《執劍》: 第四十五章－－九大組織會議（三）
第四十五章－－九大組織會議（三）
班叔叔：「能力越大，責任越大。」
“With great power comes great responsibility” Benjamin Parker (Uncle Ben) said.
這個議案，是有史以來，在九大組織會議之上歷時最短的議案。由提出至討論，再至投票，只用了一日的時間，而且，是一致贊成地通過。
這樣的消息在門者界中不斷傳播，噬魂者這三個字，已深深刻在大部份門者的心中，這三個字代表著危險人物。噬魂者，是連九大組織會長都認為危險的人物，那麼平常人怎會不感到恐懼，或者只有傻子才不感到恐懼。
「喂，你知唔知九大組織會議最後結果係點呀？」一名衣著普通的外國男子向著另一名相貌一般的小胖女人問道。
「你咁都唔知？」那名女人突然現出一種得戚的咀臉，就像自己完全熟悉那會議的全個過程一樣。「哈，東尼大人提出要其他八大組織一同合作，將所有有關叫做噬魂者既情報拎晒出黎，其他組織都一致認同東尼大人既睇法。睇黎噬魂者係一個好恐怖既組織，聽講佢地會將男既殺，女既姦完再殺！」
「咁恐怖！噬魂者真係好可惡，好變態呀！唔，睇黎東尼大人真係好有號召力呀！不愧係九大組織會議既主席呀！」那名男人雙眼露出崇拜的眼神。
「唔止咁，東尼大人仲提議如果我地可以提供情報，就可以拎到好高既報酬！真係好細心，照顧晒成個世界既門者！」那個女人就像幻想著那帥氣的東尼戴維斯在自己身邊，用最貼切的詞語，她是在發浪。
主席東尼在期後，於瑞士日內瓦中的一個地下廣場，向著其他門者組織宣佈這是一個九大組織團結一致的時代，在他帶領之下，門者界將會步向更美好的時代。「就由我，九大組織會議主席，東尼戴維斯，帶領大家一齊殲滅威脅世界既噬魂者！而你地每一個，都將會係見証住最和平既時代來臨既人！你地每一個，都將會成為未來既英雄！」東尼高舉雙手，迎接著台下無數門者的歡呼聲及掌聲。
這一番熱血的言論令東尼於門者界的名聲更加顯著，東尼的演講激起了眾人的熱血，振奮人心，即使不計他的個人戰力，全身亦散發著一種領袖風範。而且東尼雙眼有神，一對藍色的眼睛，深邃的輪廓，健碩的身形，一九零的身高，根本就是電視上的明星。更有不少門者打算從原先的九大組織脫離，向內情報局申請註冊，希望能夠加入。
而那些門者以訛傳訛，在互相交換情報之時，加上了自己的吹噓，製造了一個又一個關於噬魂者的傳聞，亦製造了一個又一個關於東尼的傳聞。有人說噬魂者擁有著三頭六臂，一拳能打斷大橋；有人說噬魂者的人奇醜無比，所以才想向世界報復，尤其是酷像模特兒的東尼。有人說東尼是世上最強的九人之中的最強，無人能敵；有人說只要跟隨著東尼，就能夠獲得榮華富貴，甚至獲得站上門者界的高峰。
風頭，一時無兩。
「點解要阻止我質問？呢條議案，可以帶黎好大既白色恐怖。甚至只要有懷疑，就可以係會議上申請對一個組織進行調查。」坐在飛機上的斯龍，不忿地問著雙眼望著窗外的明鋒。
他回想起剛才在會議內，當斯龍按捺不住想發聲質問東尼之時，明鋒輕輕按著他的肩膀，示意不要出聲提問，而且要投下贊成票。
