《90後銀行小妹甩轆記》: 《Role Play》

小時候，最喜歡玩的遊戲是角色扮演；工作後，最討厭做的事是Role Play。 

在分行的角色扮演，你注定只能扮演一種角色——Sales。明明我已經是一名Sales，如何再扮演我自己？很矛盾，很諷刺吧？ 

「Bella，最近啲數麻麻地，我覺得要再加強下啲selling skills，你等陣入我房Role Play。」噢！輪到老闆翻我牌子了，好激動！他願意用咁高時薪去訓練我，當然要謝主隆恩。 我趕快溫習一下文件，之後戰戰兢兢走進了老闆房。 

「嗱，你當我係街客得㗎啦。」 

「哦...咁個客係男定女？幾多歲到？」望著老闆，我真的幻想不到。 





「你當同我咁上下喇，可以開始未？」老闆開始不耐煩。 

老闆之後問了許多一般客戶不會問的刁鑽問題，問得我啞口無言。由於Role Play過程歷時近兩小時，內容均是objection handling，為免獻醜，小妹都是不詳述了，直接跳去賽後檢討吧！ 

「你覺得頭先自己做成點？」

 「我...我覺得答得唔夠好，說服唔到個客。」 

「點解一定要答晒個客問題？點解要成日比個客lead住？佢左問一句，你右答一句，你套武功就比佢整亂晒。記住，宜家你先係專業，你要有層次地lead返個客。有啲問題，可以同佢講遲下再講解，千其唔好比佢做主導，understand?」我點點頭。





 「你仲有無嘢想問？」 

「呃...頭先你話個plan回報仲低過定期，我覺得好啱，唔識答，可以點答得好啲？」 

「你連自己都唔buy個plan，你點樣去說服人地？」 我耷低頭，默不作聲。 

「你返去諗十個原因，點解我要買呢個plan。聽日話我知。」 

時間很難熬，到了第二日。 





「知道你有返去做功課，好比心機。不過，你知唔知自己最大問題喺邊？」 

「？」我一臉茫然。 

「你對「錢」無一種強烈渴望。」 

我瞪大雙眼，從來沒有聽過有人這樣評論我。 

「你無呢種渴望，你永遠唔會係一個Top Sales。」 

我默默地走出老闆房間，回到座位拿出準備好的信封。但，不出三秒又放回抽屜。 

沒錯，我對錢沒有強烈的渴望，卻不是完全沒有需求，我需要工作，我需要賺錢生存。

也許，人生有許多角色要扮演，而我這一刻，只需演好Sales這個角色。 





Role Play，其實每刻也在進行。