秦天晴 — 有鬼 新章《畫》正式展開: OFFICE 有鬼 — 第一章

“唔該等埋！！！” 我用盡全身嘅氣力邊叫邊跑，無視其他人歧視我嘅目光，一下閃身衝入電梯

我做咩事咁趕？咪就係。。。趕番工囉！假日後遺症之《唔想番工》病發了，賴床賴到last minute先彈起身，結果就搞成咁

“叮，四樓”電梯門一開，再次摩打腳上身嘅我即刻衝出去，目的地：卡鐘
嗶一聲響起，卡鐘上面顯示 8.59分


“Yes！安全上壘，保住勤工！”抹左抹額頭嘅汗，心入面比左個《V》自己之後，推門入office





就響我以為自己今日好好彩，開開心心咁行番埋位嘅時候，突然發現到果班番工等食lunch，食lunch等放工，舉頭睇韓劇，低頭玩手機嘅同事們用一種極度奇異嘅目光望住我，即刻feel到唔多對路，果然！響我忐忐忑忑咁向前行多幾步嘅時候，就聽到一把女聲話

“Tina，入一入嚟我房” 

唉。。。呀姐叫到，梗係即刻放低個袋9秒9衝入去啦

“Jane姐，請問有咩事呢” 一入去，我怯怯地咁問


點解我好似咁驚佢咁樣？除左因為佢係我呀姐之外，佢仲係個超級工作狂加有嚴重情緒病嘅人，為免中槍，所以。。。示弱好，示弱無痛苦






“Tina，其實我搵你入嚟係想同你講，我地公司打算響月尾搞個promotion，想搵你去follow up，聽日會比啲資料你，然後你星期五前比份proposal我，有無問題？” Jane姐嚴肅咁問我


“丫。。！？無！梗係無問題啦！”我心諗，你係大佬你話事邊敢有問題丫。。。就算合指一算得三日


“係？但係我見你個樣好疑惑下喎！有咩問題可以直接講出嚟架喎。。。（下刪數十字）”佢開始發表佢嘅長篇偉論，直頭講到我唔問佢好似對佢唔住咁





我就唯有將我內心果少少疑問問下佢啦

“Jane姐，其實我想問呢。。。點解會搵我負責嘅？我啱啱由分公司調過嚟一個月，經驗又唔夠Coye佢地多。。。”


我問完之後眼定定咁望住佢，佢個表情竟然有啲奇怪咁話，“你就當公司比機會你囉，做得好可能有獎勵呢！你好好把握啦，放心我會響度陪你！唔洗驚！”之後就打發我番出去


響度陪我？唔洗驚！？咩事丫！？好騎呢，算！做就做啦！


忙到Lunch time，我同混熟左嘅同事Cindy一齊出去食飯，平時八婆仔咁狂爆公司啲八卦野嘅佢一邊食，一邊望住我一副欲言又止咁嘅款，令我忍唔住咁問佢


“Cindy，做咩丫？有心事？”






“天晴。。。Jane姐叫你搞果Promotion，你可唔可以唔OT咁搞掂佢丫？”佢問番我轉頭


雖然我內心幾十個問號飛過但係我都好認真咁諗左諗然後答番佢“如無意外，應該都ok嘅。。。做咩無啦啦咁問丫？唔通。。。你又八到啲咩內幕消息？”


聽到我嘅反問，佢無即刻答我，而係沉默左，但係我從佢嘅表情可以得知，佢應該係響度組織緊點樣講我知


一分鐘後，佢好認真咁講左一句說話，一句令我飲水飲到一半差啲噴左出嚟嘅說話


“你信唔信。。。呢個世界上。。。有鬼。。。？”






信唔信咩話？有鬼！？信！點解唔信？我屋企就有對專幫人捉鬼嘅夫妻（即係我父母）。。。


“信丫。。。你係想話我知，我地office有鬼？”接過佢遞過嚟嘅紙巾，抹過咀後我有啲好奇咁問


佢見我答信之後當堂鬆左口氣咁，轉而用一副我咩都知，咩都逃唔出我五指山咁嘅樣同我講“可以咁講啦，其實。。。我地office嘅人一到六點鐘就會全部走晒，當然除左Jane姐之外啦！我地唔會OT，有咩做唔切都會第二日番工先再做，原因係。。。”


佢停一停，吞一吞口水繼續講“好多人響六點後見到。。。果啲野！見過嘅人唔止一兩個，係好多個！之後公司搵左個師父番嚟作法，但係無用，久而久之，無同事願意開OT，而公司亦都隻眼開隻眼閉！”


聽完佢講嘅野，綜合番今朝佢地望我嘅目光，再加上房入面Jane姐嘅反應，得出嚟嘅結論係。。。因為佢地驚要OT所以無人願意follow個job，而Jane姐響無得選擇嘅情況底下將新人嘅我踢去頂上！






雖然啲成功人士成日話《機會係要自己爭取》《機會嚟到要好好把握》，但係呢個moment我真心想講“我唔需要，多謝晒！”可惜老天唔會回應我，唉。。。。


“點解你唔一早話我知丫。。。我都無聽人講過嘅。。。”我非常哀怨咁問


”你嚟左唔係好耐又同佢地班人唔熟，自然無人講你知啦，Jane姐更加唔會講你知啦，驚嚇走你嘛！而我。。。”佢尷尬咁摸摸鼻頭“我都驚你驚丫嘛。。。所以咪唔講你知住先，然後一到六點就拉你走人囉！不過唔洗驚啦！人地而家咪講左你知囉”


小姐，其實你而家講同早啲講正常人都一樣係會驚囉！無言