府工都話自己好忙，呢個問題，入職後終於有答案。
因為，身邊其他同事，睇落都HEA到爆炸，
自己每日最多HEA兩個鐘，附近同事HEA六個鐘，
梗係會覺得自己好忙。


呢個職場係女多男少，不過多數40歲以上，爭在未跳廣場舞。
附近一半同事都係母親級，間中就大聲傾閒計，有講有笑，我無謂加入啦，




但係完全無睇都知道晒「太淫的後裔」講乜。
上午大家都做野，下午就有傾計，有開餐，有織冷衫，
仲每月都總有人周圍派手信，成日開餐，
每個月都總有人去旅行，好過份。


呢層係有兩三個年輕女同事，其中一個同我同期入職，
已經唔係HEA唔HEA既問題，佢連職位都無。
佢單獨坐係一大間文件房，係臨時俾佢坐，截稿前臨左半年佢都仲臨緊。
佢實在太得閒，有時去搵佢R水吹，問佢工作係做咩，佢話「咩都要做下」，




聽得明HEA星話既我，一聽就知係「無咩野好做」。


呢種似乎叫孤魂野鬼，係當初唔知點解請突左一個人，
請返來出住糧先，等有職位空缺再俾你正式埋位做野。
我以為我抽到好HEA上籤，人地直頭係HEA神個神位，
其實有一位上司會負責俾野佢做，但佢上司平時坐另一層樓... 公平咩


扮工天註定，忙HEA命生成，恨唔到咁多。




「【最強扮工王】射波射到六年冇返過公司 冇人發現糧照出」
呢個我偶像，我有SAVE低呢篇報導，得閒或者忙既時候，就睇一睇勉勵自己。


偏偏全層樓最勤力果個，係我上司。
我上司係全層樓最古板最正經果個，(後來得知) 連上上司都怕左佢，
我自己玩手機5分鐘左右，就會叫我做野，
佢會話「大把野學呀，你有時間就睇晒本說明書，同睇下過往做野既FILE啦。」
仲試過我lunch訓突左，比佢用萬字夾丟我，提示要我夠鐘起身啦。


明明隔離TEAM同事，全個下午都一路玩緊手機，但我就無得玩，
我層樓D人都叫做會扮下工，或者真係多野做，
試過要幫手搬野上另一層樓，全層樓所有人，清一色全部都玩緊手機... 公平咩
我要返工三個月後，漸漸捉到扮工竅門，先漸漸有得玩下手機，




其他做左幾十年既同事，HEA功練到成仙。


不過，呢位勤力上司都會呻「我地呢TEAM係特別多野做架」
「其他TEAM同事得閒好多架」唔知係咪勉勵我要勤力做野。唔駛旨意。
上司仲講左樣野好震撼，佢做左好多年，舊制，已經儲到每年40日年假。


年假40日呀，係四十呀，得閒到拍番套「年假40」都仲得呀，
我調番轉十四咋，以前返工仲試過7日年假添呀。
佢年假多到幾乎可以每周四天工作... 公平咩
政府年假最多儲兩年，佢話年假多到放極都放唔晒，年假平時都就爆就爆。
聽住佢咁講，我都就爆就爆，爆炸個爆。
唔怪得佢咁勤力，保住份40日年假HEA工丫嘛。






吹下水又夠鐘收工。BGM響起「HEA回家」主題曲︰
「在世間 返工等放 有一種HEA
從六歲到八十也不更改
任我飛東京首爾前望巴黎
年病假 去旅行可一可再」

#得閒兼記得會作埋全首