《我獲得一個願望，我選擇左係學校做一次男神》: 第五十一章：冰倫？

「咦？返黎啦，身體無恙嗎？」佢講野真係好無禮貌，永遠唔肯望住人講野，而只係望住部macbook。

「好返啦，多謝你啦，上次幫我叫白車。」

「我欠你一個人情。」

「嘻嘻，唔洗客氣，助人為快樂之本。」

「係呢，你讀咩架？」





「我讀心理學。」

我吞左啖口水，望住佢，我好似赤裸係佢面前咁。

「做咩個樣青晒，又唔舒服？」佢終於肯望過黎，我亦終於見到佢個樣。

我以為自己見到明星，佢個樣一啲都無毒，好清新既感覺，而且仲係周柏豪個頭，無違和感，五官端正，輪廓分明，只係身材瘦削左少少。

「唔係，話時話，我都未知你叫咩名添。





「我叫冰倫。」冰倫，好有打機名感覺。

「我叫阿明。」佢企左起身，雖然瘦，但係都有180高。

「聽講你有個幾靚個女朋友喎。」咁講係咩意思，我完全猜唔透。

「你指送我去醫院個個女仔，佢唔係我女朋友。」

「下？竟然唔係？」喂，洗唔洗咁大反應，唔係咪唔係囉，得罪你咩。





「唔係啊，不過我追過佢，只係佢拒絕左我啫。」

「嘻。」有咩咁好笑...而且好奸，呢個冰倫唔係鍾意左芊雪下話。

「唔講住啦，我未沖涼，聽日再傾啦。」

我相信眼前既就係奇怪既資優生，無人能夠明白佢地諗緊啲咩，好恐怖。




「阿明。」點解呢個人會黎探我...

「你黎做咩。」其實我對佢都有半分忌諱，覺得呢個人好恐怖。





「我黎講對唔住。」

「你要講對唔住唔係同我講，你去同芊雪講。」

「其實我唔想架。」有邊個做錯事之後話自己想？

「我近阿軒身，係因為我要逮捕佢。」咩話？

「咩逮捕？」

「其實我係警察，我要捉阿軒，因為佢係黑白兩道既大佬。」算啦，我無興趣知，你估拍電視劇咩，白痴。

「得啦得啦，你話咩就咩啦。」

「嗱。」就算佢攞左個警員證出黎又點，我都可以影印一張啦。





「你真係唔信？」
「哇，大佬，你之前做啲咁既野，都好難叫人信你係差人喎。」

「咁而家你信唔信。」

「ok，你贏。」佢係醫院攞把手槍出黎，除非佢即刻殺左我，但係佢無，我亦開始相信成件事。

「咁你想我點。」

「我無諗過要你幫手，你只係普通平民，無謂搞到你，而我真係真心向你道歉。」

「我唔明點解你要咁對芊雪。」

「為左入戲，我都係逼不得已。」佢講完呢句，我好想打落佢到，差人係咪大晒，連感情都可以玩？





「入戲？入戲就要搞女仔，你咩邏輯。」

「總之，我要阿軒相信我同佢係同一類人。」

「好，咁你之後唔好再揾芊雪，唔係既話，我實投訴你。」

「無問題，有咩事可以揾我，呢到係我既卡片。」

「我地有緣再見，希望唔會再麻煩到你。」




無端端呢個賤人會係差人，仲話要捉阿軒，真係十萬個祈求唔好拖我落水，更加唔好拖芊雪落水，我又唔知幾耐命，而芊雪更加受唔起傷害，不過原來我咁講，我先知我無能力保護芊雪...








過左咁耐，終於可以返屋企，家裡面一片靜寂，有啲恐怖。

雖然有hall住，但係逢星期六都會返去住，希望同屋企人食飯，傾下計。

「點啊，明仔，返到屋企感覺點？」攞住份報紙同我講野既係我老豆，我真係好憎人同人講野唔望住人。

「都係咁啦。」其實到到二十歲，開始真係無晒細路哥個種稚氣，無論心裡面幾興奮，幾高興都好，都唔會盡情抒發出黎，因為你覺得個樣野好無聊，唔符合你既年紀，只能夠講人越大，只會越無情...

「有人寄左封信比你，都成個月前架啦，你而家睇啦。」成個月前你而家先比我，真係搞笑。




明：

記唔記得我？我係英國生活得唔錯啊，可惜既就係我同阿樂分左手，唔緊要，皇天不負有心人，比左個更好既女仔我，佢叫Natalie，心地好，人靚，根本就係完美。不過唔知你點呢？聽男班長講你入左院，都幾大件事喎，希望你快啲好返，過黎英國同我睇波啦。

最後一件事，我好似係英國見到穎心，但係我唔肯定，因為當時佢係車上面，只係飛快係我面前經過，所以我都確定唔到，如果有咩消息，我再通知你啦。

p.s.一定要快啲好返啊，英超就黎有車仔對曼聯！！！

哈，真係傻，我無識錯呢個巴打，無論人幾遠，我都感覺到個份情意，多謝你為我付出咁多，更加要同阿樂分手，都係我一手造成，如果真係有緣過到英國，我會親口講聲對唔住。