《執劍》: 第一百四十五章－－敲響洪鐘（八）
第一百四十五章－－敲響洪鐘（八）
「但丁大人，你唔怕佢地知道我地會係呢道進行宣佈，而設下埋伏？」站在但丁身旁，穿著低胸緊身衣，盡現雄偉亂溝的慾帶著絲絲嫵媚說著。
「如果佢地係道埋伏，依今日既廣播範圍，反而會種下更恐怖既種子，與其如此，世界政府一定會先比我地現身，再進行插贓嫁禍，令民心依歸；況且，如果世界政府肯現身，或者佢地更加可以將勢力正正式式擴大，正正式式入侵門者界。」但丁雙眼深遠地望著前方的史丹福橋球場。「我地可以做到既，就係首先令最多平民可以親眼見證我地，將政府欺騙人民既論點狠狠地植入佢地腦海，令佢地以後都會先入為主，無論政府講咩，都會質疑，就係我地今次既目的。」
慾雖然對但丁敬愛不已，可是知道這次再不可以當作兒戲，而且危險重重，她的心態亦變得凝重起來。
二人感受著周圍的一切，似乎連一個門者也沒有在附近，不過的確有不少巡邏隊人員在旁巡邏，但二人是誰？但丁是一名可與傳說所媲美的高階三門者，而慾則是和世上最強的九人同等的中階三門者，數十個防暴警察，又算是什麼？要對付他們兩個，至少也要出動數隊配備重型裝備的軍隊，更是要抱著必死的決心。
「咁多位球迷，相信今日，二零零五年二月一日，呢一個大日子無人會忘記！呢一場簡直可以話係一場足球界既國際盛事，你點睇呀？」其中一名黑髮戴頭鏡的男主持問道。
「呢層就當然啦，就連係世界唔同各地都直播呢一場賽事，呢場車路士主場，對住作客既曼聯，兩隊都陣容鼎盛，星光爍爍。簡直係有今生，無來世呀！」
「事不宜遲啦，睇到兩隊既球員已經慢慢行入史丹福橋球場。今日風和日麗，紅鬥藍，真係好睇到不得了啦。」
「當然啦，今日成個球場都爆滿呀，嘩，大拿拿四萬幾人呀，計埋睇緊轉播既，應該唔止十五萬人。嘩！睇呢場波就興奮過食興奮劑。」另一名光頭，略胖的男主持興奮地說著。
「見到泰利同基斯坦奴今日又可以鬥法，兩個人眼中都好有鬥志咁喎。」
「岩呀！打波要有火，講波都要有火呀！」
「哈哈哈，講得好。」
兩名男主持的說說笑笑讓氣氛變得更加高漲，更加歡樂，然而這場足球大戰的觀眾卻是熱情橫溢，更有人互相揮動紅色和藍色的大旗，耀武揚威，使雙方戰意更旺。
「球賽正式開始啦！一開始雙方已經互有攻守，賽事十分激烈，可惜呀，基斯坦奴岩岩果下真係超級大傻仔，你估你真係識自動導航咩？你點睇呀？」
「哈哈，其實咪話我話，只要你射得中，咁你就有機會入啦。不過車仔都唔弱，正所謂呀，有泰利，太有利。」
「咦，做乜突然有一男一女企係球場中間既呢？個女人仲要好靚女添喎！」男主持突然從枱下的櫃抽出一個望遠鏡。「嘩，好好波呀！呀，各位觀眾，呀，我指既係岩岩果球。」
一男一女原來從看台一跳，便越過所有守衛，跳到球場的中間。由於事態突然，場地的警衛亦全數衝進場，深怕這一男一女會對所有球員做成任何傷害，而且，所有鏡頭都紛紛對著他們，當然，大多的鏡頭更對著那個身材火辣的女人。
「各位，我叫做但丁，而佢，叫做慾，我地，係世界既通，緝，犯。」這一叫，竟讓全場的人都感到驚訝，因為他並沒有使用任何擴音器卻令全場的所有人都聽得清清楚楚，這不尋常的情況，更讓所有傳媒都爭相報道。
而且，當但丁說出他們是世界的通緝犯後，更讓所有人留意著，所有警衛也拿出手槍對峙，所有球員則在此時馬上離開。「舉起雙手！舉起雙手！」此時的球迷更是回復平常的球迷狀態，幾乎想跳進球場之中，往他們兩個臉上揍上一拳發洩。
