[港版無限流][長篇] 恐怖輪迴: 東土殺戳～陽謀

北平 汴京

一處海岸上

秦檜從海中跑至岸邊，拖著斷了一半的左手，一臉森然，暗道「究竟不動明教班人係咩來頭，完全冇任何關於佢哋嘅背景，突然間無聲無色咁走出嚟就打退冥界同朝廷嘅軍隊。」

他一臉凝重地走回皇宮，向皇上寢宮方向走去。

「秦相國，皇上宜家已經休息，有咩事不如等聽日上朝再講啦。」在寢宮門外的李公公對著秦檜説著。





「我有急事啓奏，請李公公同皇上禀報一聲，記住講明係急事。」秦檜臉無表情地說著。

「好吧，咁你等一陣。」李公公無奈，唯有向宮內走去。

秦檜看著李公公離去，暗道「要儘快通知冥界嗰邊即刻出兵，朝廷艦隊大敗，不動明教班人好有可能會從海路進攻京城。」

「秦相國，皇上叫你入去。」折返回來的李公公陰聲說著。

「嗯，請帶路。」秦檜平靜地說。





秦檜跟著李公公走向御書房方向，二人在房門前停了下來。

李公公轉過身，雙眼變成血紅色，對著秦檜問道「殿下，温州嗰邊出咗事？」

「你見我咁嘅身勢返嚟就知咩事啦。」秦檜白了一眼道。

「嗯，大祭司喺尋日已經上咗趙構身，你可以放心入去同佢傾。」李公公點了點頭說。

「叫個衰仔入嚟啦。」趙構的聲音突然從御書房內傳來。





秦檜露出苦笑，走進房內，向坐在椅子上的趙構跪安。

「殿下，你唔需要向我行禮。」趙構笑著説。

「呢啲係晚輩應做嘅。二叔，既然你上咗趙構身，應該知道宜家發生緊咩事，你有咩睇法。」秦檜站起來問道。

「武兒，你今次的確衝動咗喇，温州一役戰敗令到我哋宜家好被動。」趙構凝重地說「我唔知係咩人布呢個局，但佢好明顯係想阻止我哋攻入人間，所以布咗一個陽謀。」

「咩陽謀？」秦檜皺著眉頭問。

「詳細我講唔清，但感覺到布局㗎人係為咗阻止我哋入嚟人間，所以之後佢應該會施展一連串殺著。我哋宜家得兩個選擇，一係放棄攻入人間，等千年之後再作打算；一係計劃依舊，全面接受對方嘅殺招。」趙構平靜地說。

「咁根本唔洗考慮，我哋九黎幾時驚過戰鬥。」秦檜冷笑道。

「哈，呢個當然，咁我哋幾個就睇下對方會點做。」趙構欣慰地笑著。





「殿下，大祭司。」門外的李公公突然低聲叫道。

「咩事？」趙構皺著眉問。

「啱啱收到500里快馬加急，以韓世忠為首，北面邊彊所有將領全部向金人投降。宜家完顏昌帶住近百萬金兵長驅直入，預計十日後抵達京城。」李公公低聲地説著。

「韓世忠唔係好憎金人㗎咩，點解會向金人投降？」秦檜不可思儀地問道。

「突然咁反常，不外乎有利可圖，睇嚟對方已經開始出招喇。」趙構冷冷地說著「雲萊，你即刻用後山㗎黃泉之路返去通知冥界，叫佢哋即刻出兵。」

「遵命！」李公公恭敬地說。

「蚩武，你派人通知所有喺人間嘅冥界軍隊即刻返嚟京城回防。」趙構繼續命令道。





「遵命！」秦檜也立刻答應著。

「嗯，只要保住黃泉之路不失，勝利就會屬於我哋。」趙構點頭説著。

*******

凌天睜開雙眼，發現自己正躺在一處草地上。

「天哥終於醒喇，好咯，我終於可以返去陪林恩妹妹咯。」李文這沒心沒肺話語突然大聲地傳來。

凌天坐直身子，摸著額頭問道「呢到係邊到？今次我又暈咗幾耐？」

「呢到係靜江，你今次暈咗20日。」林軒站在不遠處平淡地說。

「有冇人可以同我講吓我暈咗嘅呢段期間發生咗咩事？」凌天繼續問。





「我都想知，點解本來圍攻緊靜江府嘅冥界軍隊會突然撤走？跟住你哋嗰幾個新人又去咗邊？」喬欣冷冷地向林軒問道。

「佢哋宜家另有任務，仲有我任務前已經一早講明咗佢哋係炮灰。」林軒平淡地説。

聽到此話後，凌天立刻四處觀看，卻沒有見到蘇琳的身影，不由問道「嗰幾個新人宜家咩境況？」