秦天晴 — 有鬼 新章《畫》正式展開: 百貨驚魂 — 第十九章
聽住軒轅皓個鞋底所發出嚟，一下又一下嘅聲響，我立刻不顧一切咁加快下降嘅速度， 想儘快離開呢度！
但係，落到地面就等於離開左呢度！？呢個想法好明顯係錯嘅！
可惜，呢個時候嘅我，大腦已經一片空白，完全係乜都諗唔到！以至於接近地面果陣，我成個人嚇到差啲暈過去！
因為。。。我透過夜視鏡可以清楚咁見到，我所踩住嘅牆身，以及地面上面。。。全部都佈滿住大大小小嘅曱甴！
呢一刻，我個人已經面臨崩潰嘅邊緣！我真係情願面對住一大堆嘅鬼娃娃，都唔想對住呢一大堆嘅曱甴。。。
但係，我有得揀咩？答案顯然係。。。無！所以，我唯一可以做嘅就係。。。面對現實！
“唉。。。”，我輕輕咁嘆左一口氣，然後合埋雙眼，狠狠咁踩落個地下度！同時個心就響度諗，死就死啦！最多係嘔心核突啲姐！
“啪！”一聲，我隻腳已經踩到落地面！
但係。。。並無我想像中嘅果種“噗哧！”嘅爆漿聲出現，亦都無踩到異物嘅觸感！有嘅反而係果種腳踏實地嘅感覺！
奇怪啦。。。無理由架喎！地下咁多隻，無理由一隻都踩唔中架！
於是，我就鼓起勇氣，擘大雙眼望下啦。。。竟然見到啲曱甴全部都兜過左我，行埋晒一二邊！
咦！？發生咩事！？
我好愕然咁望住自己嘅腳邊，完全唔明白係乜野一回事！
其實，呢一切都要多得小木魚嘅果條手繩！因為桃木精粹帶有靈氣，一般嘅骯髒之物都唔會靠近！所以秦天晴爬落嚟嘅時候，先至會咁順利，一隻曱甴都踩唔到！
不過，照佢啱啱驚到咁嘅情況，發現唔到都係好正常嘅！
秦天朗見秦天晴已經落到嚟，就幫佢解開身上面條安全帶！點知抬頭一望，見到佢嚇到臉無血色咁嘅樣，就即刻好後悔自己見到呢個環境，都仲叫佢落嚟！
本來佢係覺得，將個妹留響自己身邊，先至係最安全！但係佢就忽略左最種要嘅野！就係個妹嘅感受！
唉。。。自己真係一個唔合格嘅呀哥丫！
晴晴咁驚，會唔會有心理陰影架！
不如。。。幫佢搵定個心理醫生！？
呢個時候，秦天朗完全存在於自己嘅內心世界入面！就連秦天晴叫佢，佢都毫無反應！
見到咁嘅情況，企響佢對面嘅軒轅皓，就走去拍一拍佢個膊頭，以示安慰！然後，就做左一個令人意想不到嘅動作！就係。。。響佢面前，將秦天晴成個打橫咁抱起！嚟左個公主抱！
”哇！？”我無諗過軒轅皓會突然之間抱起我，所以衝口而出咁“哇！”左一聲！同時亦都稍微掙扎左一下！
點知，軒轅皓就一臉淡定咁望住我，然後同我講
“唔洗驚。。。咪郁！攬實！”
嗯！？我望住佢塊臉，眨眨眼。。。
咪郁？OK！我唔郁！但係攬實。。。攬實你。。。好似唔係咁好喎！
軒轅皓見秦天晴有啲遲疑，就輕飄飄咁講左句
“小心跌你落去丫。。。”
下！？跌落去！？唔係掛！我即攬！
因為我發現，相比起唔好意思，我更加驚自己會撻左落地面！
如果真係好不幸咁撻左落去嘅話。。。咁我個背脊咪。。。諗起都打冷震！