「嘩，突然出現既兩個人竟然話自己係世界既通緝犯，咁誇張，喂，你點睇呀？」
「唔駛問阿桂……即係唔駛問我啦。睇下警察點做先啦，呢一場賽事好有可能要腰斬，四萬幾個球迷都開始有少少鼓譟啦，咦？又突然間全部人都靜左既？嘩！做咩事呀？」
但丁眼見全場的人都開始感到煩躁，便釋放自身的殺意，然後一拳打在地上，一半的球場都被破壞掉，讓人知道他們並非常人。光是那股如龍捲風般強大，冰冷的殺意，已令全個球場的人都不敢亂動，即使那些拿著槍械的警衛也像看著死神般，由於與但丁太接近，全身竟然顫抖，甚至有人幾乎連鎗也握不穩。「我地係門者，即係一班擁有特別能力既人，不過你地永遠都唔會知道，因為門者呢兩個字，一直都比一個叫做世界政府既組織係背後完全封鎖，一直對我地作出唔同程度既監控。我地同你地一樣，都係人，大家一樣有血有淚，大家一樣有喜怒哀樂，大家一樣渴望自由，但係就係因為世界政府係背後操控所有國家，用武力、軍事、科技等鎮壓門者！」說到此時，但丁逐漸減低自身的殺意，而他激昂的情緒像擦亮了一支火柴後，燃起了整個草原般，令在場的觀眾、警衛、傳媒都為他們而感到同情，感到可憐，感到可惜。
此時，美艷動人而身材惹火的慾就以一股較為柔和的嫵媚之息湧向全場，更令在場的人對他們兩個聲稱爭取自由的男女產生好感，當然，球場之中大多都是男性，嫵媚之息的功效更加顯著。「我地今日黎，就係為左要令門者真正覺醒！就係為左要令所有既人民真正覺醒！或者，宜家世界政府睇到呢一段直播之後，已經落左唔同既軍事命令，為左追殺我地，為左扼殺自由。不過，呢個世界既不公不義令我地感到唔可以再容忍！每日，都有人死於飢餓；每日，都有門者被捉去研究！每人既言語，都受到唔同既監控，原先人所享有既自由被一點一點咁撕走！唔通你地又感覺唔到？」慾甜美而勾魂的聲音，更是與但丁雄厚的聲音作出一個大大的對比，深深刺進在場人的心深處，即使是那些透過網絡或電視直播聆聽的人民，心中也像被塊重石壓實。
「我地門者既存在，就係證明世界政府一直以黎都對全世界既市民作出隱瞞，又或者，門者既存在只係冰山一角，我地已經分唔清楚被世界政府所操控既國家，到底仲有幾多，仲有幾多係欺騙我地，隱瞞我地。」但丁滄桑的聲音，配合預先準備好的講稿和七情上臉的表情，讓他們都變得目定口呆，心中暗暗自忖應否質疑許多一直以為是對，或是正常的事。「如果你同我一樣，都認為自由唔單單係一個詞語；如果你同我一樣，都感覺得到世界各地既政策不約而同咁慢慢收縮緊你既自由；如果你同我一樣，睇到世界既不公不義；如果你同我一樣，都渴望可以擁有真正既自由！同我地一齊，反抗啦！」
就在但丁的說話剛剛完結，世界各地的轉播忽然變成黑色畫面，明顯地是網絡線路被人切斷開，十多萬人也不禁輕輕拍著自己一直看著的電腦或電視，感到詫異無比，這個畫面更是讓那些人懷疑著是否世界政府所做的好事。
同時，從天而降，突如其來的三枚導彈轟向史丹福橋球場，更精準地說，是轟向但丁二人所站的地方，炸得整個草坪變得猶如廢土一樣。那些觀眾和傳媒豈料到情況會突然轉差，被那陣酷熱的爆風捲到倒在地上。「走呀！世界政府開火啦！」這樣突如其來的一句，釀成數萬人一同逃走，更慢慢變成人踏人的混亂情況。
已經站在遠處的但丁和慾，一點傷痕也沒有，或許對常人而言，剛才的導彈將會是致命的，可是他們並非常人，是門者，更是站在頂端的門者。他們望向如此混亂的場面，剛才那陣憤慨就像塵埃般吹散不見，二人已回復當初的平淡。「戰爭，終於要開始。」