有得回到過去，其實係咪件好事？: 第二章
兩個ex都係中學嘅時候識嘅。第一個女友叫Amy，第二個叫Betty。上到u之後，都有遇過合眼緣又有興趣嘅女仔，但最後都冇乜點去追，所以再冇女朋友。而呢個故其實亦唔係好關第一個女友事，但係冇佢嘅存在，又會影響到個故，所以點都要提下佢。不過重點都係Betty，所以直接講我同佢嘅故事。
我同佢識左好多年，佢細過我，當初冇諗住同佢一齊，只係朋友，係後嚟唔知點解會中意左佢仲一齊左。雖然我地係中學同學，但係我係畢左業先同佢發展。唔好問點解，有時有啲野真係解釋唔到。講下佢外表先，佢冇女神樣，我見過﹑識嘅人當中大把人靚過佢。唔好問候我住，我真係唔係一個見靚就追嘅人，真係好睇感覺。而且佢係我心目中，外表已經足夠，再靚只係bonus。即使我最近見返佢，覺得佢比之前憔悴左﹑殘左都好，我中意嘅，依然係佢。
回憶返上年……
Message from Betty : 「我地聽日去邊丫？」am 00:13
「你想呢？」am 00:15
Message from Betty :「你話事啦。」am 00:16「咁不如我地又去海水公園囉，反正買左全年證，去多幾次抵啲。」am 00:17
Message from Betty :「好丫﹗ 不過聽朝你要叫醒我架啵^^」am 00:20「知啦懶訓豬豬:)」am 00:20
就係咁，我地又再去海水公園。無錯係又，今次已經係呢個暑假第n次，因為之前佢冇去過，所以我地就買左全年飛，同佢玩返夠本。
雖然我仲年輕，但係我係個同得一個人拍拖，就會有心理準備同佢結婚嘅人。咁諗可能好白痴，但係我真係一個咁嘅人，一齊得就預左永遠都一齊。因為識得耐左，好多野我以為佢明，我以為我地會捱得到落去，我以為我地唔會分開，我以為……。