《我獲得一個願望，我選擇左係學校做一次男神》: 第一章：願望？
「喂，白痴明，放飯啦，今日食咩？」叫我嘅係男班長，身高165，帶住副四方眼鏡，平頭裝，成個超級無敵大傻仔咁嘅樣，但係成績唔錯，最弊嘅係個樣，好似我咁毒，唔係嘅話，點會同我傾計。
「唔食住啊，唔得閒啊。」我係到諗緊野，條友係到煩我，真係見係佢先唔打佢。
「啊！白痴你唔同我食飯？唔通你約左第二個？！」我真係想罵爆佢，搞到成班嘅目光都注視係我地到，搞到我地好似gay咁，你唔好講到我拋棄你咁啦，我女神都係到架，你而家即係落我面啫。
「唉，見你係兄弟先同你講，嗱，穎心係到，你唔好亂講野，唔係嘅話我一野打爆你副眼鏡。」呢條友，一無左副眼鏡真係乜都睇唔到，試過我玩佢，收埋佢副眼鏡，點知條傻仔周圍摸，仲要摸到清潔姐姐，最後比人罵左一鑊。
「我諗住同佢表白。」
「咩話，你諗住...」我即刻禁住佢把口。
「喂，大哥成，我洗唔洗比支咪你講啊？」我真係比佢激死。
「即係大佬你以後都唔同我地食飯...？」真係頂佢唔順，擺個可憐樣出黎，以為自己好可愛，搞到我而家飯都無胃口食。
係班房門口慢慢行緊入黎嘅係我另一個老死，叫阿峰，成績都唔錯，但係同異性交際就死得，好似死機咁，不過都係毒毒地，鍾意埋個啲咩初音，動漫，不過個樣唔差，執執個樣，都仲溝到個肥妹嘅。唉，不過就係因為咁，我地呢班毒男先會群埋一齊。
「咦，你地做咩仲唔食飯？」阿峰問我地。
「你知唔知啊，佢諗住同穎心表白啊。」你個大喇叭，明知阿峰都鍾意穎心，係都要講出聲。
見到阿峰佢臉色有變，我即刻轉話題。
「阿男班長啊，等陣上英文堂，做左功課未。」
家成即刻衝返去個位到，攞本野出黎做。
「係呢，你真係要同穎心表白？」阿峰好認真咁問到我，呢個樣係佢睇緊動漫先會顯露出黎，估唔到對住我都會咁認真。
「嗯...」搞到我都驚驚地。
「你準備左啲咩同人表白？」佢再次顯露佢睇動漫個樣出黎，救命啊，揾人趕走佢啊。
「無啊，朱...古力咁囉。」死啦，我又表現返我毒男本色，等陣點同穎心表白啊。
「祝你成功。」佢托一托無形嘅眼鏡，就咁走左去，好似仲搞到我有啲不安。
係打鐘前十五分鐘，等待穎心去廁所嘅時候，拉佢上天台表白。
「穎心，借１０分鐘黎！」我即刻捉住佢隻手，拉佢上天台。
「喂，救命啊，你個變態佬帶我去邊啊！」好彩已經上左樓梯，完全無人聽到佢大叫。
上到天台，終於可以冷靜落黎，見到穎心喘氣個樣，白裡透紅，真係好可愛。
「你...你做咩帶我上黎，信唔信我報警！」佢始終無放下戒心，睇黎佢唔係幾鍾意毒男。
「你冷靜啲先，我有野要同你講，認真嘅。」
「同我？」穎心露出疑惑嘅樣。
「其實...我鍾意左你...」我攞左合朱古力出黎，頭耷耷咁，雙手遞出。
當我想望返上去嘅時候，我已經無晒知覺，正係見到好刺眼嘅白光，同埋有把老牛聲同我講野，唔係下話，我女神竟然變左老牛聲？！
「老你個頭，我仲好後生，今年都係得二千幾歲。嗱，咁都比你遇到我，真係你幾生修到嘅福氣。」二千幾歲都後生？雖然見唔到樣，但係聽佢講幾句野都好似就黎死咁。雖然我有意識，但係無知覺，又睇唔到野，講唔到野，唉，咩野噩夢黎架。
