[港版無限流][長篇] 恐怖輪迴: 公屋驚魂～可疑時間

看到紙上的話，凌天及李文均抬頭看向閉路電視方向，之後2人瞳孔均收縮起來。

閉路電視大部份地方的畫面都很正常，除了左下方那顯示著控制室門外的一格畫面，因為那裡無故出現了一位老太婆。

這位老太婆目無表情，只是在控制室門外，呆呆地看著閉路電視鏡頭方向，然後手中慢慢從背後拿出一顆又一顆人頭。

這些人頭是誰？他們便是從保安控制室中消失的幾位新人。

「佢係向我哋施嚇同示威？！」李文臉色難看地低聲說道。





「應該係，但佢宜家既然喺門出面，之前又可以無聲無色咁帶走啲新人，咁點解佢宜家唔重施故技，或者直接殺入嚟？」凌天托著下巴，皺眉說著。

「呢層我都諗唔通，會唔會係因為隻嘢能力太強，所以冥主用規則限制住佢，令佢冲唔到入嚟？」李文也皺眉地分析道。

「嗯，但亦都有可能隻嘢本身冇我哋想像到咁強，只係用咗啲取巧方法嚟捉走啲新人。」凌天點頭回應，然後說出了另一種可能性。

「就算係取巧，但都已經好大穫，而最大問題係我哋唔知隻嘢用咗咩方法入嚟。」李文搖頭説道。

「喂，你哋兩個麻甩佬鬼鬼崇崇咁喺到傾啲乜呀。」喬欣突然從背後問道，其後蘇琳與何芬也一臉好奇地看著他們。





凌天與李文互看了一眼，然後同時無奈地笑了笑，決定向3名女士解釋事件的緣由。

聽到2人的話，3女的臉色均同時難看起來。

喬欣看了眼閉路電視中的老太婆，再轉頭看了看身後的控制室大門，皺眉問道「既然係咁，林軒條仆街喺白紙上面仲講咗啲乜。」

聽到此話，眾人的注意力再次回到紙上，只見其第2句話寫著「很驚恐？不用怕，留意閉路電視右下角。」

眾人立刻再次抬頭，看向閉路電視右下角方向。





半响

「唔覺有咩特別喎，右下角嗰格畫面係影住公園嗰邊，嗰到咩都冇。」李文奇怪地說道。

「咪住，凌天，我只係昏迷咗幾個鐘？」蘇琳皺眉地向凌天問道。

見到蘇琳突然焦急地發問，凌天感到有些愕然，說「係呀，妳巡完之後到宜家都只係過咗幾粒鐘。」

「但我巡邏嗰日明明係8月17號朝早7點，但點解閉路電視右下角會顯示8月27號凌晨2點半嘅？」蘇琳聽後，一臉驚訝繼續問道。

眾人愕然，全都再次同時轉頭看向閉路電視右下角方向，果然與蘇琳説的一樣，那裡顯示的時間正是8月27日凌晨2時32分。

「咁啫係意未住啲咩？」喬欣有些不知所措地問道。

「睇埋林軒有冇再講其他嘢先啦。」李文皺眉地說著。





說罷，眾人再次把注意力轉移到紙上，只見上面寫著「察覺到吧，我想你們也知道時間的問題，此乃上面的規則，室外怨靈只是奉命行事。緊記，凌晨3點前離開控制室，否則必有大禍。」

「上面規則？上面係咩意思？」何芬疑惑地問道。

「仲有邊個咁把炮呀，咪只有操控住我哋生死㗎冥主囉。」凌天冷笑地説著「呢吓成件事就講得通喇。」

「冇錯，應該係冥主暗地設下規則，喺某段時間段定期刪除咗我哋所有人嘅記憶。」李文點頭說道。

「嗯，由於刪除記憶嘅關係，所以我哋大部份人潛意識咁認為今日仲係進入任務世界嘅第1日，但現實中其實已經過咗10日。」凌天贊同地説道。

「咁啫係亦代表住，由於刪除記憶嘅關係，10日內所發生嘅嘢，我哋大部份都唔記得，當中更包括新人出面被殺時，冥主嘅提示音。」喬欣恍然大悟地說著。

「啫係話門口出面嗰隻怨靈嘅實力，其實一啲都唔恐怖，佢只係等啲新人出去巡邏時，順手執咗佢哋嘅屍體返嚟。」蘇琳也點頭說道。





「冇錯，佢嘅作用只係俾我哋造成一個佢實力好強，可以無聲無色咁帶走啲新人嘅錯覺，目的應該係想我哋舉棋不定，唔敢離開控制室，然後直接面對林軒所講嘅3點鐘大禍。」凌天點頭冷笑回應「因為用規則限制住咗個大禍出現嘅時間，咁就唔會存在敵我實力差距過大嘅問題，亦都冇犯下自相矛盾嘅邏輯謬誤，冥主呢招玩得陰呀。」