秦天晴 — 有鬼 新章《畫》正式展開: 百貨驚魂 — 第二章
去百貨公司做臥底。。。？
聽到臥底呢兩個字，我自自然然就回憶番第一次見軒轅皓嘅情境。。。
當時嘅佢，就係為左查案，而走左入嚟office度做臥底！為嘅就係搜集到足夠嘅證據去起訴徐立勤！
諗起徐立勤呢個人。。。我就諗番起佢當初愛軒轅皓愛到發晒癲，然後想殺死我嘅情境。。。
而呢情境，就令到我聯想起軒轅皓當初為左埋徐立勤身，就對佢展開左三個月嘅追求，最終成功咁令佢愛上自己，然後發展成男女朋友關係。。。
諗到呢度。。。我望住軒轅皓，忍痛咁舉起自己果兩隻豬蹄手，將自己攬住，然後好驚慌咁話
“我。。。我唔要。。。我唔要犧牲色相！”
軒轅皓望住秦天晴呢個莫名其妙嘅行為，再加埋佢呢句奇奇怪怪嘅說話，就知道佢嘅思維又唔知跳躍左去邊度！
本來聽到秦天晴講“我唔要”，就以為佢唔想做臥底啦！點知，佢之後竟然嚟左句“我唔要犧牲色相”！
呢一刻，軒轅皓感到哭笑不得之餘，仲覺得超級委屈！
佢真係好想大叫一聲 “就算要犧牲色相，都唔敢搵你啦！一來呀朗肯定會打我！二來你係我嘅。。。咳咳”
而凌嘯峰同凌嘯峻兩個見到秦天晴咁嘅反應之後，就忍唔住響度哈哈大笑！
我望住軒轅皓冰冷嘅臉上，竟然露出左委屈嘅表情，再望埋凌嘯峰同凌嘯峻兩個笑到超誇張嘅反應，心諗
“明明要犧牲果個係我，你委屈啲乜野喎！仲有你兩個！笑笑笑，他朝君體也相同丫！嗚嗚嗚。。。”
凌嘯峰見秦天晴扁扁咀咁望住佢地，就伸手抹一抹眼邊笑到標出嚟嘅淚水，開口話
“天晴，唔係好似呀頭咁丫，今次你係去做售貨員咋！”
其實某程度上，凌嘯峰對於秦天晴天馬行空嘅想法，係有一定嘅了解，因為佢兩個都係果種傻傻更更嘅性格
軒轅皓聽到凌嘯峰咁講，聰明嘅佢就即刻明白到秦天晴點解會有啲嘅反應！內心頓時感嘆左一句
果然！第一印象真係好重要呀！
佢微微咁嘆左一口氣，就淡淡咁話
“放心，我唔會要你做啲咩犧牲色相嘅野。。。”
聽到佢咁講，我就即刻放心晒！我慢慢放底我果兩隻豬蹄手，然後眼定定咁望住佢，等佢繼續講落去
軒轅皓見秦天晴回復番正常嘅表情，就開口問
“你記唔記得宋娟呢個人？”
宋娟。。。？呢個名咁熟嘅。。。？
我皺埋眉頭諗左一陣，終於都諗番起佢係邊個！
宋娟！就係Cindy個姐夫所包嘅二奶！送鬼娃娃比悠悠嘅果個惡毒嘅女人！
“記得！送鬼娃娃嚟害悠悠嘅果個衰女人丫嘛！我記得。。。”
講到呢度，我停一停，望住凌嘯峰輕飄飄咁講左句
“最毒婦人心！”
秦天晴嘅呢句說話，絕對係嚇親響度飲緊水嘅凌嘯峰，所以，“噗！”一聲，佢口中嘅果啖水就向住凌嘯峻一下咁噴左出嚟！
可憐嘅凌嘯峻，響完全唔知道發生啲咩事嘅情況底下，無啦啦比自己呀哥噴到成臉都係水。。。
凌嘯峰一邊同佢道歉，一邊拎住啲紙巾幫佢抹臉，同時亦都一臉哀怨咁望住秦天晴！
見到凌嘯峰呢副哀怨嘅樣，我忍住心入面嘅笑意，擰轉臉無視佢。。。
而軒轅皓見到凌嘯峰比秦天晴一句說話就嚇成咁，無奈咁搖搖頭，伸手輕輕力咁拍左秦天晴個頭一下，就繼續開口話
“係，就係果個宋娟！響你靈力虛脫而暈左嘅果一日，我地拉左佢番差館接受調查！當時嘅佢好唔合作，無論我地點樣盤問佢都好，佢始終都係乜都唔肯講！直到我地話要拉埋個男人番嚟，佢先至肯乖乖地咁將佢所知道嘅野，一次過咁講晒比我地知！”