「比你見到我，就要比個願望你，當係中秋節禮物啦。」
心諗，中秋禮物係一個願望？大佬，我咩都唔要啊，我正係想返去正常世界咋。
為左返出去，我求其滿足佢話：「比我係學校做一次男神啦！」
「白志明，恭喜你。」校長無端端咁樣同我講，我打左個凸，再望下隔離，我企左係禮堂上面，應該係暑假前個啲咩頒獎禮。我睇下個獎，咩話年度最佳學生，中四級最佳成績，足球學界最有價值球員等等，我返埋位個陣，成十個獎擺係到，我由上台到落台都係擘大個口。
重點係，點解我上台攞獎一啲都唔驚，我呢個毒男就係最怕上台，影相個陣仲要好好笑容，究竟我發生咩事啊！
我同班主任講話去個廁所，我兩個老死都話一齊去，我即刻行快啲，諗住問佢地我點解會變成咁。但係事實並唔係咁，佢地反而仲行得快啲，佢地嘅行為同眼神，完全係想避開我。
出到禮堂門口，我叫停佢地兩個。「喂，等埋啦。」
我叫完佢地先肯行慢啲，跟住好快咁同我講左聲入廁所先講。
「白痴明，唔洗講野住，等我地講完，你就唔會有野再想問。」
「好。」
「明仔，仲記唔記得你話要同穎心表白。」
我點頭示意。
「穎心話你暈左，跟住就比返老師處理。」
「就係咁？」
佢地兩個一齊搖頭，嘆氣。
「係你表白之後個日，你唔同晒，到而家只係隔左３日，你就變左學校嘅男神。」
「咩話？！」唔係下話，個阿伯原來講真，亦都唔係我發夢，今次真係...
「當你變左男神之後，啲同學排斥我同男班長，話我地靠你上位，想借你黎溝女，所以頭先我地先唔同你行埋一齊。」
「我知你仲有好多野想知，但係時間有限，佢地會有懷疑，放學老地方見，但係要小心。」要小心？唔，令人費解。
為左避開嫌疑，我地前後腳走，係廁所嘅我，望住塊鏡，見到自己同之前完全唔同晒，成個陽光少年咁，大隻左，高過以前好多，仲無晒啲暗瘡，連我自己都覺得吸引嘅係我GEL左個頭，估唔到，我真係變左男神。
「返黎啦？」原來坐我隔離個個係穎心，仲要笑笑口同我傾計，唔通表白成功？無理由啊，表白都未表完就暈左啦，點會得呢，都係小心啲好。
「係啊。」原來我對自己副身體都幾有自信，比左個燦爛嘅笑容穎心，但係周圍全部都係敵視嘅眼光，不論男女都有，唯有坐最後排嘅男班長同阿峰都係耷 低頭，睇黎佢對呢件事感到好困擾，真係難為左我兩個巴打。
「各位同學，散學禮完結啦，大家盡情享受暑假啦。」我一企起身，差唔多全校嘅人都望住我，我再次顯露出我嘅招牌笑容。明明呢個唔係我，明明從前我係毒男，平時傾計都唔敢望住人，反而而家係咁比人有羨慕嘅眼光望住，都唔覺得怕羞。
「你今日得唔得閒啊？」穎心都有佢招牌嘅眼光，叫人無法忍心拒絕，水汪汪嘅眼睛；但係今日我約左個倆條友先。唉，「嗯...我諗我今日陪唔到你啦。」最後都係忍心拒絕，我頭也不回，費事見到佢唔開心個樣啦。
去到學校天台，見到佢地兩個望住出面，好似想跳落去咁。
「喂，你兩個唔係灰到要跳樓下話。」
「你諗住點處理呢件事。」
「我覺得幾好啊，做男神喎，比著係你，你都會做啦，何況都改變唔到啦。」我咁樣講好似有啲賤，不過事實擺在眼前，做男神真係好爽。
