「續寫」無啦啦多左幾個家姐同阿妺: 認輸了
阿威講完之後全場都靜唒，無人出聲，大家都好似係度等緊人接落去咁。
我決定去擔當呢一個角色，因為我我真係有好多野想知，好多野想問佢。
我深呼吸左一下，嘗試去平伏一下自己既心情，但始終都係唔得。
個腦仍然好雜亂，我好難去組織應該講咩先好，我甚至到而家都唔敢相信阿威會做出呢D野。
不過事實就擺在眼前，佢亦已經親口承認左，我都只可以接受，但至少我想問佢一件事。
我：「你係由幾時開始有咁既諗法…」
再一次，陷入沉默，無人應話。
我：「點解你會咁諗我？」
雖然咁講好似成個女人咁，但我真係好想知道點解會變成咁。
前一秒…唔係，應該話係之前我明明仲同佢稱兄道弟，點解佢會當左我係一個不得不剷除既敵人？
阿威：「咁不如我問返你，點解每次去到最後永遠都係你一個攞哂所有好處？」
「你明明無乜點做過野，有時甚至會搞衰件事，每次都係我地去幫你，但點解最後係你一個拎到哂名譽同地位？」
「而我地就只可以跟係你後面睇你頭？成件事根本唔公平！」
「應該拎到成果既人根本唔應該係你！但偏偏你仲一個窮撚走到去做七星！」
就係因為咁..？
我：「就係因為咁？因為咁所以你要我交返所有野出黎，甚至仲綁架羽晨？」
可能因為受到阿威咁激動既感染，我既語氣都開始激動起黎。
「你咁叫拎返自己應該有既野？即係你覺得學生會主席應該係你做？」
「既然你講到咁，我諗我地以後都無朋友做，今日開始各行各路啦我地，你慢慢去追尋你口中既應該有既野啦。」
「Sarah，Anna，Yui，Ellen，Ellie，我地走。」
我好大力咁拍左一下檯仲企埋起身，轉身準備離去。
阿威：「你以為你可以咁輕鬆就走？你仲有份合約未簽喎，之前我派人拎俾你果份呢。」
我：「荒謬，你以為我仲會…」
阿威：「點解你二家姐咁多日都無返屋企呢可？」
！？
唔通佢…
我帶著充滿恨意既眼神再一次轉身望去阿威度，見到佢非常得戚咁拎住佢自己部電話。
Mon入面既一張相，係二家姐被人綁住左既相。
阿威…！！
Anna：「阿威你顛左呀？綁架都做得出？犯法架！」
Sarah：「快D放左我二家姐呀！」
阿威：「我綁架？綁架佢既人唔係我喎，我只係咁啱收到呢張相啫，犯法既野我唔會做既。」
「至少唔會親手做。」
「不過佢真係好可怕呢，居然查到我有接觸過阿傑仲有愛麗絲，最後仲查到我度。」
「可惜最後居然比人綁架左，唉真係可惜，我都好擔心佢既安全。」
我見到佢咁假惺惺，忍唔住衝左上去打佢，一拳接一拳。
佢無擋亦無避，更加無反撃，只係一味咁任我打。
可以的話我打算就咁咁打死佢，直至我聽到佢講左一句說話，我聽完之後即刻停左手，甚至後退左兩步。
「你咁打我，唔知你二家姐會點呢。」
佢搖下搖下咁企返起身，滿面傷痕，但居然仲笑得出，仲要係一個非常詭異既笑容，笑到人心到寒埋。
呢個人，真係阿威？阿威真係一個咁恐怖既人？
阿天：「卑鄙既人，居然用人質呢招。」
諾儀：「枉人地仲當你係兄弟，你居然咁樣反咬人，仲綁架人地屋企人兩次。」
阿信：「仲要用人地對手，令到自己唔洗上身，真係諗得周詳，心機重到呢。」
阿雪：「直頭係無恥添啦！想逼人就範！阿明唔好理佢！一定有辦法救到你家姐架！」
阿威；「你班人仲有咩資格話我？我都只係學你地咋！阿傑出事個陣你地都係咁落井下石架啦！」
「而且我咁做係幫你地添呀！我係度幫你地剷除對手，你地居然走去做道德撚？」
Anna：「阿威！！！」
Anna又想衝去阿威度，但比我發現，我即刻拉住佢唔比佢去。
我怕阿威佢真係會對二家姐不利…而家既阿威我唔敢想像佢會做出D乜。
阿威好似都意識到我擔心緊D乜，笑得更加狂妄，令人心寒既笑聲。
阿威：「揀啦，阿明，要屋企人定係地位？雖然兩樣都係本來唔係屬於你既野。」
睇黎…到此為止啦…
阿威講得岩，呢兩樣野都係本來唔係屬於我既野。
家姐細妹仲有Sarah佢地幾個，本來對我黎講係遙不可及既野，甚至可以話係發夢都唔會夢到。
至於咩野地位，其實我一開始就無迷戀過啦，做咩七星都只係為勢所迫，根本唔可以話係我自願。
我會做七星都只係為左救屋企啫，所以若然要我二者只能擇其一的話，我根本唔需要諗。
而且放棄哂呢D所謂地位，對我黎講可能仲係一件好事啦。
終於有一個下台階離開呢個圈子，可以過返D正常日子，呢樣唔係我一直求緊既野咩？
但係點解我咁唔想講出口..？係咪因為我唔甘心？
唔甘心咁樣結束，咁樣輸比佢。
