秦天晴 — 有鬼 新章《畫》正式展開: 洋娃娃 — 第七章
軒轅皓同凌嘯峰見秦天晴踎低執番條手繩之後，就跪左響個地下度不斷咁震，知道肯定係出左問題！
佢地兩個互望左一眼之後，軒轅皓就對凌嘯峰打左個手勢，示意佢留意住周圍嘅環境，而自己就單膝跪左響秦天晴身前，輕輕咁叫左聲“天晴！”
我望住忽然出現響我眼前嘅軒轅皓，我想開口話比佢知，我好似發現左啲不得了嘅野，但係當我擘大個口，就不斷咁震，根本連一個字都講唔到出口。。。
軒轅皓見秦天晴驚慌成咁，就伸出雙手噤住佢嘅膊頭，再望住佢嘅雙眼，然後使用催眠術嚟同佢講 “你望住我雙眼。。。放鬆啲。。。唔洗驚。。。有我響度。。。話我知發生咩事。。。”
聽到軒轅皓所講嘅說話，我望住佢雙眼，忽然有一種安心嘅感覺，個心唔再寒，個身唔再覺得凍，個人亦都慢慢咁冷靜落嚟，唔再響度震
我合埋雙眼，吸左一口氣，然後睜開雙眼認真咁問左句“呀峰啱啱有無閂門！？”
軒轅皓同凌嘯峰兩個對於秦天晴突然之間咁問，覺得有啲莫名奇妙，但係知道佢咁問一定有佢嘅理由，所以對視左一眼之後，就由凌嘯峰自己親口答“無丫，我見呢度咁凍，所以咪無閂門囉！”
聽到佢咁講，我嘆左一口氣，望住軒轅皓向上指左一指，然後爬番起身，而軒轅皓抬起頭望左一眼之後，就瞬間明白左秦天晴點解會有啲咁嘅反應！
正當佢諗住同凌嘯峰解釋嘅時候，身後突然傳嚟一下又一下嘅“咚！咚！”聲，而呢個聲音，係重物跌落地下先至會發出嚟！咁即係話。。。
軒轅皓一手拉住秦天晴，然後對凌嘯峰講左句“ 快啲走！”之後，就即刻向前衝
”哇！”我驚呼左一聲！因為我無諗過軒轅皓會突然之間拉住我跑，所以我本能反應咁瞬間捉住左凌嘯峰，而凌嘯峰就完全狀況外咁比我拉住左
結果就變成軒轅皓拉住我跑，我扯住凌嘯峰一齊跑，而凌嘯峰就糊裡糊塗咁跟住我地向前跑！
其實咁樣一個拖一個跑，係跑得好慢，所以當果啲“咚咚”聲離我地越嚟越近嘅時候，我個心真係急到不得了！我轉頭望左望，即刻忍唔住開口叫左句“凌嘯峰！你同我跑快啲！”
凌嘯峰對秦天晴無啦啦轉身吼佢，覺得有啲委屈，於是想學佢轉身對空氣吼一句，結果一轉身就見到。。。無數死屍響後面追住佢！
“哇！痴線架！有喪屍丫！”凌嘯峰慘叫左一聲，就甩開左秦天晴隻手，轉為伸出一隻手攬住秦天晴條腰，推動佢跑，同時自己都出力咁向前跑！
由於呢個隊形嘅轉變，我地嘅跑速馬上提升左好多！隨著我地不停咁向前衝，我地終於都跑到去一道鐵門嘅前面！
軒轅皓伸手想打開道門，點知道門比個鎖扣實左，無論佢點樣扯都扯唔甩！於是佢拎出枝警棍變成劍嚟砍，但係一樣都係砍唔開
我同凌嘯峰望住果堆慢慢向我地呢邊嚟緊嘅死屍大軍，一邊不斷咁話“嚟緊啦！”，“快啲啦”！，可惜我地點樣講都好，個鎖依然都係扣到實一實
眼見死屍大軍已經離我地得番十米遠，我轉身叫軒轅皓行開啲，再拍拍凌嘯峰指示佢讓開少少，然後抽出腰間嘅九節鞭，對住個門鎖默唸口訣 “縱打一條線，橫打一大片，縱掄橫打，威力無邊” ，之後狠狠咁抽落去
