《新月派仙術奇譚》之《毒撚•女神•百鬼夜行》: 22. 審犯

幾個CID從屋裡面迅速跑出來拔槍指著木仔！

木仔立即舉高雙手，緊張地問：「師兄，咩料呀？」

這時，其中一個年紀比較大的警察破口大罵：「Bu-Ni-Ah-Mo，斷正都仲問咩料？同我鎖佢返去！」

木仔看清楚這個人就知不妙了⋯⋯這個帶頭的叫潮州榮，是波Sir的多年宿敵。

「舉高雙手拍埋牆！」





那些CID從木仔身上搜出了伸縮警棍⋯⋯

「Bu-Ni-Ah-Mo，帶住支警棍出去做世界呀？」

戴上手銬後，木仔差點哭出來，這是他無法想像的情景⋯⋯

「Bu-Ni-Ah-Mo，想喊呀！攞紙袋笠住佢個𨳍頭！咪影衰我哋D差人呀！走！返去慢慢玩！」

#####





回到警察局，在通往盤問室走廊，突然一個人撲向木仔，一拳正中他的面門！幾個CID馬上把那個人按住。

那人被制服後繼續掙扎，咬牙切齒地罵木仔：「你個仆街！我要殺左你！」

茫然的木仔看清楚那人，居然是巴基華！

這時，大波蓮和波Sir趕到，正想上前接走巴基華。

潮州榮意氣風發地說：「同我鎖埋佢，charge佢蓄意傷害他人身體！肥波，唔好㩜𡃁呀，妨礙司法公正㗎！」





波Sir無奈地說：「有風唔好駛盡𢃇！」

巴基華被帶走時幾乎崩潰了，哭得呼天搶地，不停叫喊：「我細佬好人嚟㗎，做乜打死佢呀？！」

木仔被押走時，回頭看見波Sir和大波蓮望著自己的眼神充滿了哀傷與疑惑⋯⋯

#####

「唔係是必要你講，除非你自己想講，但係你所講嘅嘢，可能用筆寫低及用嚟做證供。」

「2016年9月15號夜晚你喺邊呀？」

「蘭桂坊。」

「幾點離開蘭桂坊呢？」





「十一點幾走。」

「同乜嘢人一齊走呀？」

「得我自己走。」

「識唔識呢個人呀？」CID遞上一幅照片。

木仔一看，是那晚在夜店非禮Yenny的醜男，他回答說：「唔識，不過在蘭桂坊見過。」

「有人話見到你哋打交喎。」

「無打交，佢㩜住我個女仔friend，我叫佢走開啫。」





「之後仲有無見過佢呀？」

「無喇。」

「佢喺夜店火燭嗰陣喺廁所裡面燒死左喎，火燭前個閉路電視鏡頭被嘢遮住左，係唔係你做㗎？」

木仔即時否認：「唔知發生咩事，火燭之前我已經走左喇。」

「咁你去左邊？有無不在場證據？」

「嗯⋯⋯我要諗吓先。」木仔答應過Lily要保守秘密⋯⋯

「屌！咁你慢慢諗啦！識唔識呢個人呀？」CID遞上另一幅照片。

是七叔！





「識⋯⋯」木仔一聯想到七叔可能會有什麼冬瓜豆腐，嘴巴有點抖震。

「最後見佢係幾時同邊度呀？」

「幾個月前，QE羈留病房。」

「有人見到你打佢喎？」

「嘈左兩句啫，佢係我師父。」

「咩嘢師父呀？」

「佢教我棍法。」





「係唔係你打死佢㗎？」

「死左？！」

「係呀，死左喇，法醫話係被伸縮警棍打爆頭㗎。係咪你做㗎？」

雖然木仔與七叔沒有很深的交情，卻的確是一見如故，面對恩師去世加上自己的嫌疑，他此刻快要崩潰了！他閉上眼睛，緊握拳頭，狀甚痛苦。

「啪！」坐在一旁的潮州榮終於忍不住發爛，一掌搧了木仔一記耳光。

「Bu-Ni-Ah-Mo！扮乜𨶙嘢呀？扮影帝呀？係唔係你做呀？」

「唔⋯⋯係⋯⋯」木仔勉強地回答。

「乜都唔關你事，咁呢段片裡面，着住你呢件外套同波鞋嗰個人係唔係你呀？」