《新月派仙術奇譚》之《毒撚•女神•百鬼夜行》: 28. 打殭屍

從蘭桂坊回到殮房後，木仔馬上去找Lily商量，Lily淡淡的說：「有咩嘢大發現咁巴閉呀，一路修煉一路講啦，我哋過去岩洞先啦。」

「哦。」

「颯！」

兩師徒使出「天外飛仙」，瞬間就到了岩洞裡面，那裡已經有幾十隻殭屍分開兩排恭候著。

Lily縱身一躍，在岩壁上突出的一個天然的平台上盤膝坐下來。





「你嘅集中力唔多夠，所以呢幾堂都係練習打殭屍先啦，開始！」

木仔還沒來得及回應，一眾講師已經從四面八方飛撲過來！

「砰！」

「颯！」

「砰！砰！」





當木仔忙著應付殭屍的襲擊時，Lily突然問道：「你頭先話有乜發現話？」

「我喺蘭桂坊搵到被人燒死嗰個醜男嘅冤魂⋯⋯」

「砰！砰！」

「佢被一個會變做樹嘅高佬同會噴火嘅女仔害死㗎！」

「頭先你去廁所嗰陣，阿四話晒俾我知喇。」





「吓？」木仔馬上怒瞪在一旁觀戰的阿四。阿四裝作若無其事，瞻天望地。

「砰！砰！」

「預左㗎啦，佢哋班超強力部門一路都謀住我哋D仙術同仙丹，當年徐福咪避秦始皇避到去日本囉！」

「咁我哋可以避去邊呀？」

「砰！砰！」

「無得避，所以下次再有打吸血鬼嘅行動嗰陣，我打算乘機『合法地』將佢哋一舉殲滅。」

「颯！」

「砰！砰！」





「殺人？」

「鬼你都殺唔少啦？人仲恐怖過鬼。同埋你記住唔好打草驚蛇，D女仔約你就照出去玩。」

木仔一聽到「D女仔」，馬上倒抽一口涼氣，他一直想逃避的念頭立即湧上心頭：「鯊魚同Betty都有份陰我？」

稍一分神，一隻殭屍雙手按住了木仔的肩膀！木仔馬上揮出警棍打飛了殭屍的頭顱！同一時間，殭屍的胸口突然爆開，一根大丫杈直取木仔的頸項！

「呀！」

那根大丫杈牢牢地鎖住木仔的頸項，強而有力的把殭屍和木仔一併推向岩壁！木仔無法呼吸，仙氣就無法發動，就這樣跟那無頭殭屍硬生生被釘在岩壁上！

「Cut！」Lily喊停後，所有殭屍立即進入靜止狀態。





木仔也鬆了一口氣，只見無頭殭屍身後走出一個矮小的人影，是嬌姐！

嬌姐笑說：「加油喔，師弟！」

Lily一躍而下，滿意地說：「算有進步啦，不過你記住，唔好淨係用對眼，要用『心』去睇呢個世界。仲有無問題？無就落堂。」

木仔想一想，問道：「係唔係都係佢哋殺七叔呢？我想去QE搵佢嘅鬼魂問清楚。」木仔還奢望七叔的死與超強力部門無關，因為鯊魚和Betty都可能牽涉其中。

「我同九叔早就去搵過啦，唔見佢啊。」

「你同九叔一齊去？同埋⋯⋯你哋識得七叔㗎咩？」

「哈？你唔知七叔同九叔乜嘢關係咩？」

「咩話？」





「七叔係大九叔一歲嘅親生阿哥嚟㗎！當年兩個都當差，梗係有比較啦，慢慢個細佬撈得掂過自己，七叔咪愈來愈無心機囉，仲變到成個『武痴』咁，成日掛住練武，搞到就嚟退休都仲係軍裝囉。最想搞清楚件事嘅係九叔，但係佢又驚七叔唔睬佢，咪不計前嫌搵埋我一齊去囉。」

「師父，係唔係可以招魂或者問米呢？」

「嗰D嘢呃人㗎，真係得嘅話，呢個世界就唔會有冤假錯案啦！我哋依家唯有相信七叔死之前，係好痛快咁大打一場，無牽無掛咁走囉。到時我哋一齊去喪禮啦。」

「嗯⋯⋯」

#####

同一時間，在太平山頂的一棟獨立屋裡，超強力部門的金總在主持會議。

「冰冰，你幹得不錯，要繼續加強對小木的統戰，不用急。你們記得不要像炎炎那樣操心大意，殺個普通人都搞出個火災來！她在牢裡待幾天，好好檢討，這已經是組織上的寬容喇。」





Betty匯報說：「是的！錢總，我給小木的手繩追踪器他一直有帶著，除了殮房，他們應該還有個基地在海洋公園裡。」

「海洋公園？有意思，有意思⋯⋯木頭，你那邊有甚麼發現？」

高佬匯報說：「錢總，小木他隨身帶著一些仙丹，可以用來補充仙氣的。」

「仙丹？好！我們一定要把仙丹弄到手！」錢總雙眼裡是無窮的慾望⋯