“同我破！”隨住我嘅大喝一聲，“啪”！門鎖瞬間碎裂倒地！
我即刻衝去推開對門，然後轉身對佢地大叫“快啲走！”，軒轅皓同凌嘯峰即時衝出嚟！之後我地即刻將對門閂番埋！而為免佢地會推開對門，我將條九節鞭拎住嚟當鎖鏈，將道門嘅兩個門柄扣住！
直到軒轅皓唔知響邊度拎左塊木板番嚟扣實左之後，我先至將條九節鞭解開，然後坐左落個地下度喘氣
而響我休息緊嘅時候，軒轅皓對凌嘯峰指一指前面唔知講左啲咩，然後佢地兩個就神色凝重咁望住我
一見到佢地呢個眼神，我就知道前面肯定係無好野。。。
唉！其實佢地唔講，我都大概知道係啲咩。。。因為呢度天窗比較多，光線都算充足，所以我幾乎都可以睇清楚前面嘅野，而個重點係，空氣之中一直傳嚟陣陣嘅燒肉味。。。
呢度。。。就係煉製屍油嘅地方！
我從地下度企番起身，瀟灑咁拍一拍佢地嘅膊頭，然後同佢地講 “我諗呢啲已經死到不能再死，應該唔會爬番起身追住我掛！雖然係有啲嘔心。。。最多短期內唔去燒野食囉。。。” 講完，仲附上一個牽強嘅微笑
其實我內心係響度喊緊。。。嗚嗚。。。點解次次都要見埋啲咁嘅野丫
軒轅皓知道秦天晴響度扮堅強，為嘅係唔想拖佢地後腳，令到佢地難做，而一直去勉強自己，“唉。。。”忍唔住嘆左一口氣，如果比“佢”知道天晴受左咁多驚嚇，一定心疼死“佢”，到時都唔知會唔會同我反面！
凌嘯峰唔知道軒轅皓嘅內心交戰，只係聽到秦天晴話OK，就捉住佢行過去！反正有咩事都有我地響度，唔洗驚喎！神經大條嘅佢，根本就唔會諗到咁多！
我跟住凌嘯峰行到去製煉屍油嘅地方，果度放左無數塊微微傾斜嘅大鐵板，而鐵板嘅下方，係一堆堆已經熄滅嘅炭灰，至於鐵板嘅上方，就放左一具具已經面目全非嘅屍體，而根據屍體嘅死狀，可以勉強咁睇得出佢地都曾經有掙扎過！
我望住眼前嘅焦屍，再諗番起啱啱見到果班活死屍。。。瞬間明白左。。。原來落《拘魂咒》就係為左咁。。。
《拘魂咒》令到佢地個靈魂封鎖左響個身體入面，無論個肉體受到啲咩傷，個人根本就無辦法死去！
製造者將佢地雪到僵硬晒，然後直接放上去燒紅左嘅鐵板上面，令到佢地眼白白咁見住自己個肉身不斷咁被燒，燒到出晒油！雖然佢地已經唔會覺得痛，但係精神上面嘅折磨，令到佢地充滿住不甘同埋仇恨！
直至煉成屍油之後，製造者先至將佢地帶住怨念嘅靈魂抽出嚟，再封印響個裝滿自己屍油嘅樽仔入面，然後利用驅鬼術驅使佢地出去害人！
殘忍。。。！非常之殘忍！到底係啲咩人要咁樣做！
我地兩個默默咁望住眼前嘅呢一切，而軒轅皓就行埋嚟我地身邊，淡淡咁講左句 “呀峰，通知總部，將呢個地方清左佢！”
“啪，啪，啪！” 隨著軒轅皓話音一落，我地嘅背後突然傳嚟三下鼓掌聲！
接住，一把低沉嘅男聲講左一句說話
“你地擅自闖入嚟，仲要通知人嚟掃左我嘅地方，會唔會太過份呢？”