[港版無限流][長篇] 恐怖輪迴: 殭屍戰爭～犧牲

「原來係你哋，我哋大家冇咩心仇大恨，任務又冇衝突，不如放我哋一條生路吧。」雖然不抱期望，但林默仍試着問道。

「對唔住，身為隊長，我要為隊員負責，我哋6號隊已經弱勢太耐，所以我唔可以放過任何可以提升我隊員實力嘅機會。而你哋對我嚟講，就係一堆移動嘅冥幣。」秦輝搖頭說道。

「哼，講到好似已經食硬我哋咁。」王儀冷笑道，雙手握緊連弩。

「唔係好似，係直程食硬你地。」洪定笑著道。

「自己被包圍都唔知，12號隊未免退步得太快喇呱。」一個矮個子女孩從另一邊樹林出現。





「爆炸完之後，個男嘅好似受咗內傷喎。」另一瘦削男子出現在馬車前方。

「唔係呱，咁剩係隊長都攪得掂啦，我哋洗鬼出場。」一位身材高挑的御姐出現在女孩身旁。

「九成九係個男嘅為咗保護兩個女，結果因為直接承受爆炸㗎衝力而受傷啦，果然係懷柔作風。」一名手握太刀的男子一臉陰沉地站在秦輝身後。

「哈哈哈，洪定個衰仔係有啲腦，雖然有時係臭串咗啲。」一名壯漢此時也在馬車後方出現。

林默3人已被6號隊眾人包圍。





「唔好講咁多，趁佢病攞佢命，唔好俾佢哋有恢復㗎時間，一起上。」洪定大叫道。

「哈，咁我唔客氣喇。」壯漢手中多了一把斧頭，向林默3人衝過來。

「你敢？！」林默大怒，全身再次金光乍現，舉掌迎向壯漢。

兩者接觸的瞬間，一陣爆破衝浪從二人中央處向四周展開。

「你哋兩個快走，走得一個得一個。」林默大叫道。





「林大哥……」喬欣還想說甚麼，但來不及説便被王儀拉走，向林默方向突圍。

四面伺敵，秦輝那邊不用想，單單秦輝1人便可以留下他們3個。

那名馬車前方的瘦削男子，能夠被委任獨自1人守下1個方位，實力應該也不簡單。

另一邊，女孩很弱，但那御姐使人感覺很危險，像是6號隊除了秦輝以外的第二高手。

因此，最有可能突圍的方向，反而是受到林默阻撓的壯漢。

「兩個女嘅諗住向古力嗰邊突圍，唔好俾佢哋走。」洪定見狀，立刻大聲道。

「收到！」6號眾人齊聲道。

秦輝身後的陰沉男子拿著太刀欲刺向喬欣，王儀見狀立刻舉弩相迎。





「爆裂箭！」

「龍刺！」

一紅一黃兩道光束相撞，更激烈的爆破沖浪向四周擴散，煙霧彌漫。

王儀胸口被刺了一個大洞，而那陰沉男子也被炸得沒了下半身。

喬欣立刻發出綠光為王儀治療。

「你快啲走，唔走我哋都會死。」王儀怒罵著。

「我唔走！憑咩次次都係要我被保護？見住對我好嘅人一個又一個犧牲，而我又乜嘢都做唔倒。」喬欣此時已淚流滿臉，不甘地大叫道。





「好簡單，因為實力弱就要面對呢啲情况，唔變強就會被淘汰。」陰沉男子說道，此時他的下半身正被女孩所發出的紅光慢慢修復著。

「冇錯，我同隊長遇過太多呢啲場面，所以深知一落後就要捱打㗎道理。」御姐也感慨地說著，慢慢走過來道「不過放心，大家都係女人，我可以保證你哋有一個痛快㗎死法，唔會受到任何折磨。」

林默見狀立刻雙腿發力，衝向御姐那邊。

「碰！」

林默倒地，口中不斷吐血，雙眼漸漸無神。

「唔好怪我，我唔可以再失去任何隊員。」秦輝站在林默身旁，冷冷地道。

「12號隊二階試煉者林默被擊殺，12號隊各人被扣除4000冥幣。」

當聽到冥主的提示後，喬欣整個人頓時陷入崩潰，失聲痛哭起來。





王儀也深知難逃一劫，咬牙一緊，手中拿著幾顆深紅色的水晶衝向女孩及陰沉男子那邊。

「係爆晶石，小心！佢要玩自爆呀。」洪定大叫道。

秦輝大驚，立刻瞬移到女孩那邊。

「碰！……碰！……碰！……」

爆炸威力很大，把地面炸成一個深坑。

「所以話唔好得罪女人，癲起上嚟唔係人咁品。」秦輝大口吐著血道。

「呵呵，隊長先係救咗我，宜家又救咗小芬，你想我哋點報答你？」御姐以曖昧的眼神看向秦輝。





「你哋保護好自己就係最好㗎報答。」秦輝沒好氣地說。

「12號隊一階試煉者王儀身亡。」冥主提示再次出現眾人腦海。

「白白冇咗2000冥幣……」洪定無奈道。

「咁就快啲攪掂埋個女人就可以收工走人。」壯漢古力走向喬欣那邊說道。

但當他走出兩步後便皺著眉頭停了下來。

大地在顫抖。

只見不遠處，教皇庇護九世正帶著數千聖騎士向這邊走過來。

「冇理由，教廷㗎人點解會嚟，仲要咁大隊人馬，佢哋3個冇可能有咁大份量。」洪定皺眉道。

「細路，教廷㗎人唔係為佢哋3個嚟。」

眾人這時才發現他們身旁不知何時坐著一位身穿布衣的老頭。

「請問閣下來自邊一到？」秦輝小心奕奕地問道。不由他不害怕，完全瞞過所有人的感知，很明顯是一位高手，只是不知是敵是友。

老頭笑了笑道「老夫來自羅馬尼亞。」