「續寫」無啦啦多左幾個家姐同阿妺: 一直

我：「做乜要送比我..」 

Sarah：「我都唔知吖…只係係果日見到你咁唔開心之後就好想送比你，覺得咁樣你可以開心返。 」 

呀，個心好暖添。 

原來Sarah唔係對我冷漠，佢只係想我開心而努力。 

我：「咁我就收左佢啦，多謝哂啦。 」 



我用雙手打算接佢塊金牌，但發現佢捉到塊金牌好實，普通力度係唔會攞到。 

我：「Sarah..？」 

Sarah：「我原本係打算攞哂兩塊比你架…」 

佢把聲突然變到好沙，搞到我忍唔住將視綫由金牌轉到佢身上。 

佢係度喊緊。 



Sarah：「我真係已經好俾心機咁跑…就只係差個小小…」 

應該講緊200米既事。 

Sarah：「我係咪好無用？做少少野都做唔到，唔似Anna佢咁.. 」 

突然提起Anna既？ 

Sarah：「我真係好想可以佢咁自由自在，唔洗縛手縛腳咁...」 



「可以的話，我真係唔想同阿偉一齊。」 

「我真係唔想同佢去街…  」 

一提起阿偉，我又忍唔住嬲起上黎。 

係要令我身邊既人都唔開心你先滿意？ 

我發誓，終有一日我會百倍奉還比你。 

係果日之前，我會一直記住你對我身邊既人做過D乜。 

而家，就先羞辱一下你，對你做下惡作劇先啦。 

我：「入黎先啦，我有野要同你傾。 」 



我再無捉住塊金牌，而係捉住佢既手臂，帶佢去我房入面既梳化仔坐低。

Sarah：「你想同我講乜..」 

佢一邊抹眼淚一邊講。 

我：「條友係咪話佢贏左800同1500米既話你就要同佢去街？」 

Sarah：「係吖..」 

我：「事實上，佢只係贏左1500米，800米係阿威贏左。」 

Sarah無乜反應，只係一味望住我，好似唔明我咩意思。 



我：「咁即係話佢根本無資格同你去街吖你明唔明吖！」 

我語氣有少少激動。 

Sarah：「哦！！ 」 

睇黎佢明喇。 

我：「咁到時你就可以用呢個理由去拒絕佢啦。」 

Sarah：「嗯，好多謝你吖阿明，不過，用呢D捉字蝨既方法係對佢無用架…」 

無用？你又知？ 

我：「你又知會無用？你試過反抗？定係你連反抗既勇氣都無？？」 



「我真係好唔想見到你同佢一齊，你知唔知我一直都…」 

我開始變得激動，最後句野都未講完就莫名其妙咁抱住頭，避開Sarah既目光。 

「我試過吖，我試過反抗吖。」 

eh？ 

我抬起頭，望住Sarah。 

佢臉上有兩行眼淚，但竟然仲有笑容， 

「我試過幾次逆佢意，希望佢會頂我唔順，會放棄我。」 



「但佢要脅我，話會叫佢爺爺搶走哂我地屋企所有野，等我地乜都無。」 

「由一開始，我同佢就唔係一般男女朋友關係，我只係佢既玩具。」 

「只要張婚約一日仲存在同佢一日仲係李家繼承人，我就無辦法反抗佢。」 

「好唔公平吖可？明明我都好想過一D普通既中學生活…」 

我駁唔到。 

佢背負既野，實在太多。 

佢捨棄左自己既幸福，換取成家人既生活。 

估唔到呢d情節今時今日仲會發生。 

Sarah：「所以我一直都好羨慕你，你可以唔洗理其他人，自由自在咁過日子。」 

「我可以有你呢個細佬，可能係上天對我既小小憐憫啦我諗。 」 

唔係咁架… 

我唔係只係想做你細佬… 

Sarah：「話題好似突然變得沉重左添haha，塊金牌你就收左佢喇，我出返去先喇。」 

Sarah企起身，好似想走。 

「等陣。」 

我叫停左佢。 

「話俾我知你幾時要同佢出去。」 

「我會救走你。」