[港版無限流][長篇] 恐怖輪迴: 公屋驚魂～天雷

公園廣場

「放下屠刀，立地成彿。」

話畢，又有數十名怨靈化為灰燼。

但儘管如此，圍攻凌天等人的一眾怨靈仍然有增無減。

「我哋仲要撐幾耐呀？」喬欣一邊撐著聖光盾，一邊吃力地問道。





「仲有2個半鐘…」李文一邊掃著拂塵，一邊在怨靈之間遊走，略顯疲憊地說著「宜家直程就係用緊呢啲嘍囉嚟消耗我哋嘅體力，到時隻大嘢出嚟，我哋大家一起奶屎都似。」

「但就算係咁都冇辦法。」蘇琳發出數枝銀針把數隻怨靈擊退後，再以針線護著喬欣與何芬，無奈地說「不過話時話，林軒同林恩佢哋宜家喺邊？」

「唔清楚，不過佢哋應該死唔去，我哋攪掂咗我哋宜家要面對嘅處境先。」凌天揮舞著聖魔刃把數隻怨靈斬下後，再玩了個刀花，隨手把準備從背後偷襲的一隻怨靈擊弊，平淡地説著。

「啱呀，攪掂咗我哋自己實際啲，隻大嘢宜家好似出嚟喇。」李文把拂塵掃了一圈後，平靜地收了起來，一改之前的猥瑣形象，轉變成一派仙風道骨的模樣。

此時四周的怨靈開始向後退去，漆黑的天空慢慢演變成暗紅色，並發出一陣悶悶的雷聲。





「碰！」

商場外面突然響起一聲巨響，一個龐大的灰黑色拳頭從商場地下的保安控制室打了出來，並慢慢由向廣場方向移動。

這個灰黑拳頭約有公屋住宅的2層高度，並隱隱有著變大的趨勢。

凌天與李文同時站在眾人的前方，凝望著那碩大的拳頭。

「呢隻究景係咩嘢嚟？」李文皺著眉問道。





「呢條村嘅村長掛，比我想像中大隻。」凌天無奈地説著。

「隻嘢宜家過緊嚟，我哋應該點做？」喬欣看著那緩緩逼近的灰黑拳頭，咽了咽口水，擔憂地問道。

「仲有咩點做，殺到埋嚟，咪唯有同佢打翻場囉。」凌天冷笑地説著「隻嘢宜家得個拳頭，睇過款，應該係想爬埋成個身出嚟。我同李文負責擋住呢隻大舊衰，蘇琳同喬欣幫手擋住其他怨靈，何芬就自己執生啦。」

「呵呵，繼上次殭屍戰爭同6號隊打完之後，我同天哥你又一次俾人逼上梁山喇。」李文拿出了一柄警棍，微笑説著。

「唉，廢話少講，拖住隻嘢拖得幾耐得幾耐。」凌天嘆了口氣説著，然後從儲物空間中拿了一箱彿珠出來。

*******

商場天台

林軒坐著一張黑色小椅子，喝著咖啡，悠閒地看著下方凌天等人的戰鬥。





「少爺，我哋唔去幫手？」林恩拿著纓槍走過來問道，而其身後本來跟著她的黑衣西裝服男子卻只餘下4名。

「唔洗住，凌天同李文嘅底蕴唔只表面嗰浸咁簡單，我想喺下場團戰任務之前，儘可能逼出佢哋2個啲底牌。」林軒嘆了口氣説著「記住一句話，永遠唔好睇小天下英豪呀。」

「哦。」林恩似是而非地點頭回應。

*******

公園廣場

「喬姐，預備喇，啲怨靈停曬喺同一個水平線到，好似隨時準備一起發動衝鋒咁。」蘇琳凝重地說著。

「嗯，就照返平時咁啦，我防守，你攻擊，盡可能唔好俾啲怨靈埋去隊長同李文佢哋兩個身。」喬欣握著拳頭，贊同地說著。





何芬則站在喬欣背後，沉默不語，暗自怨恨自己實力的不足，心中渴望提升力量的需求也越來越熾熱。

「吼！」

突然一聲震耳欲聾的吼叫聲從灰黑拳頭傳出，隨之而然，包圍著廣場的怨靈也開始怪叫起來，並向凌天等人跑去。

「咁快開波？！小匈子，幫手擋住啲怨靈先。」李文急忙指揮道，然後對著凌天説「天哥，祝我哋好運喇。」

「嗯，願彿祖與你同在。」凌天平淡地説了句，然後合實雙手，自顧自地念誦經文。

李文聽了這句不正統的祝福，不禁白了一眼，然後在自己手指頭狠狠地咬了一口，並把流出的血液塗向警棍上，厲聲地說著「臨，兵，鬥，者，皆，在，列，前。天雷，降！」

說罷，一道粗粗的黑氣從警棍發出，直接射向半空。

半响，暗紅的天空中出現了一個漆黑的漩渦，一道暗黑的雷電從漩渦中發出，並狠狠地劈向灰黑拳頭處。