秦天晴 — 有鬼 新章《畫》正式展開: 露營 — 第九章
哇哇哇！大佬！唔好劈落去呀！！！
我深深咁吸左一口氣，然後大叫左一聲“停手呀！”
唔知係咪我叫得太大聲，響我叫完之後，所有人嘅動作都真係停低左落嚟
響地下打緊交嘅就停晒手唔打，敲緊落個鎮魂碑度嘅手就停左響半空之中
然後全部人都好愕然咁望住我。。。
見到呢個情況，下一步應該要點做呢！？我根本就未諗到！
我淨係知，如果塊鎮魂碑真係爛左嘅話，肯定會有啲唔知乜鬼野走出嚟！
諗番起上次倉庫啲活屍。。。再諗諗而家我地係身處響荒山野嶺入面。。。
唔得！塊碑一定唔爛得！
我既刻抽動手上條九節鞭，向住呀茹狠狠咁打落去，而呀茹為左避開我嘅攻擊，亦都鬆開左對呀佩嘅挾持！選擇同我打埋一齊！
呀峻對呀漢，我對呀茹，淨番呀佩一個人拎住呀峻枝長槍企左響鎮魂碑嘅旁邊！
或者，佢一直唔出聲咁企左響度，根本就無人會注意到佢，但係佢手上枝長槍嘅槍身，偏偏就一直發出淡淡嘅金光，令人無法忽視佢嘅存在
見佢仲企響果度唔走，我就一邊避開呀茹啲指甲攻擊，一邊同佢講
“呀佩！快啲走！”
而呀峻聽到我咁講之後，亦都將呀漢壓住響地下，然後擰轉頭對住呀佩開聲話
“走！唔好企響度！”
聰明嘅人見到啲咁嘅情況，聽到啲咁嘅說話，都會即刻轉身就走，離開呢一度，但好可惜。。。佢唔係。。。
當我聽到佢果句深情嘅 “呀峻！我唔走！人地要陪你同生共死！”嘅時候，我腦海即刻諗起左一句說話
不怕神一樣的對手，就怕豬一樣的隊友！
我一直安慰自己，唔緊要，佢企定定應該都無乜問題嘅。。。但係豬小姐顯然並唔係啲安份嘅人！
當我閃身去避開呀茹嘅頭髮攻擊，再望一望呀峻果邊係咩情況嘅時候，竟然見到佢拎住枝長槍當木棍使，一下又一下拍咁打落去佢地身上
重點係，一邊打，仲一邊不斷咁開口話
“哎呀，有無事丫！哎呀！Sorry呀！”
因為。。。佢十有八九都係打晒落呀峻身上。。。
呀峻本來身上就有傷。。。如果再比佢咁樣打落去嘅話。。。分分鐘會比佢打到內傷！
於是我對呀茹抽完鞭，再對佢發左個小火球之後，就對豬小姐嚟左個溫馨提示
“你咪再打啦！再打落去，呀峻就嚟比你打死啦！”
點知，豬小姐聽到我咁講之後，非但無停手，反而落手仲更加狠！而且仲開口鬧我
“收聲啦！八婆！關你乜事丫！”
聽到佢再次鬧我！而且仲係鬧八婆之後，我即刻火都嚟埋！滿腔嘅怒火令到我舞鞭嘅動作變得越來越快！
而隨著呢個氣勢，一招《金絲纏葫蘆》被我發揮到極致！
我呢個突如其來嘅變化，對於呀茹嚟講，根本就反應唔切，所以佢就被我打中左好幾次，然後發出左陣陣嘅慘叫聲！
呀漢聽到呀茹嘅叫聲，即刻用盡九牛二虎之力想將呀峻推開！但係呀峻又點會肯放佢走丫！所以就出力咁箍實佢！唔比佢走過嚟！而豬小姐見到咁嘅情況，竟然嚟左個最後一擊！
