《我獲得一個願望，我選擇左係學校做一次男神》: 第三十四章：結合

當我諗緊同晨曦點樣繼續落去既時候，晨曦再次入左黎我間病房。

繼上次食完飯之後，當佢每日黎幫我做例行檢查，我都同佢傾計，互相認識，其實佢對我係認真既。

「阿明啊，知唔知點解個陣我會話我係你女朋友啊？」其實我一直都無認真問過佢，而家佢既然肯答我咁就最好啦。

「你講啦。」

「我個時失戀啊...」失戀就揾我黎搞非？





「你聽埋我講先啦。」

「好。」

「我認識左個負心漢，佢好有錢，亦都好愛錫我，當然佢係醫院病人先識到佢，但係佢大我二十年。」二十年？做你阿爸都得喎。

「係，佢既年紀真係可以做我阿爸都得，但係我相信愛情係不分年齡。」嗯，無錯啊。

「有錢人永遠都覺得自己唔足夠，即使佢生意賺錢，有左我佢都鍾意去尋歡。」





「而我就只係負責幫佢係醫院解悶既一個。你問我點解會鍾意佢，可能真係鍾意佢啲錢掛，又或者佢同我幾啱傾，我有心事佢都肯同我傾，對我好好，真係好似當我係親生女咁。」

「或者佢真係當你親身女姐。恕我愚昧咁講，佢係咪成日婦口婆心，提你個樣，提你呢樣？」

「係啊。」

「咁佢係咪成日比錢你？」

「係...」





「佢對女呢樣野有情意結。」

「下？」其實我咁講，都估估下，可能唔係，但係亦都有可能係。

「其實我都係估下架咋，一個四十幾歲既男人，會鍾意一個二十幾歲既令妹，佢講啲野咁似老豆會講既野，成日咁囉嗦，又肯比錢你，即係好似比個女家用咁，佢都只係當你係代替品。」

「不過，點都好，件事都過左啦，我估你都唔會真係鍾意個老豆下話。」

「咁你都幫我講晒啦，我仲可以講咩。」晨曦挨左落我膊頭上面，我都攬住晨曦條腰。

「其實你知唔知失戀最好既治療方法係咩？」

「係咩？」

「係再拍拖。」





我公主抱起晨曦，將佢放係窗邊既梳發上面，晨曦都好乖，無抗拒，但就怕羞到面紅。

「做咩抱我過黎。」當晨曦想起身既時候，我輕輕捉住佢隻手，錫落晨曦到；好軟，仲搞到我神魂顛倒，我想每一分，每一秒都係錫住晨曦。

「喂啊，錫咁耐架。」佢都輕輕力推開我，然後自己起返身。

「唔得架咩，做我女朋友係要比我錫架啦。」

「邊個話做你女朋友，哼。」愛情就係搞到人傻傻下，懵懵下。

「唔知邊個話佢自己係我女朋友先呢？」

「咩喎，個陣時講下笑咋嘛。」





「好囉講笑阿嘛。」我鬆開晨曦隻手，其實只係扮嬲佢。

「喂啊，咁真係做你女朋友囉，得未...」見佢怕怕地羞咁講，真係得意。

「你話架。」我唔比晨曦講野，再次壓落佢身上，在病房裡面熱吻一翻。




「真係好好聽。」光仔企係鋼琴隔黎環抱住我，我今日著左一條長裙同恤衫，已經感覺到光仔既肌肉頂住我，搞到我唔知點好。

「攬住我。你覺唔覺得我地好襯。」光仔係我耳邊輕聲。

「嗯，覺。」我同樣係光仔耳邊講，仲特登噴啲熱氣比佢，希望刺激下佢。





「我想你做我女朋友，可唔可以。」

「你覺得呢？」其實我都好想試下拍拖，阿明已經無機會，阿軒就神神化化，唔知想點，既然咁大塊鮮肉擺係面前，拒絕左，就可能再無機會。

「我覺得我地咁襯，唔做情侶，簡直係浪費，雪雪。」我暈啦，竟然有人叫我雪雪，而且叫得咁好聽，我好興奮啊！

「我都好鍾意你，光仔。」其實我仲未知道光仔全名係咩喎。

「係呢，你全名係咩啊？」

「我啊？叫龍濯光，都係叫返我光仔啦。」

我地一直無放手，我都用雙手攬住光仔條頸，感覺上，好似攬緊阿明...








「唉，天皇，佢地咁搞，唔係辦法。」

「選擇係佢地自己到，我地都唔可以插手落去凡間。」

「但係我真係唔忍心見到阿明同芊雪搞成咁。」

「有啲野，係佢既就係佢，唔係既點逼都無用。」

「你唔係話過半年內追唔到芊雪就要拆散阿峰同阿樂架咩？你同阿明講，威脅佢提早追返芊雪囉。」

「又係喎，不過你又話唔好逼既？」

「衰仔！串我？！」

「小子不敢，咁我去做我該做既事先啦。」

「告辭。」