軒轅皓見秦天晴乖乖咁跟住做，就響佢見唔到嘅方向，滿意咁笑左一笑！而同時間，凌嘯峰佢地亦都落到嚟呢一度！
見到已經齊人，呀朗就指一指不遠處嘅鐵門，輕輕咁同我地講
”既然電梯槽呢度唔見鬼娃娃嘅蹤影，咁鬼娃娃應該就哩埋響呢度門嘅後面！呀峰，你負責打開度門！呀峻！拎定啲符紙出嚟準備攻擊！呀皓！你。。。咳咳。。。你抱住晴晴企後啲就得啦！”
講完，佢就開始倒數
“三，二，一，打開！”
凌嘯峰依照佢嘅指示，一下拉開度門！但係，並無我地想像嘅《群娃亂舞》出現，反而係出現左一條深不見底嘅石梯。。。
而隨住度門嘅打開，一絲絲陰冷嘅風，從樓梯嘅下方微微咁吹上嚟，令人有種不寒而慄嘅感覺，亦都令到原本響地上面遊走嘅曱甴，全部都走埋晒一邊！好似條樓梯果度有啲咩威脅到佢地咁！
唔洗問，呢度肯定有古怪！我地互望左一眼之後，就決定行落去睇下！
當然，響行落去之前，我就已經要求解除呢個公主抱嘅狀態啦！皆因啲曱甴已經全部都走開晒啦嘛！我又邊好意思要軒轅皓繼續抱住我呢！
如是者，我地每人都凝聚左一個靈火球之後，就開始一級一級咁行落去，一直行，一直咁行，但係行左十分鐘，都仲未落到樓梯嘅底部，令到我地有種強烈嘅不安感！
究竟。。。幾時先至落到底呢！？仲有樓梯嘅盡頭。。。到底係通去邊度呢！？呢一堆嘅疑問，都只可以收埋響我地嘅心底入面，然後繼續咁向前進！
直至到唔知行左幾耐之後，我地終於都見到微弱嘅光線！同時，亦都聽到一啲硬物不停拍打地面嘅聲響！
秦天朗馬上整熄手上面嘅靈火球，擰轉身向住軒轅皓佢地打左幾個手勢暗號之後，就繼續慢慢咁向下行！
見到咁，我就學佢整熄左個靈火球，諗住跟住佢尾行啦！點知，軒轅皓竟然拉住我，唔比我行喎！
唔止佢，就連凌嘯峰兩兄弟都伸手擋住我！
丫。。。？呢個咩情況。。。
軒轅皓見我一臉不解咁望住佢地，就響我耳仔邊，用微弱嘅聲線同我講
“佢轉頭就番，我地企響度等！”
於是，我地就企定定響度等！而我地等左一陣之後，呀朗佢就神色凝重咁番到嚟！
望住佢呢副表情，我就諗。。。唔通佢發現左啲咩。。。？
不過好快我地就知道點解佢會有咁嘅反應！當我地跟住佢行到去樓梯嘅出口，企響果個離地幾層樓嘅平台上面，再向下咁望住下面果座建築物嘅時候，我地嘅表情都唔好得佢好多。。。
因為，下面嘅果座野，好明顯就係一個祭壇！而響祭壇外圍，就企左滿滿嘅骷髏鬼！至於祭壇嘅中心點，就係拎住鐵鏟鐵錘，不停咁向下掘嘅鬼娃娃！
呢一刻，大家都心裡有數！知道祭壇中間肯定係封印住啲野！而佢地而家就係要將果樣野釋放出嚟！
咁嘅情況，我地就梗係唔會比佢得逞啦！
於是，我地就分為兩隊，沿住左右兩邊嘅樓梯，靜靜咁行落去，慢慢咁接近祭壇，打算嚟個突襲！
點知，就響我地打算出擊嘅時候，有把聲突然出現，打斷左我地個行動！
“既然嚟左，又何必響度偷偷摸摸呢！”