秦天晴 — 有鬼 新章《畫》正式展開: 貓妖 — 終章（下）
大戰過後，現場再次回復一片寧靜，而呢個時候，一把哀痛絕望嘅聲音打破左呢個寂靜嘅環境
我轉頭望過去，見到呀龍佢地帶住一個人行緊過嚟，而果個人，就係我之前見過嘅果個老伯。。。
老伯一邊慢慢咁行過嚟，一邊用哽咽嘅聲音叫住“阿黃。。。阿黃。。。”
我地望住佢一步一步咁行到貓妖嘅身邊，然後撲向貓妖嘅身上，再用雙手緊緊咁抱住，同時個咀不斷喃喃自語咁話
“阿黃。。。無事架。。。阿黃。。。乖。。。”
“阿黃。。。你會一直陪住我架。。。”
“阿黃。。。快啲起身。。。”
我地靜靜咁聽住佢同貓妖講嘅每一句說話。。。
突然，佢抬起頭對住我地歇斯底里咁話
“你地！都係你地！你地全部都係衰人！你地害死左我阿黃！你地點解要幫果班人！點解！？佢地全部都抵死！你地知唔知佢地周圍作惡犯事！周圍欺壓我地啲老人家！你地睇下。。。”
講到呢度，佢突然伸出雙手拎走左佢頭上面果頂帽！而隨著佢呢個動作，令我心寒嘅一幕再次出現！
老伯個頭竟然穿左一個大窿！個窿大到可以清楚見到裡面嘅腦袋同腦漿！而且裡面仲夾雜左無數咁多條又肥又大嘅蛆蟲，佢地響啲腦漿入面不斷咁爬嚟爬去！
最重要嘅係，無左頂帽嘅阻攔，啲蛆蟲已經開始一條一條咁跌晒落地！然後帶住啲腦漿響地上面爬行！
呢個超級嘔心嘅影像，衝擊力仲大過上次個人體解剖！至少上次果個人唔會郁，而呢個老伯仲係識行識走識講野！呢個情境將我震撼到連呼吸都無辦法再繼續！
我望住眼前果幾條向住我爬緊過嚟嘅肥蛆蟲，雙腳不斷咁抖震！
突然，眼前一黑，有一隻溫暖嘅手遮住左我雙眼，令我個人愕一愕然，而耳邊就傳嚟軒轅皓嘅聲音，佢溫柔咁話
“合埋隻眼，唔洗驚。。。有我響度。。。合埋隻眼。。。無我嘅指示。。。唔准打開。。。”
我聽到佢咁講之後，唔知點解個眼皮好似越嚟越重咁。。。雙眼不由自主咁慢慢合埋，然後我就咩都唔知道。。。
軒轅皓見秦天晴中左佢嘅催眠術之後，就對凌嘯峰打左個眼色，示意佢帶走秦天晴，然後就同老伯講
“善有善報，惡有惡報，若然未報，時辰未到，無錯！你嘅死係好不幸，但係佢地有佢地嘅因果，唔應該由你地去結束！仲有害死貓妖嘅唔係我地，而係你！”
老伯聽到軒轅皓咁講之後，即刻話
“我咁愛鍚佢！我點會害佢！”
軒轅皓聽到佢咁講，就冷冷咁回佢一句
“你錫佢？你錫佢就唔會留響人間！本來貓妖嘅主人死左之後，貓妖就會搵下一家主人繼續去修練！而本應已經變成鬼嘅你，就應該去陰間報道，但係你無！你要留響人間！你要貓妖幫你報仇！”
老伯情緒激動咁反駁 ”我無！！你亂講！！！”
軒轅皓冷笑一聲，然後繼續話
”我亂講！？如果唔係你要報仇嘅話，貓妖會走去殺人？你知唔知為左完成你嘅心願，將你復活嘅代價係咩？係將佢畢生嘅修為差唔多交晒比你！最後搞到修仙不成，仲犯左殺孽！永不超生！”
“永不超生”呢句說話，好似一條刺咁打左入去老伯嘅心間，諗起自己同阿黃生活嘅點點滴滴，諗起因為自己唔甘心，化成鬼都唔肯離開，要阿黃幫佢報仇，結果搞到而家咁，感到無比嘅後悔，佢伸出一隻手，慢慢咁撫摸住貓妖漸漸冷卻嘅身體，輕輕咁講左句
“對唔住。。。阿黃。。。”
然後倒伏響貓妖嘅旁邊，變成一具永遠都唔會再移動嘅屍體，而貓妖，亦都變番一隻普通嘅貓，永遠陪伴於老伯嘅身邊。。。
