「續寫」無啦啦多左幾個家姐同阿妺: 變革

我：「你話你要選學生會？」 

Anna：「無錯。」 

我：「點解？阿偉都已經唔係度，我地已經唔洗再推翻佢啦。」 

Anna：「正正因為無左佢，學校先係時候變革。」 

變革？ 



我：「Anna你到底..」 

Anna：「學你之前講既咁，我會主打消除歧視，幫呢間學校撥亂反正。」 

「你有興趣的話就同我講啦，我隨時歡迎你，行啦阿威阿惠。」 

佢講完就帶埋阿威阿惠走左，阿威佢地既表情一臉漠然，好似唔多知發生乜事咁。 

一晚啫，連Anna都好似成個人唔同左咁既？ 



我同Sarah佢地再係操場行左一陣簽左一兩個名都開始返去各自既班房準備上堂。 

返到去班房，見到班上既人都各自組成幾個小圈子，好似係度討論緊D乜咁。 

不過，Anna佢地唔係度。 

奇怪啦..佢三條友去左邊呢.. 

我一邊諗呢個問題一邊行返去自己個位。 



坐低放低書包無耐，有幾個有錢毒撚行左埋黎。 

毒撚A：「喂阿明你係幾好野喎，居然搵到尋日班友黎幫拖。」 

我：「唔叫我窮撚啦咩？尋日果班係我好偶然識到既朋友黎啫。」 

唔知點解我對於佢地突然既親近一絲好感都無，仲有好強既戒心。 

硬係覺得佢地無啦啦叫返我個名係不懷好意。 

毒撚B：「當時我地唔知你有後台嘛，不過你居然可以搵到藍洛晨幫手真係估都估唔到。」 

點解好似大家都知藍洛晨係咩人咁？ 

我：「藍…」 



「起立！」 

啊班主任黎啦，真係黎得唔係時候。 

班主任：「得啦唔洗敬禮，我地老師有個緊急會要開，你地自修啦。」 

佢一邊講一邊係點名冊畫左條直線，畫完就拎住本野走左，成個過程歷時一分鐘都無？ 

咁早就要開會？小可喎你班教畜。 

當班主任一走左，成班人又開始嘈返，大家都討論緊開咩會，得我一個托住個頭on99咁。 

「應該傾緊李家會唔會唔再資助啦我諗。」 



「係啦係啦，話唔定我返去叫我老豆捐錢比學校我都可以好似阿偉咁。」 

「發夢啦就憑你，我就或者有機會。」 

果然好似Alex話齋，大家都想做下一個仆街偉。 

「請大家支持！簽名要求重選學生會！」 

開始聽到有人係走廊不停叫呢句口號，D聲仲愈來愈近。 

當D聲去到門口個陣，我見到門口有一大堆人，Ellen仲要係最頭果個。 

唉，大家都好似顛左咁。 

反正大家都周圍去，我都係上天台避下世先。 



當我行到上天台，準備開門個陣，我聽到有人講野。 

「你真係想咁？」 

咦係阿惠把聲喎。 

「無錯，我唔想佢再被人睇唔起，所以我一定要咁做。」

呢把聲..係Anna.. 

佢唔想邊個被人睇唔起？唔通係我？ 

我好想知道發生咩事，所以我準備推開度門入去，但係我又聽到阿威把聲。 



「阿明佢..會唔會唔鐘意你咁做？」 

我無再聽到任何人把聲。 

我決定扮到乜都唔知咁樣入去。 

果然，我一推門入去，佢三個都望住我。 

我：「咦乜你地都係度？」 

阿惠：「阿明你乜都聽到哂？」 

喂大佬吖你D對白可唔可以唔好咁CCTVB得唔得啫。 

我：「吓你地講左D乜？我唔聽得架？我壞話？ 」 

阿威：「講緊你尋日打波好型啫~點吖上黎做乜啫。」 

我：「無啊大家都好似顛左咁，咪想上黎避下世囉。」 

阿惠：「多得你囉明哥，打敗左個魔王，而家大家都想上位。」 

我無應阿惠，而係望住Anna，佢叉住腰咁望住我，好似有野想從我把口聽到咁。 

唉，算啦，陪下佢顛啦。 

我：「我諗過啦，選學生會好似都幾好玩，尤其你地個target。」 

「我想做第一個變革者。 」 

佢地聽完之後都笑左出黎，連Anna都有笑，仲走左埋黎每人打左一拳。 

Anna：「好啦咁！我地四個！一齊去改變呢間學校！學阿明話齋一齊做變革者！ 」 

四條友係天台度顛，好彩附近無高樓大廈，唔會比人拍到片。 

不過，而家想搵機會同Anna講都幾難..