「由以前開始，九大組織會議雖然令所有門者注視，但從未試過有咁多門者係附近聚集。咁奇怪既現象極大可能係人為，今次會議議程最主要係有關噬魂者呢個議案，所以我推斷好有可能係東尼係背後召集。既然東尼提出呢一個議案，並以正義為名，如果你今日選擇繼續質問，反而佢會向外宣佈作為執劍會長既你，阻撓議案通過，令你係門者界名聲受損，當以訛傳訛之後，甚至可以借意打擊萬事妥，令其他八大組織接到更多任務，更重要係，慢慢推倒你係門者界既勢力同地位。」
明鋒看著窗外的景色，繼續說著。「議案既後半段，對世界所有門者都有益。始終好多一門者，都只希望能夠賺到更多既金錢，之後去享受世界。就係咁。」明鋒的目光這時才從窗外望回斯龍。「定總監你想冒險，令執劍，係門者界既聲譽變差？正義呢兩個字，可以用黎掩飾好多野，包括罪惡。」
斯龍聽到這句，不禁慨嘆。以正義之名，利用人心，最終獲得更大的利益，不就是美國一向對發動戰爭所行的策略嗎？「唉，點都好，今次會議完結之前，大家都終於決定好聖盃戰既時間同地點。」斯龍望出窗外，那一片和平寧靜的大海，那一群漫天飛翔的海鷗，那一堆純白無形的白雲。「今次，一定要贏。」
「總監，伊拉克戰爭，應該唔止我地所想咁簡單，想打壓伊拉克中門者組織既擴大，我懷疑美國暗中嘗試製造門者軍隊，想像下有一支一千人由門者組成既海豹部隊。」明鋒一片淡然地說著，而他的手指依舊舞動著。
「嗯。回想返，當日果二千名軍人，好似有小部份都已經係掌握到靈力既一門者，只係同我地實力差太遠，宜家回想先記返。用戰爭，去製造更多既戰爭兵器。其實我地執劍，都想係用同樣方法，所以先會去到伊拉克，只係我地唔係為左挑起戰爭。會議之上，曾經訂下條約，一旦發生戰爭，九大組織不能作出干擾。東尼，美國政府到底比左咩好處你？令你甘願放棄門者的驕傲。」斯龍閉上雙眼，眼邊的皺紋令他看上去老了幾歲，整個人靠著那舒服的坐椅，輕輕說道：「明鋒，你覺得世界大局會變成點？」
「記得東尼係會議之後係廣場既講話嗎？今次係第一次九大組織會議既結果，係咁高調咁公開既情況之下公佈。佢咁高調，再加上我地係伊拉克既體驗同埋對美國想製造門者軍隊既推測，最大可能既結果係，內情報局要造勢，向其他門者組織暗中進行招兵。佢地要令世界不斷出現戰爭，不論美國係咪直接參與戰爭之中，佢地要比所有國家知道美軍真正既力量；又或者，東尼要為自己製造一隊門者軍隊，將宜家佢不斷招攬既門者訓練成軍人，為佢而戰。就係咁。」明鋒平淡地說出這一番瘋狂的說話，雖然聽起來十分瘋狂，與東尼所稱的和平完全不同，但是這又多麼像美國真正會做的事。
「至於其他組織，暫時仲未有足夠情報進行推論，但係睇岩岩每人既肢體動作，壬生一郎好有可能同東尼背後有所合作，而戴安娜亦可能係其中一份子，我只希望係我諗錯左。總監，你係咪已經揀好左聖盃戰既三名人選？」明鋒的視覺即使不用靈力亦比其他人好，始終他身體中所強化的主要是視覺，令他可以觀察得到人極微細的肢體動作。
「壬生一郎同東尼嗎？嗯。已經揀好左。」經過九大組織會議的斯龍感到無比的疲倦，與平日豪情橫逸的他有著天壤之別，他只是一直閉著雙眼休息著。畢竟，他寧願跟隨著本心，在戰場上一直戰鬥，都不願陷入這些權力鬥爭之中。
世上有些人，喜愛玩權弄謀，亦有些人，喜愛追名逐利，縱使斯龍兩樣都不是，但他亦明白自己已經無法逃出這個地獄。