《新月派仙術奇譚》之《毒撚•女神•百鬼夜行》: 9. 鯊魚

「哼，九叔嘅徒弟只得咁多斤兩？」接著出現的是女法醫，她蹲在黑貓旁邊把它包在懷裡。

木仔強作鎮定說：「你是邊個？」

「作為法醫，我係Dr. Lily Li，同時，我又係你師姐，九叔都係我師傅。」

「都係？我唔係囉，九叔唔肯收我呀。」

「點解嘅？」





「唔知，總之佢話呢世都唔再收徒弟喎！」

Lily嫵媚地笑說：「呵呵，係咩？sorry喇⋯⋯」

接著殭屍們又再動起來，把木仔抬起來丟到4號房門外的走廊上。木仔狼狽地站起來抬頭一看，剛才4號房門口的位置現在只是一幅牆壁，沒有門。

他摸著牆壁，狐疑地嘮叨：「4號房呢？消失左？」

「呢度邊有4號房㗎，攞完報告就走啦，想溝我咩。」看門口的阿姨在他身後打掃走廊，喃喃自語。





木仔當堂倒抽一口涼氣，心想：「此地不宜久留！」

正想轉身離開之際，阿姨又開口了：「喂，地下碌棍係唔係你㗎？」

木仔迅速撿起伸縮警棍，狼狽不堪地離開了儉房。

他跑到儉房外面不遠處，伏在馬路邊的欄杆稍作休息。他現在就像是剛跑完馬拉松一樣，汗如雨下，氣喘如牛。過來十幾分鐘，他終於稍微平復下來。抬頭一看遠處的大海，他忽然意識到自己簡直就是滄海一粟那麼的渺小。

兩天前，木仔第一次接到談判組的任務時，心情莫名興奮，他原本以為可以把之前通過嚴格訓練的談判技巧派上用場。怎知道事與願違，在女僕Cafe內展開的是埋身肉搏加一場差點讓他喪命的大爆炸，接著是醫院裡的百鬼夜行和另一場埋身肉搏。剛才使出九叔的仙氣和七叔的棒法打倒了幾隻殭屍，曾經一度令他重拾自信，但是沒多久，他又被打倒在地上，任人魚肉⋯⋯





「唉⋯⋯唔通真係好似巴基華咁講，查落去係好𨶙戇𨳊？」他不禁嘆了口氣。

「哇！搞𨶙錯呀！」附近一間士多裡傳出一聲怒罵。迷惘的木仔跟著聲音進去士多，只見一個老伯在裡面看電視轉播NBA的籃球比賽，畫面裡林書豪無奈地摀著流著血鼻子。

「屌！被D黑鬼兜口兜面拍埋去個球證都唔吹⋯⋯哦，哥仔，要咩啊？」

「嗯⋯⋯可樂吖，唔該。」

電視裡面，球證無動於衷，林書豪止血後繼續作賽。

「屌那媽！頂硬上！」阿伯大叫。

「嗯！」木仔不自覺地回應了阿伯，然後極速地喝完了那瓶可樂。

阿伯問：「哥仔，你好似唔夠訓喔，要唔要飲咖啡啊？」





「唔駛囉，晏D約左人飲咖啡。」

六點鐘，尖沙嘴文化中心Starbucks裡面坐滿了文青與學生，木仔覺得格格不入，於是站在門外鬼祟地尋找鯊魚的蹤影。

這時手機響起，是鯊魚打過來。

「砰！砰！砰！哈哈，打中你喇，快D訓低啦！」

木仔立即四處張望。在Starbucks對面的售票處旁邊有一條輪椅通道，一個少女在向木仔活潑的揮手。於是木仔走近她，看清楚一些，心跳開始加快了，因為眼前是個清爽型的女孩，是衛生巾廣告那一種。對從無戀愛經驗的他來講，她絕對是女神了。

「Starbucks無位呀，坐呢度啦！」穿牛仔短褲的鯊魚背靠著牆盤膝坐下來，一雙修長的玉腿又給木仔另一波衝擊。

「哦⋯⋯」木仔也跟著在旁邊坐下。





「嗱，呢杯你嘅，Iced Latte，OK？」

「OK⋯⋯呃，幾多錢呀？」

木仔接過咖啡後往口袋掏錢時，鯊魚輕輕按著他的手說：「傻豬嚟嘅，有來有往吖嘛！」

「哦⋯⋯」這次木仔機乎被電擊了一樣，手心馬上海量冒汗，呆了幾秒鐘。

鯊魚喝一口咖啡說：「你唔飲嘅，警我加料呀？」

於是她把喝過的那杯咖啡與木仔交換。木仔看著那帶有粉紅色唇印吸管，有點流口水的感覺⋯⋯他不讓口水流出來，迅速啜了一口咖啡。木仔之前對這個不明來歷的鯊魚還是懷有警惕的，但是，現在他已經開始不由自主了，她叫他坐就坐，喝就喝，他開始領略到之前有些師兄提過的「沉船」了。

「我約你出來，你會唔會覺得唐突呢？不如我直接D講啦，我喺CU讀緊傳理系，依家幫D報章雜誌做緊freelance記者，係『調查記者』嚟㗎，即係外國可以搞到總統落台，搞到教會承認有戀童神父嗰D呢。我俾D片你睇吖。」

鯊魚拿出平板電腦放在膝蓋上面，與木仔肩並肩地看，木仔突然想：「咁樣都好似拍拖喎？好似同條女一齊煲韓劇啊！」





畫面裡面是女僕Cafe，被文仔的鬼魂上了身的阿俊正挾持著家琪，正在與木仔、黑貓、九叔和波Sir僵持不下，之後鏡頭越靠越近，清脆看見木仔和九叔的樣貌，發生爆炸那一刻，木仔和九叔『颯』一聲消失了，然後畫面在一番天旋地轉後變成雪花了。

「哦，原來嗰部航拍機係你嘅。」

「係啊，我嗰晚經過旺角，見到好多警察圍住棟樓就開部機過去睇吓囉。係喇，點解你哋『颯』一聲唔見左嘅？」

「嗯⋯⋯我估你條片震到跳格啫⋯⋯」木仔雖然被連番電擊後，有點功能失調，仍然記得這次事件是機密檔案來的。

「咁不如睇下條片啦。」

接著的影片是手機拍的，鏡頭正面是坐在病床上的家琪，被文仔的鬼魂上了身，用文仔的聲音悽怨地說話：「阿俊同阿強呃我買倫敦金，開頭贏錢嘅，就叫我將阿爸阿媽D保險金都擺晒落去，之後有一晚話搵唔到我補倉，就話斬晒喇，仲要我賠錢⋯⋯我之後去紋身舖找佢地晦氣，阿強就打死左我喇！仲唔知收埋我條屍喺邊呀！」之後畫面就是「家琪」撲向木仔，然後影片在一番天旋地轉後完結了。

「本來我想同個女事主作個獨家專訪嘅，點知變左冤鬼大控訴添，我應承左幫佢公開報導佢先肯被我錄影㗎。但係我跑左幾間報館，D老總個個都話驚我用後期加工博出位作嘢啊！你會信我㗎呵？」鯊魚楚楚可憐地凝望著木仔。





「我⋯⋯信！」

「你可唔可以借一萬蚊俾我呀？」