「但係你有無諗過我地兩個嘅感受。」呢一刻，我個心酸左一酸，良心好似係到收縮咁；當我想答佢地嘅時候，佢地已經離我而去。
唉，兩個最好嘅巴打就咁嬲左我，應該好快無事嘅，況且我而家係男神，朋友圈都有幾十個啦。
等我試下去識下啲同學先。
唉，兩個最好嘅巴打走左，我又無理到穎心女神，唯有自己無無聊聊係條街到行下啦，難得而家裝備齊全，可能隨時識到女仔。
「咦，白痴明，咁啱嘅？」
「係囉，咁啱嘅，軒哥。」呢個軒哥從我中一開始已經排斥我，永遠都係帶頭個個，打我亦都係最落力個個。
「估唔到，今年比你攞埋我個學界最有價值球員。」我開始感覺到不安，佢對我嘅敵意亦開始增加。
「下年，你唔會咁容易。」佢篤住我心口講。
「係咁。」
「哦，Bye。」如果我唔係帶住男神身份嘅話，一早打左佢幾鑊，呢啲人侍住自己蛤蛤霸霸，有幾個跟班，家底唔錯咁，就係到胡作非為，真係好黑人憎。
「提你多一句，穎心係我嘅，閒雜人等，唔好諗住掂佢一條頭髮。」
佢咁樣一講，真係扯起我心中團火，點知遠處見到男班長同阿峰，佢地都感覺到有唔妥，就過左黎。
「喂，你做咩無端端同佢嘈。」阿峰係我耳邊問我。
「對唔住啊，軒哥，佢亂咁講野的罪你，你大人有大量，原諒佢啦。」男班長低聲下氣咁同個個阿軒講。
「唔洗，我係絕對唔會同佢講對唔住，我根本無錯，錯嘅係佢。」
「搶人野都無錯？好，你記住今日講過嘅野！我地走」佢同佢班跟班都掉頭走左。
「喂，你都唔好侍住自己係男神，就挑人機先得架。」阿峰虎口婆心咁同我講。
「我而家好亂啊，你哋得唔得閒，上黎我屋企。」
男班長同阿峰都點頭。
上到去，攞左幾支啤酒出黎，希望可以借酒消愁。
「今日下晝講野係衰左啲，係我唔著啦，飲左佢，咩事都無，得唔得先。」我放低男神嘅身段，希望能夠以從前嘅毒男身份同佢地傾計。
「聽住，我地上黎，已經代表原諒左你，而家我想你繼續聽我地講。」
「好。」
「個日之後，你落左病房，然後就早退左。」
「但係點解，到返上台頒獎先有返知覺？同埋我變左做男神之後，佢地都覺得無野好正常，係唯獨你兩個知道我以前係毒嘅白痴。」
「你唔知，我地點會知喎...不過，可能係因為我地同你係巴打先係咁，佢地唔熟你，咪覺得唔出奇囉。」
但係心諗，學校無端端多左個男神，點會唔怪呢，肯定係個個「後生阿伯」搞事。
「但係我同男班長都見到你呢三日好古怪，完全唔似你。」
「咁我呢三日做左啲咩？」
「唉，你真係成個男神咁款，得戚到不得力，又同女出街，踢學界個陣，射入球三十幾碼嘅罰球，絕殺人哋。」見到佢地仍然係以前咁嘅樣，而我就變左散發光芒嘅男神，心裏面都唔係幾好意思。
我搭住佢地兩個嘅膊頭，同佢地講：「記住，就算我白志明點樣變都好，我發誓，我對你地兩個嘅友情係永遠堅定。」
「巴打們，飲杯！」
「飲杯！」
穎心給你傳來信息。
「今日做咩唔同我放學，我而家好唔開心。」仲要比個扁嘴嘅表情符號我，搞到我心都軟埋，但係同時有把聲出現左，「穎心係我嘅野，閒雜人等，唔好諗住掂佢一條頭髮。」
我先唔會驚佢，我回覆返穎心：「今晚請你食飯賠罪好無？」比左個心心表情符號佢，估唔到男神就係可以咁樣任意妄為。