二零五六: 【第十章 慈幼小學】

【第十章 慈幼小學】
 
2016年10月3日
 
未來范子軒，應該叫F。佢氣喘吁吁咁，企咗喺荒廢學校二樓。
 
「竟然俾你走先一步。」
 
佢開始掃描眼前一切。
 




一左一右，兩個圓柱玻璃艙，兩個艙中間有一張老舊木枱，枱上面放住一部平板電腦。
 
呢部平板睇落唔似係2056年嘅出產。
 
平板插住一條叉電線，叉電線就連接住一部發電機。
 
「林天澤你好嘢...用2016年嘅科技都可以穿越時空...」
 
F行近木枱，攞起平版，打開咗入面一個叫「Time Traveller」嘅app。
 




畫面有三項顯示：
上次前往時間：2006年10月3日下午12時40分。
現在時間：2016年10月3日下午7時31分。
前往時間(可調)：2006年10月3日下午12時40分。
 
「去咗2006年？去嗰度做咩？」
 
F嘅疑問，睇嚟就冇人回答到。佢伸手入褲袋，攞出手提，篤咗幾下，就將電話放喺耳邊。
 
「喂，邱一晉，2006年10月3日，座標我一陣俾你。」




 
收咗線之後，F就喺手錶畫面禁咗幾下，之後佢禁咗一下手錶側邊嘅掣，佢個人就消失咗。應該係話，已經去咗某個地方。
 
2006年10月3日
 
「而家我哋雖然已經嚟咗2006年，但係F已經發現咗，相信佢會即刻追到嚟呢度。」
 
「咁我哋點？」
 
「去咗食嘢先，我諗你都肚餓喇。」
 
「哦...」
 
去食嘢嘅途中，我哋經過咗慈幼小學，當年我讀嘅小學。
 




學校門口掛住一個廣告牌，牌上面寫住「招生」兩隻字。
 
隔離有一家三口，拖住一個五六歲大嘅小朋友。
 
「老公呀，帶齊阿仔啲成績表未呀？」
 
「齊哂喇。」
 
我望過去，個小朋友竟然係六歲時候嘅范子軒！
 
「范子軒呀...」
 
我不禁衝口而出。
 
「吓？范子軒？！」




 
未來林天澤即刻進入戒備狀態。
 
「你睇。」
 
我指向六歲范子軒嗰邊。
 
「原來係六歲嘅范子軒...你咪嚇我得架。」
 
「係喎，呢個時候學校招生喎。」
 
正當我哋諗住走嘅時候，有兩個著住慈幼校服嘅小學生喺學校入面衝咗出嚟。
 
嗰兩個小學生睇落三四年班，跑得好快，一衝出嚟就撞到我同未來林天澤。
 




「屌，阻住條路，唔使行咩？」
 
「啲小學生，咁爛口嘅？慈幼仔係咁架咩？」
 
我都忍唔住講咗兩句。
 
旁邊嘅范子軒阿媽都對呢兩個爛口嘅慈幼仔感到反感。
 
「老公呀，不如唔好報慈幼啦？」
 
「嗯，我都唔想個仔學壞。」
 
之後范子軒一家三口就離開咗。
 
未來林天澤見到咁樣嘅情況，好似突然間發現咗啲嘢咁。




 
「你睇，我哋穿越時空，已經改變咗歷史，製造出咗新嘅平行宇宙。」
 
「所以...而家范子軒冇入到慈幼，而我就會成世人都唔識佢？」
 
「應該就係。」
 
「如果你嘅宇宙係咁嘅話，你話幾好呢...」
 
「我嘅人生冇咗范子軒呢個人，都好似唔錯，至少到咗今日我都唔使喺度避開佢。」
 
「算啦，我哋去食嘢啦。」
 
我指一指學校前面一間麵店。
 
「係明記呀！」
 
未來林天澤個樣好似執到寶咁。
 
「睇你個樣，啫係未來冇咗明記啦？」
 
「梗係啦。啲無良奸商係咁加租，迫到明記要執。明記老細都喺明記執咗冇幾耐之後病死咗。」
 
「唉...」
 
我都已經冇嘢好講。
 
食完嘢之後，我哋就去咗公園。
 
呢個公園喺我間小學嘅附近，以前一放學就會同班同學嚟呢度玩，有好多回憶。小學畢業之後，我都好幾年冇嚟過。
 
「我要去廁所先，你留喺度，注意自己安全。」
 
「OK。」
 
未來林天澤行開咗，我就喺公園度行咗個圈，開始回味以前嘅日子。
 
行咗一陣，我就坐咗喺旁邊嘅長櫈度。
 
冇電話喺身，真係好唔自在，我開始望旁邊嘅街道同建築。
 
望兩望，發現一個好似馬泰嘅西裝友。
 
「唔通又係特務？」
 
個特務向住自己個衫領上面個咪講嘢。
 
「I've found him. Repeat, I've found him. Over.」
 
「Found him...？唔通講緊我？」
 
我又feel到嗰種感覺，嗰種要為咗保命而逃跑嘅感覺。我即刻轉身就走。
 
個特務知道我見到佢，就跑咗過嚟。
 
「仆街！唔好追到我呀！」
 
我越跑越快，但係後面嘅腳步聲越嚟越近。
 
「林天澤博士！我係嚟幫你架！」
 
「痴線！你估我唔知你係F嘅人咩！」
 
「我唔會俾你走架！」
 
我繼續跑，即使情況十分絕望。
 
突然，我前面…
 
F，未來范子軒，出現咗！
 
待續...