軒轅皓開始慢慢咁將個前因後果講比我知，而我就靜靜咁聽住佢所講嘅說話
”原來，Cindy個姐夫—鍾國強同宋娟係上司同下屬嘅關係，本來佢地一直都係清清白白，直到幾個月之前，佢地番左大陸公幹，鍾國強比人灌醉左之後，佢地就發生左第一次嘅關係！
其實，宋娟一直以嚟都係暗戀住鍾國強！所以佢係自願獻身出嚟！祈望可以同鍾國強有進一步嘅進展！
只可惜，鍾國強對於同宋娟發生左關係嘅事，除左抱歉之外，並無其他！因為佢覺得自己只係酒後亂性！根本就無諗過要繼續發展落去！
而宋娟知道左佢咁諗之後，當然唔會咁易就罷休啦！為左將鍾國強據為己有，佢開始周圍搵降頭師用邪術嚟落降頭！但係所謂嘅降頭師，並唔係個個都真係有料之人！所以，當佢用晒所有積蓄嘅時候，鍾國強都仍然仲係對佢一啲表示都無！錢又無，人又得唔到，心灰意冷嘅宋娟，已經再無任何嘅辦法！
就響佢決定放棄嘅時候，突然有個黑袍人走埋嚟，塞左樣野響佢手上，同佢講
“拎住佢，早晚搽上塊臉度，有效嘅就去呢個地址度搵我！如果唔係，我會令你後悔一世！”
宋娟心諗 ”橫又係死，掂又係死！唔試就一定死！”
於是宋娟就開始早晚咁搽，搽左幾日之後，鍾國強果然係對佢越嚟越好，甚至同佢嘅關係，開始越嚟越曖昧！
對於呢個結果，佢感到開心之餘，又有啲擔憂！因為佢諗番起黑袍人最後所講嘅果句說話！所以第二朝一早，佢就去左果個陰森嘅倉庫度搵黑袍人，而果個黑袍人，就開始將任務交托於佢！而果個任務就係。。。
每日響倉庫入面拎十隻洋娃娃出去，然後放響佢指定嘅位置果度！”
聽佢一口氣咁講完之後，我就開口問
“咁宋娟總共拎左幾多隻鬼娃娃出去？同埋黑袍人其實比左啲咩佢搽？”
軒轅皓聽到我嘅問題，就好神色凝重咁話
“根據宋娟所講，前後加埋應該超過四百隻！而黑袍人比佢果搽嘅係和合油。。。即係屍油！”
本來聽到前面果句，我就已經打左個冷震，而家聽埋佢後面果句，何止冷震，我成個人毛管都棟晒！
屍油！搽上塊臉度！實在太嘔心恐怖啦！
我舉起隻豬蹄手，忍住痛楚去掃一掃手臂上面啲雞皮，而軒轅皓見到我呢個動作，就以為我覺得凍！
於是佢就拎起床上面，因為我坐左起身而跌落嚟嘅果張披，輕輕咁蓋響我嘅身上面！而佢呢個突如其來嘅溫柔動作，令到我個人愕左一愕！
呆左幾秒之後，我先到識得對住佢笑一笑，同佢講左聲唔該，然後就繼續問
“咁我去百貨公司做臥底，同呢件事有啲咩關係？”
今次答我嘅並唔係軒轅皓，而係凌嘯峰！佢開口同我講
“宋娟曾經送過最少十次嘅鬼娃娃去羅氏百貨果度！我地懷疑。。。奉靈教對羅氏百貨有不軌嘅企圖！同埋。。。本來呀頭係想派我混入去，點知我做資料搜集嘅時候，發現羅氏百貨請嘅人，十有八九都係女仔！所以，我地需要你混入去調查一下，順便將果堆鬼娃娃全部銷毀！”
哦。。。原來係咁。。。！但係百貨公司咁大，我要點樣先至可以搵到果堆鬼娃娃丫。。。
呢一刻，軒轅皓就好似知我苦惱緊啲咩咁，佢突然響褸袋度拎左部粉紅色電話遞比我，同時開口話
“你記唔記得寫住《拘魂咒》嘅果個黑色樽仔？我地將佢拎左嚟總部，然後利用左特殊嘅技術，將果個樽仔上面嘅符咒，輸入左響你手上嘅果部手機入面！所以，你只要打開佢個GPS功能，就可以快速咁搵到果啲鬼娃娃嘅所在位置！”
咦！咁咪即係好似呀峻部電話咁囉？即係而家萬事具備，就只欠東風啦！
咁我要安心休養，為七日後嘅任務做好準備！