[港版無限流][長篇] 恐怖輪迴: 公屋驚魂～睇好妳

「多謝讚賞，不過希望你之後唔好亂咁將我當炮灰咁拋棄。」何芬點頭説著。

「呵呵，本少似啲咁嘅人？」李文回復本性，淫笑問道。

「你想聽真話定假話？」何芬微笑反問。

「真話先啦，聽吓其他人意見，個人比較冇咁固執。」李文想了想，微笑說著。

何芬聽後，收起了笑容，認真地說道「你絕對係咁嘅人。」





「哦？此話何解？」李文一臉好奇地問道。

「我哋12號隊主要3個話事人，你，隊長同林軒。坦白講，我一開始想隊長嚟救我，除咗係佢個樣比較討好外，最主要原因係因為佢嘅性格屬於外冷內熱，只要係俾佢認同嘅同伴，被拋棄嘅機會係最細，所以亦相對上係最安全。」

「林軒份人我未睇得透，不過佢俾我嘅感覺，埋佢堆嘅門檻應該係3個入面最高，而且感覺佢心計太重，唔啱我口味。」

「至於你，可以話係3個入面最易看透嘅一個，亦都係最為心狠手辣嗰個，時刻以淫笑表情同放蕩行為掩飾自己嘅野心同欲望，道德底線嘅下限相對上比另外兩位低。」

「以一個比較貼切嘅比喻，隊長就似係平原上嘅一隻獅子喺到領導大家，壯大族群。」





「林軒就係一隻獵鷹，可以多角度咁睇清全局之餘又有獨特嘅自保同獵殺手段。」

「而你，就係潛伏喺平原上嘅一條蟒蛇，貪吃，不斷狀大自己嘅身體，但又隱忍不發，等獅子同獵鷹鬆懈時，嚟一個致命一擊。」

「呵呵，個比喻幾得意，既然咁講，點解妳仲要跟我呢？」李文繼續好奇地追問著。

「嗯，呢個有好多個原因喎，例如你救咗我，當回報，咪跟你囉。又例如隊長嗰邊比較多人，我喺到相對上比較易啲發圍。又或者，宜家我唔跟你，怕你會即刻滅我口等。」何芬一臉皺眉，沉思地說「不過最主要係，動物界又唔係冇蟒蛇咬死獅子鱷魚嘅例子，跟你話唔定比較有前途呢。」

「呵呵，咁你可以放心，我唔單只唔會將妳當炮灰咁用，仲會去重點栽培妳，我要嘅係一個精明嘅手下，而唔係聽話嘅廢物。」李文微笑地說著，但其眼神卻冷了起來「至於精明嘅定義，我諗唔洗講妳都知㗎啦。」





「呢個當然，我都算係半個明白人，總之跟得你嘅，辦事能力宜家唔敢講，但基本分寸起碼都知，絕對唔會有背叛嘅情況。」何芬恭敬地點頭說道。

「好喇，嚴肅話題到此為止，講返啲輕鬆㗎啦，之前講完真話，宜家講返啲假話俾我聽啦。」李文回復其猥瑣的樣子，淫笑地說道。

「嗯……」

「喂，精明，記住要精明。」李文皺起眉頭說著。

「好啦，你心胸廣闊，慈悲為懷，絕對唔係嗰啲亂咁將人當炮灰拋棄嘅仆街。」何芬面對著強權，唯有一臉無奈地說著違心話「好似你呢啲咁出色㗎男人，即使不斷做出一啲放蕩㗎行為，但你嗰對憂鬱嘅眼神，已經深深咁出賣咗你，無數異性亦都因為咁而俾你嘅魅力吸引住，隊長同林軒佢哋只不過係因為眼紅你。」

「好，講得好，後生可畏，有前途，妳係我進入空間之後唯一一個肯講出真相嘅人，我睇好妳。」李文聽後一臉感動地説著「再講多啲俾我聽。」

「啊……我今朝好似食錯嘢，宜家好似有啲想嘔。」

「既然唔舒服，咁就冇辦法啦，快啲返去控制室嗰邊先，宜家應該只有嗰到係安全㗎喳。」李文揮著手，大方地笑著說。





「好。」何芬回應了一聲，便走出門口，離開天台。

看到其走後，李文臉色卻瞬間冷了下來，轉頭看向正在奮力戰鬥中的保安老伯，臉上露出了一絲殘忍的笑容。