不過我真係無辦法，二家姐而家係佢度，我無得反撃。
我：「我…」
「唔好理佢！我之前同你講過咩！點可以同佢妥協！！
」呢把聲係…二家姐！！！
我擰轉臉，望向聲音既來源，見到一班人，其中入面有一個呢一刻我非常想見到既人。
二家姐。
不過始終都係同阿威講既一樣，只有我一個人果然咩都做唔成。
最後我點都係要人地幫，明明係自己既屋企人，最後居然要由其他人救出。
阿威：「點解…會係度…」
Sarah，Yui：「二家姐！！」
見到完好既二家姐出現係呢度，Sarah同Yui都忍唔住衝左上去，而我則留係原地。
我仲有野要做，我仲有野要處理。
我：「睇怕我都再無理由要向你屈服啦，阿威。」
阿威：「點解會咁，點解會搵到佢…我應該收得好密架…」
「心狠手辣，作為一個商人的確係好好，可惜既係，你越級挑戰。」
呢把聲我都記得，係李生把聲。
果然，李生係二家姐身後行左出黎，愛麗絲都係度，跟住李生。
李生：「若然你要對付既人係其他人，或者你會成功，真係可惜。」
「你所有野都做得好好，由其係隱藏自己既身份，連我都會哂咁多時間先知道你係咩人。」
阿威：「點解愛麗絲會…你地唔係反左面架咩？」
愛麗絲：「你可以講大話呃阿明，咁點解我唔可以呃你？所有野都係為左引你出黎而做架。」
「由你搵阿傑去接觸我個陣開始，你就已經中左我計啦。」
「不過起初我地都只係打算提防下你，等你無辦法害到阿明，估唔到你會愈搞愈大，連綁架都做得出。」
阿威：「綁架！？唔係我做架！！所有野都係阿傑做…」
阿威突然慌張，睇黎係因為知道自己可能會負上責任。
二家姐：「想割蓆的話已經太遲啦，全部野我都已經査出，有證有據你無得走。」
「你已經玩完喇。」
玩完呢兩個字一出，阿威即刻係度傻笑，大家見到咁都覺得好愕然。
阿威：「又係咁，你又係靠人地黎贏，哈哈哈哈！」
「我唔係輸比你！只係因為你既後盾係全香港最有錢既人！」
「只有你自己的話根本不一提！！」
「啪！」
一巴掌，中斷左阿威既發言，而打出呢巴掌既人，係Anna。
Anna：「點解你到而家都仲唔明！要怪就只可以怪你自己！點解要咁樣睇阿明！」
「或者阿明佢的確好似你講既咁，要靠其他人既幫手先可以走到黎呢度，但你知唔知點解大家會肯幫佢？」
「係因為大家認為阿明值得幫！你自己以前都應該係因為咁先會主動幫佢！」
「阿明並無主動求過我地，反而仲會拒絕，怕我地會因為幫佢而有事！」
「就算佢做左七星都好，佢都無變到！仲係果個一直陪我地顛既傻仔！」
「一個咁既傻仔，點解你要害佢？只係因為妒忌就要害佢？」
阿威：「係咁又點？唔可以？」
Anna：「佢甚至令你成為七星，你都仲要害佢？」
阿威：「你估佢本來想咁做架？佢只係需要有人係七星入面幫到佢先拉我入七星咋！」
原來佢係咁樣睇我。
我：「啊，係呀。你講得無錯，我係需要有人係七星入面幫我先令你成為七星。」
「不過而家你已經無哂利用價值啦，你可以消失。」
「主持人，我有另一個動議想提出。」
MC：「請問係咩動議呢…」
我：「將七星之一，劉氏逐出七星，贊成既請舉手。」
阿威：「陳煒明！！」
無人理會阿威既吼叫，阿天，阿信，諾儀，阿雪都舉高左手。
MC：「咁…六票贊成，我宣布動議成功通過，劉氏被剝奪七星身份。」
再見喇，我曾經既朋友。
可以的話，我真係唔想結局會係咁，我仲以為我地可以一齊玩一齊顛到grad，同埋阿惠仲有Anna四個一齊…
阿威之後就被保安帶走左，聽二家姐講出面已經有警車等緊阿威佢。
我：「二家姐，真係比你講中左，睇黎七星真係一個會令人…」
二家姐：「得喇，唔洗再講啦，我明白架啦…」
二家姐打斷左我既說話，仲拉左我埋去佢度，請我塊臉食哂波餅咁。
平時的話我應該會好享受，甚至可能會開始ff下，發下春夢咁，但我無。
我反而仲係二家姐心口上面好細聲咁喊左出黎。
可能係因為…算喇，點都好啦，已經無所謂啦…
只係我仲有野要做，喊就喊到呢度先啦。
我擦擦眼淚，重新走去台上，面對其餘個四位七星。
我：「我有一個私人既請求，想拜託你地四位。」
阿天：「即管講黎聽下。」
我估唔到之前最針對我既阿天會係最先開聲既人。
我：「我希望各位以後唔好再針對我或者我屋企人，有乜恩怨都一筆勾消。我想同我屋企人過返d安穩既生活。」
「當然我唔會要大家無條件咁做，作為交換條件，我會離開七星，消失係大家面前。」
呢樣或者係我唯一可以為我身邊既人做既事啦…