《執劍》: 第九十章－－秘。銀（一）
第九十章－－秘。銀（一）
南懷瑾：「鏡花水月夢中塵，無著方知塵亦珍。畫出牡丹終是幻，若無根土複何春。」
與此同時，世上最有影響力的七個人物齊集於一個在地圖之上看不到，找不到的島嶼。這裡沒有任何名字，只有座標。
七人一致地身穿一身整齊全黑的西裝，襯上一條鮮艷紅色的領帶。他們七個人，一直在幕後控制著世界的變化，他們七人自稱，世界政府。
世界政府運用著自己的財、勢、力擴大自己在全世界的影響力，利用金融風暴去擴大自己對世界經濟的勢力；利用金錢控制各地新聞及娛樂業，方便製造不同的輿論，控制民心。勢力之大，就連國家政府都不得不低頭，因為每次選情，世界政府都有辦法左右。
「最近門者界發生好多事，叫噬魂者既組織製造太多動盪，先前既噬魂之亂，三名世上最強的九人死亡。我相信好快，各國政府都不得不要為一直以黎隱瞞門者而表態。」一名光頭的老漢說著，身型略為肥胖，穿戴的手錶和戒指盡顯富貴。雖然他面上有著不少歲月的痕跡，但說話時依然中氣十足，聲如洪鐘。
「世上最強的九人？哈，佢地只不過係我地用黎操控門者界既傀儡。量化門者既技術呢方面，美國同日本配合得好好，提供唔同既科學家比我地，親自去到一七島進行研究。為左唔比呢樣技術流出，所有電腦都無連接互聯網，所有科學家亦都唔會有方法離開一七島，身上亦唔會帶備任何科技產品。」一名瘦削的中年男人語調輕佻地說著，一雙鼠眼和略有猥瑣的表情令他看起來極似一個心計極重的流氓。「宜家技術慢慢開始成熟，哈，又或者係時候準備將呢堆科學家慢慢消去。呢個技術，只需要我地知道就足夠。」
「先前已經透過錄像，係伊拉克向幾個國家展現門者士兵既力量，就將一份修改過既報告傳比日本同美國，五千個門者士兵比美國，三千個門者士兵比日本。係量化門者成功率達到八成之後，殺晒島上既所有科學家。預計係一年後，會再引發一次戰爭，等向我地買左門者士兵既國家，一嚐壓倒性既滋味。」一名樣貌帶有女性美的青年，雙瞳深黑而清澈，而且輪廓突出，笑容親切，美貌不亞於任何女性。
「夜叉講得岩。而有關世上最強的九人，既然有舊人死左，新人方面，就等舊人自行處理，暫時我地都無謂插手。世界政府呢個名，越少人知道，對我地越好。此外，日本已經將秘銀交到我地手，但係美國遲遲未交，或者係時候同佢地講，一個月之內再比唔到我地既話，即將會有懲罰呢。」這個男人面上掛著親切的笑容，有如陽光般燦爛。
在執劍的基地中，明鋒正與其他人說話。
「今次係我第一次得到秘銀，先前只係知道佢既物理同化學性質異常，而佢表面光滑如銀，先得秘銀之名。佢能夠將人既靈力放大，所以普遍門者都相信以前古代人所講既刀光劍氣好有可能係由含有秘銀既武器放出。」明鋒示意全部人走到沙發位置繼續，不用如此生硬及奇怪般站在近門口的位置討論這個話題，而其他人都像聽故事般，乖乖坐在沙發上聆聽明鋒的說話。
他續道：「等我先解釋一下秘銀既特性。」明鋒拿起那把秘銀劍，自己鼓起一陣靈力並且凝聚在右拳，然後一拳打在那把秘銀劍上。這突如其來的舉動把全部人都嚇呆了，但他們更知道明鋒不做無意義的事，所以只專注地看著那把秘銀劍。
「第一，不被靈力摧毀。」明鋒把那把鍍上秘銀的長劍展露給他們所看，劍面上絲毫無損。以剛才明鋒的靈力質量，普通鐵劍都會被打斷。而真鳳亦回想起聖盃戰決戰的情況，即使是成為三門者的安東尼，也打不破這把長劍。
「第二，增幅靈力，但其他能量唔可以，而增幅幅度約。」這一個特性，明鋒相信不需要再次示範，因為從聖盃戰之上，天照大神門和內情報局的人員都已經作出很好的例子。
「第三，只有熔點，約攝氏七百度，亦只會被自然火或高溫燒熔，但似乎無沸點，或沸點極高。」
「第四，同銀一樣，擁有良好導電性。」
「第五，可以儲存靈力，儲存時限未知。」明鋒把靈力注入秘銀劍，那些靈力就一直儲存在內，當中沒有任何能量上的消耗。
「第六，無任何熱幅射，亦係非放射性金屬。」
