二零五六: 【第二章 祖父悖論？】

【第二章 祖父悖論？】
 
「你喺2048年成功製造出時光機，之後喺八年後嘅2056年我哋公司終於掌握穿越時空嘅技術，所以公司就派咗我嚟解決你。目的係要改變你嘅人生，令你唔能夠製造出時光機。」
 
「原來我喺未來咁勁。等陣…點解我唔可以製造出時光機先？你話你公司派你嚟，咁你公司又咩來頭呀？」
 
「我公司老闆係全國首富Mr. F，專門訓練特務，執行各種任務。而我，就喺一眾精英之中突圍而出，俾公司選中咗嚟執行公司第一個穿越時空嘅任務。」
 
「訓練特務？呢啲唔係政府做架咩？」
 




「冇錯，我哋公司一直有同政府合作，為政府訓練特務，亦有人聘請我哋嘅特務去執行私人任務。」
 
「OK，我到而家都算明白，但係喺你解決我之前，我想問一個問題。」
 
「可以。」
 
「如果你解決咗我之後，係咪會穿越時空返去未來？」
 
「冇錯。」
 




「咁如果你解決咗我，你任務成功，咁未來咪會冇咗穿越時空呢種科技？」
 
「係吖。」
 
「咁如果冇得穿越時空，你點返去未來？又或者咁講，你點過嚟2016年？」
 
「吓？嗯…」
 
「再同你講多樣嘢，呢樣嘢叫祖父悖論。」
 




「果然係林天澤博士…傳說中擁有住愛因斯坦同霍金嘅頭腦嘅混合體。我認輸喇。」
 
之後個西裝友就行開咗。
 
嗰晚我返到屋企，仲係好在意呢件事。成個腦一直諗緊幾個問題。
 
「點樣整時光機？」
 
「啲悖論點解決？」
 
「平行宇宙存唔存在？」
 
「…點解我唔可以整時光機？」
 
就係咁，我一路諗，就慢慢訓著咗。




 
2056年7月6日
 
馬泰坐電梯向上移動，螢幕上面顯示「55th Floor」，走出電梯之後，沿走廊一直行，走到盡頭，自動門打開，進入咗一間房。
 
「馬泰，你嘅任務做成點？」
 
「Mr. F，我…」
 
「我唔要解釋！我要嘅係結果！」
 
「林博士佢…真係太聰明喇…我真係冇辦法…」
 
「個林天澤自細已經係咁…成日講啲懶深奧嘅嘢嚟呃人，佢講啲嘢全部都係大話嚟！唔好信佢！」
 




「咁…」
 
「你同我再返去2016年，一日未搞掂佢，你一日都唔使返嚟！」
 
「明白…」
 
2016年7月20日
 
呢日，我返咗學校睇分科結果。
 
「Hi，林天澤。」
 
「范子軒？」
 
「哼，你今年好彩，唔使同我同班。」




 
「係咩…你邊班？」
 
「A班，文科。」
 
「我以為你會讀理科添…」
 
「我阿媽話讀文科有前途，好過你讀理科，諗住做科學家呀你？」
 
「咁讀理科唔一定要做科學家嘅。」
 
「哈哈哈！總之你就等睇我第時發達啦！到時我一定會關照你嘅！」
 
之後范子軒就走咗。
 




「傻仔…」我自言自語。
 
正當我諗住走嘅時候，有人出現咗…
 
「乜又係你呀西裝友？！」
 
待續…