毫無疑問，佢呢一擊再次咁打中呀峻，令到佢隻手鬆左一鬆，成個人被呀漢用力咁推開！而因為呢一推，呀峻就向住身後嘅呀佩一下咁撞落去！
呀佩根本就無諗過，呀峻會突然向後撞！所以響毫無防範嘅情況之下，佢就被呀峻所撞跌，成個人直直咁向後跌落地，然後。。。
佢手上面枝長槍，就向住身後果塊鎮魂碑，一下咁敲落去！
鎮魂碑感應到自己將會被攻擊，瞬間就發出左一個金色嘅防護罩，將自己包圍住，但係當佢接觸到長槍上面嘅金光之後，個防護罩嘅光，竟然同長槍上嘅光融合埋一齊，然後消失！
“啪！”一聲，長槍順利咁劈左落塊鎮魂碑上面！
“哎呀。。。呀峻。。。我撞親個Pat Pat。。。好痛丫。。。”呀佩坐左響個地下度，望住呀峻好嗲咁話
可惜呀峻根本就望都無望過佢！佢走去執番起自己枝長槍之後，就即刻行嚟我身邊，同我一樣神色凝重咁望實塊鎮魂碑！
而呀漢就快速咁跑過去呀茹身邊，緊緊咁抱住佢，望下佢有無傷到邊度，然後，佢兩個同樣都係望實果塊鎮魂碑！
呀佩見我地望晒過去，就扮怕醜咁開聲話
“你地做咩眼甘甘咁望住人地姐。。。”
呢一刻，我真係好佩服豬小姐！我地個個都咁樣望過去，佢竟然一啲都感覺唔到有問題，而且仲可以繼續咁自戀落去。。。
不過佢講完之後，我地無一個人開口去應佢，因為佢身邊嘅果塊鎮魂碑，已經從上而下，慢慢咁裂開。。。
情況危急！我即刻對住呀佩叫左一聲“走開！”
不過以佢嘅性格，肯定唔會乖乖咁行過嚟，所以響佢未開口反駁我之前，我就已經忍唔住將條鞭掃過去佢身上，將佢纏住！然後運用靈力將佢一下咁扯過嚟，再向後甩落地下！
甩完之後，我個心就響度諗
”我係真心想救佢架！絕對唔係想報復！絕對唔係囉。。。”
不過響佢跌落地下嘅果一刻，呼。。。無可否認，我條氣都真係順番晒。。。
鎮魂碑響呀佩落地嘅果一刻，亦都已經完全咁碎開晒！而隨住佢嘅碎開，無數嘅黑氣從碎片嘅位置之中噴發出嚟！
“哈哈哈！我終於都完成左大人嘅任務啦！我可以復活啦！哈哈哈！” 呀茹見到呢個情況，就好興奮咁話
呀漢聽到佢咁講，就錫左佢一啖，亦都好開心咁話
“係丫！我地終於都成功啦！呀茹！等你番嚟！我地就即刻結婚！”
可惜，佢地已經完全沉醉響幻想世界入面，一啲都無留意到個地下開始慢慢咁裂開。。。而本來仲企響佢地身邊嘅我地，一早就已經退後晒！
等到佢地注意到嘅時候，就已經太遲啦！
有隻黑色嘅巨手，從地面上嘅裂縫度伸左出嚟！向住呀茹同呀漢嘅位置一下咁抓落去！
“噗哧”一聲。。。呀漢就瞬間化為血霧。。。屍骨無存！呀茹亦因為呢一抓，而化為虛無。。。
我同呀峻見到呢個情況，就即刻退後到更遠嘅位置！
接著，一個巨大嘅黑色虛影，慢慢咁由裂縫之中爬出嚟！
佢一邊爬，一邊陰森咁笑住話
“桀桀桀。。。我終於都番出嚟啦。。。桀桀。。。”
我望住眼前呢隻野，完全唔知可以比啲咩反應好！
紅眼。。。有角。。。呢隻到底係啲咩嚟。。。！？