「秘銀最主要既特性係呢六點，由於我無更加精細既科學儀器，唔可以從量子力學方面入手，否則就可以進入夸克層面，能夠得知更多有關秘銀既資料，發現更多特性。既然秘銀唔會放出任何熱輻射，代表住佢絕對違背左物理原則，又或者可能係因為空間轉換既問題；既然佢可以儲存能量，甚至將靈力增幅，就更加證明秘銀包含量子力學同狹義相對論既知識，將能量量子化，涉及空間、物質同能量三樣之間既轉換，只要掌握到之間既公式，就可以…」
「呀，明鋒，其實呀，我，唔係好明你講緊咩。」電王戰戰競競地說著，但他看到其他人的樣子都和他一樣，於是才放膽說出。
明鋒看到他們呆掉的樣子，才發覺自己想說的一切彷彿已不屬於他們能理解的程度。全個房間突然出現數秒奇怪的沉默。
真鳳眼見如此，於是嘗試問明鋒：「咁點解你話秘銀唔屬於呢一個世界呢？」
「正如我所講，秘銀牽涉到空間能量轉換…簡單少少黎講，能量定必守衡，暫時我地科技接觸到既能量轉換，無論係發電機、摩打或電熱爐，係能量轉換既時候，全部都有損耗，亦即係有能量轉換效率，但偏偏秘銀可以將靈力增幅，到底，呢點可以點解釋？又或者應該問，額外既能量，又係邊道黎？」明鋒正嘗試剔除所有較困難較深的字詞，只用淺白易明的概念讓他們了解一下情況。
明鋒這個問題，令他們開始思考著增幅靈力的問題，但任他們如何思考，都想不到任何有關這課題的線索。
明鋒心想著，依他們的智慧，或許任他們思考十年都無法想到，決定不用任何物理理論去作任何解釋，反正他們都不會明白，聽完比未聽到更顯不明不白。「以我估計，最大可能，能量係由空間轉換過黎。」
「係咪即係平行時空呀？又或者係多重宇宙！我有睇過少少小說，有略略講過架！」電王對這一個話題顯得特別有興趣。
「乜你都會睇書架咩？」真鳳笑言著，與他現時成熟的樣子做成很大反差，但這亦令他們眾人開懷大笑。
他們，很久沒有一起大笑了。
「梗係有啦，似你咩。我睇開異能故同科幻小說架！」電王聽到真鳳的說話，他亦笑著反駁一句。
時間，彷彿稍微回到了從前，那個快樂的從前，只是，少了身邊的幾個人；只是，剩下現在的五個人。
「明明你自己咪就係門者，即係你睇既異能故入面既角色囉。你自己親身經歷左咁多，仲要睇異能故咁得意既？」愛開電王玩笑的小倩也忍不住插嘴。
明鋒看到他們這樣玩著笑著，就知道真鳳即使當上了會長，彼此之間的關係，都不會因此而改變。「電王講得岩，多重宇宙亦即係平行時空。秘銀能夠增幅靈力，原先我有幾個推斷。第一，佢將附近游離粒子吸引，然後透過解析靈力，融合游離粒子轉化成光子，亦即涉及愛因斯坦係一九零五年所提出既光量子理論，但經研究同分析之後，發覺所產生既能量比起靈力增幅量不乎，而且我試過係接近真空既情況下實驗，靈力增幅量依然一樣，所以唔成立。第二…」
小倩看到其他人都一副似懂非懂的樣子，就知道他們與自己一樣，所以才慢慢說出：「明鋒呀，呢，其實我覺得我地呢，唔會聽得好明，不如你直接講個結果啦。」
「⋯⋯總括而言，無論從熱動力學、量子力學，或者相對論，都唔可以解釋到秘銀既特性。秘銀，已經凌駕於現時已知既物理規則；能量轉換方面極有可能係用左空間質能轉換。最大可能性係秘銀來自另一個空間，比我地維度更高既空間，或者係另一個世界，所以，先可以同我地呢個空間既物理現象有所差異。」明鋒已經盡力用上最簡單的字句去表達自己心中的意思。
「更高維度係咩意思呀？」真鳳衝口而出問了這個問題，問完才感到後悔，因為即使明鋒解釋後，自己也不會明白。
「零維度係點狀，一維度係線狀，二維度係平面，三維度係立體，而我地身處緊四維時空，第四維，係指時間。弦理論中，世界擁有更多維度，多數都係指次原子空間，或者係次原子宇宙。」坐在沙發上的四人，明鋒知道大概只有真鳳才擁有僅僅追上自己思考的能力，其實在先前，明鋒已注意到真鳳智慧額佳，但奈何他的知識依然不足以支持他的思維。
明鋒繼道：「呢個只係我既一個假想。假設秘銀的而且確來自另一個空間，而靈力從該空間提取以達到增幅既作用，秘銀就係一個穿越維度既工具。空間、物質、能量，三者本來就分唔開，亦即係如果我地提供足夠既能量，連空間，都可能可以穿越。」