《新月派仙術奇譚》之《毒撚•女神•百鬼夜行》: 20. 天上人間

「嘩！！！！」

無數的事物像流星般擦身而過飛到身後，木仔感覺到自己瞬間已穿過了岩洞、天際、雲層，真正的衝上雲霄⋯⋯進入了太空當中！

他回頭看看地球，它開始變得越來越小⋯⋯小到快看不見時，突然間，好像周圍的一切在反方向往前飛馳，自己在沿著原路被吸回去！現在地球再次出現在眼前，變得越來越大⋯⋯

一輪天旋地轉後忽然眼前一黑⋯⋯

當木仔恢復意識時，他眼前是一片漆黑而當中又有點點躍動的磷光⋯⋯是星光下的海洋。他感覺到自己在拍動雙手⋯⋯不⋯⋯是翅膀，在飛翔啊！





「唔通發緊夢？」他試圖解釋眼前的一切。

「醒嗱？頭先我同你差D瓜柴呀⋯⋯」

是Lily在說話，可是木仔嘗試環顧四周尋找Lily，就是看不見。

「唔駛搵喇，我同你嘅魂魄都喺隻海鷗身上呀。」

「吓？」





「仲有段路程，等我慢慢講你知啦。係咁嘅，世上所有嘅靈魂，除非有肉身載住，或者有執念留在陽間，又或者有仙術修為，否則就會被陰間嘅引力吸走㗎喇。你咪就係修為未夠被吸走囉。我頭先吸你返嚟已經用晒D仙氣喇，好彩有隻海鷗經過，俾我哋暫借佢個肉身，唔係我哋就一齊被吸走喇。」

「Sorry啊⋯⋯你話陰間？頭先我飛左上太空喎？」

「所謂陰間，唔同人有唔同叫法，天堂、地獄、西方極樂淨土，或者科學家講嘅黑洞，都係同一樣嘢。」

「科學？」

「係呀，仙術其實好科學㗎，宇宙萬物嘅同一套定律，喺唔同嘅時空，唔同嘅人，用唔同嘅演繹方法表達出嚟啫。其實用愛因斯坦嘅『能量守恆定律』同『相對論』嚟解釋仙術就係最簡單㗎喇。」





「簡單？」

「簡單咁講，魂魄就係一種能量嘅型態，被吸入黑洞之後又會通過其他途徑返嚟，即係佛家講嘅『六道輪迴』。我哋修煉仙術，得道成仙，唔駛肉身都可以存在於世上，就即係佛家嘅『涅槃成佛』，或者基督教講嘅『得永生』囉。好喇，就到喇。」

前面是一座懸崖，上面有些熟悉的東西⋯⋯木仔努力看清楚，是過山車的路軌⋯⋯和機動遊戲⋯⋯是海洋公園！

海鷗飛進了懸崖上的一個狹小的山洞，裡面就是他們早前身處的岩洞。

Lily和木仔回到自己的身體後，他們都感到渾身乏力，四肢痲痹。

「吖，隔左幾日，又唔多覺肚餓喎？」Lily疑惑地自言自語。

「咩話，幾日？」

「古語有云：『天上方一日，人間已千年』，即係『相對論』所講，喺唔同速度、重力下，兩個物體之間時間流動嘅速度會唔同囉。」





「哦⋯⋯」

「唉，即係話，頭先我同你被吸走過幾十秒，係陽間已經係過左幾日㗎喇。唔好講咁多，嗰邊有廁所同廚房，你自己搞掂喇。」

Lily稍作歇息後，她好奇地翻看閉路電視過去幾天的片段，果然事有蹊蹺⋯⋯

「木仔！你過嚟睇吓！你睇吓你個褲袋！」

木仔看著屏幕，即時目瞪口呆，因為不敢想像的事情又再次出現在他眼前了⋯⋯

當他們「元神出竅」後，陷入昏迷狀態的時候，鯊魚送給木仔的那個黑寡婦Lego從他褲子的口袋裡爬了出來！