《700萬種超能力》－在香港，人人皆有超能力: 第八章
我追在阿熹身後，來到了在中環海濱長廊釣魚區。這個地方已經荒廢多時，因為在範圍小、水質差的釣魚區內根本釣不到魚。停下來後，我跟阿熹喘著氣，坐在海濱的長椅上。
「你…跟住嚟…做乜呀？」
「你…咁衝動…又做乜吖？」
他粗暴地解開恤衫的頸喉鈕，狠狠吐出一大段話：「屌！我睇唔過眼條女咁對你呀！話晒都拍過拖，份工又係你介紹佢入嚟做，但係佢無論喺感情上定係工作上都不斷傷害緊你囉！」
阿熹一向是個火爆衝動的人，跟甚麼也喜歡收在心底的我截然不同。我連憎恨思詩也做不到，又怎會想過要像阿熹一樣向思詩執行私刑？「佢係錯，但係你打人都唔啱！家吓你點算呀？」
「冇喇冇喇，今次仆硬街喇屌…」阿熹邊說邊搔頭髮。他這個人，在我有事的時候，總是比我更緊張、也比我更積極地幫我爭取。雖然這是好兄弟的表現，但我忽然在想，要是讓衝動的他得到超能力，我一定要好好看管著他才行。
阿熹突然想到了甚麼好點子，手臂一揮：「一係咁，威脅要爆佢同Nichols啲嘢出嚟，叫佢咪告我！」
「唔好再錯落去喇你！」我馬上堅決反對他的提議。
「咁點呀！我已經玩完喇！份工又冇埋，分分鐘仲要俾條八婆告！」他一臉面對世界末日的絕望樣子。
畢竟阿熹是為了幫我出氣才闖下大禍，我決定趟這趟渾水，嘗試幫阿熹擺平事件。「我返去同思詩傾吓啦。只要受害者唔追究，我諗公司都可以當冇事發生啩……唉。」
他終於意識到自己為我帶來了很大麻煩。「……對唔住呀。」
「你對我嘅好意我收到喇。但係，我鐘意女人㗎。」我故作輕鬆笑著說。
「屌！咪柒啦，我有Angel㗎喇！」提起自己拍拖多年談婚論嫁的女朋友，阿熹突然又想起一件事：「係嘞，喂！你同果隻Jill有路咩？」
「吓－？」
「思詩頭先話㗎，話點解你同果個阿Jill就可以，佢同人哋一齊你就要管！」
「邊度同呀！我同阿Jill男未婚女未嫁！」我急忙接著說下去：「……況且我同阿Jill根本冇嘢！」
阿熹嘆一口氣，語重心長地說：「你唔好因為想忘記思詩，就求其攬住果梳蕉當水泡呀。」
「我唔係啲咁嘅人，我對每一段感情都好認真。」
「我意思係，你以為果梳蕉係水泡？佢分分鐘沉你落海呀。」
我差點忘記了，他對阿Jill仍然抱有敵意。
「你快啲返公司先啦！我隔一陣先返去，廢事累到你！」他看著手錶，催促著我說。
我跟他道別後，獨個從海濱長廊步行回去公司。回程這條路好像特別漫長，因為當我回去後，我便要低聲下氣求思詩原諒阿熹。而假若思詩要追究起來，連我也一併起訴的話，我也絕對責無旁貸。帶著複雜的煩惱情緒，我硬著頭皮回到公司。辦公室中的同事繼續如常工作，一切也跟往時一樣。
我想找個機會跟思詩談談，不料我一回到座位，Nichols就馬上走過來找我。
「喂阿雲，腥個《港．精神》lobby冷氣個temperature log sheet俾我吖。」Nichols說。
「哦，冇問題。」我悄悄盯著Nichols的臉，他臉上沒有任何異樣，就跟周遭同事一樣一臉平靜。
「仲有電錶房果單嘢，call咗工程部未？」Nichols問。
「呢個…要問返阿熹。」我在他面前提起阿熹後，忍不住嚥了口氣。
「OK，咁我等阿熹返嚟再問佢。」
我偷看四周，可是，就連最愛八卦的Cat姐，竟然也沒有偷看我一眼。一個小時過去了，阿熹才回到office，期間沒有一個人問過我關於剛才襲擊時件的事。
「阿熹！」Nichols一見到阿熹的身影就馬上叫住他。
阿熹遲疑地走到Nichols跟前準備受刑，Nichols卻竟然只是詢問了工作相關的事情，便把阿熹放走了。我偷偷示意阿熹一起去廁所，像電影情節般確保廁格內沒有人之後，我馬上問阿熹：「喂，搞乜鬼呀？點解佢哋好似咩都冇發生過咁嘅？」
阿熹也一臉疑惑：「唔…唔知呢…」
我在腦海內想了無數個可能性，卻還是覺得這個狀況根本就是解釋不到的超自然力量。簡單點來說，就是……
「其實、頭先我一刮完思詩，我……見到一粒粒星星。」阿熹打開水龍頭，狠狠地洗了一下臉，然後望向鏡中的自己說。
「咩嘢星呀？兜巴星？」
「呢，玩GTA果陣呢，做完衰嘢俾人追捕果陣，咪會有一排星星彈出嚟嘅。只要我走得甩，匿埋一陣，等啲星星唔見咗，跟住就會好似冇發生過任何事咁。」說起來，阿熹是這個遊戲系列的忠實玩家。
我還是沒搞清楚狀況，阿熹就拉著我步出廁所，直接走到思詩的座位前。思詩正在專注地敲打鍵盤，但可以看到她的左臉仍然是紅紅的。
阿熹直截了當地說：「思詩，頭先對唔住呀。」
她沉默了幾秒。這幾秒間，我的心臟跳得異常地快，呼吸也非常沉重，直到她吐出一句說話：「點解要對唔住？」
「呀…咁冇嘢喇。」阿熹露出了微笑，然後轉身走掉。
我緊跟著阿熹身後追問。「喂，究竟發生咗咩嘢事？」
「果然冇估錯！」
「咩嘢呀？」
阿熹停下來，浮現出一個有點驚慌，又有點興奮的笑容，在我耳邊小聲地說：
「…我…可能有只要犯法後成功逃走就唔會犯法嘅超能力。」