“天晴，可以張開眼啦！”軒轅皓嘅聲音再次從我耳邊響起，我即刻睜開雙眼！
咦！？老伯呢？貓妖呢！？點解我會坐左響個公園度嘅！？我明明係企響度架！？
“呀皓，老伯同貓妖呢？仲有為食狗呢？點解我會響度？”我完全好似失左憶咁斷左片，咩都諗唔起，於是直接開口問軒轅皓
軒轅皓見到秦天晴皺住眉頭咁抓左幾下頭，之後周圍望，然後一臉傻樣咁問自己，就覺得好搞笑，雖然自己就係搞成佢咁樣嘅兇手，但係絕對唔會話比佢知，於是就話
“哦，果個丫伯同隻貓妖已經死左，果隻狗比凌嘯峰帶左去療傷，至於你。。。”
講到呢度，佢停一停，然後無比認真咁話
“你啱啱比啲蟲嚇暈左！”
下！？唔係掛！？我嚇到暈左？雖然啱啱果個情況係好嘔心，而我又真係好鬼驚，但係。。。
我望一望軒轅皓，佢個樣咁認真又唔似講笑喎。。。
就響我胡思亂想嘅時候，為食狗跑到我面前，“嗚嗚”咁叫左兩聲，我低頭一望，見佢身上所受嘅傷都已經包紥好，就想伸手去摸下佢個頭，點知隻手伸到一半，就比軒轅皓捉住左
我不解咁望住佢，而佢就淡淡咁話
“佢唔係一隻普通嘅狗，危險！”
聽到佢嘅說話，我望一望地上面嘅狗狗，而狗狗望住我停左響半空嘅手，就即刻好似之前咁，反轉個身，四腳朝天，然後一邊滾來滾去，一邊“嗚嗚”叫
再次見到佢呢個咁得意好笑嘅行為，令我諗番起之前見到貓妖殺人果時，驚到唔識走，係多得佢叫醒左我，我先至避過一劫，而今次，如果唔係有佢響度，我諗就算我對貓妖出到咒術，都可能會因為閃避唔切佢嘅攻擊而受傷。。。所以。。。
就算狗狗係一隻妖怪，一隻猛獸都好，佢響我心目中，仍然仲係果隻為食狗
我望住佢，輕輕咁叫左一聲“為食狗”，狗狗佢即時彈起身望住我，我對佢笑一笑，就繼續話
“多謝你一次又一次咁救左我！你願唔願意跟我番屋企？”然後我對住佢張開雙手
狗狗眼定定咁望住我，似乎響度考慮緊跟唔跟我走，望左陣之後，又眼定定咁望住某個地方，我見佢望得咁入神，於是我都好奇咁跟住佢望過去，但係果度乜都無。。。
過左陣之後，佢好似下次決心咁，對我“汪”左一聲，就跳起撲上嚟坐響我嘅大脾度，我就攬住佢響度呵呵笑
軒轅皓望住秦天晴，腦海入面突然之間諗起左一個人，無奈咁搖一搖頭，內心好感嘆咁話
“果然係一家人，一樣天不怕地不怕。。。”
而呢個時候，凌嘯峰走過嚟同軒轅皓講左聲
“呀頭！搞掂啦！”
軒轅皓對凌嘯峰點點頭，“嗯”左一聲，就對住同隻狗玩得不亦樂乎嘅秦天晴講“走啦，天晴！”
聽到軒轅皓叫我，我“哦！”左一聲，就抱住狗狗起身行，同時一邊行，一邊問佢
“為食狗，你識噴火架？不過好在你及時出現咋，如果唔係我就慘啦。。。”
為食狗聽到秦天晴咁講，就即刻跳左落地，然後望住某個地方，極為哀怨咁話
“唔係我呀！我唔識噴火，火係果個衰人放架！仲有我一早就響度，想出嚟幫你，但係果個衰人捉住我唔比我出嚟咋！” 佢講得七情上面咁，只可惜。。。
我望住為食狗響地下度唔知發咩神經，係咁“汪汪，汪汪”叫，心諗“唔通佢好肚餓？”，於是就踎低摸摸佢個頭，同佢講“乖，一陣買野比你食！”然後就繼續行
為食狗見秦天晴聽唔明自己講乜，仲以為自己係肚餓，表示非常委屈，但係眼見秦天晴已經越行越遠，就唯有向某個地方瞪左一眼，然後快速咁追上去
而藏響某處嘅某人，見到隻狗走前瞪左自己一眼，有啲好笑咁低聲講左句
“想向晴晴投訴我，你修練多幾百年先啦！笨狗。。。”