「續寫」無啦啦多左幾個家姐同阿妺: 誠實

「嗯，無錯，係我叫佢去幫你，等你既處境無咁危險。」 

「果然係你呢，真係好多謝你，為我做左咁多野。 」 

「哼，咩為你做左咁多野，而家我諗返起都覺得麻煩左阿晨添呀！次次都要佢出黎幫你，人地都有自己既生活架。 」 

「係…呢層我都知…我成日都覺得自己好無用…次次都要靠晨哥先搞得掂D事… 」 

「… 咁又唔洗踏到自己咁既，只係阿晨佢級數太高啫，未必係你差既。 」 



「晨哥佢話大慨以後都唔會參與七星既事，我都唔知點算好喇… 」 

「吓乜你無左阿晨就乜都做唔到架嗱？咁你係遇到阿晨之前係點生存？ 」 

哈哈，又嬲啦又嬲啦佢。 

「唔係…咁…情況唔明嘛…」 

「你唔好太依賴佢，你自己都有一份力量架？我聽佢地講話李uncle都有咁同你講過架？」 



「係…李生的確係有咁講過…但係連我自己都唔知佢講既力量到底係咩…」 

「或者你會慢慢發現都未定呢？時間都唔早，快D去訓啦，聽日食早餐果陣再見。」 

「知道二家姐，聽日見。」 

「記住唔好整喊Sarah呀，我會打你一鑊架。 」 

「一定唔會，佢地任何一個喊我都會唔開心，所以我唔會俾佢地喊。 」 



哎喲，匿埋先唔好俾阿明見到我。 

我係見到阿明上左樓梯之後先慢慢行入廚房，見到「佢」係度飲緊水。 

我：「有無醒返d呀你？ 」 

「點解你… 」 

我：「不過頭先聽你同阿明講既野，你應該成個人醒哂啦~ 」 

「偷聽唔係一件咁值得開心興奮既事啊..家姐。 」 

我：「哈哈係咩，不過你真係唔老實呢，明明得你同佢兩個人係度都唔肯對佢講真話。 」

May：「我..我唔係好明你講咩喎家姐，咩講真話，我句句都係真話黎。」 



我：「係咩~下下拎Sarah黎做擋箭牌真係好咩？你應該仲有其他理由先會咁幫佢架？」 

May：「無..我真係唔想Sarah唔開心我先會幫佢。」 

我：「真係咁？咁點解你頭先又會咁嬲呀？ 」 

May：「咁佢咁無志氣，梗係要鬧佢一鑊啦。 」 

我：「係係~你岩~你無鐘意阿明~得未？」 

May：「我邊會鐘意佢！ 」 

哈哈即刻幾大反應，肯定身有屎啦佢。 



May：「只係因為佢都算係我細佬我先會幫下佢啫，話哂大家都係一家人。」 

我：「咦，你頭先又話只係因為想Sarah開心先幫阿明佢既？」 

今次仲唔捉到你？即刻無聲出啦。 

我：「誠實D喇阿 May，呢度得我同你兩個咋，我保證唔會講出去。」 

佢沉默左一陣，只係望住我。 

May：「咁樣就夠，而家咁樣就夠。我可以咁樣幫佢地，等佢地可以開心就夠。」 

「我唔會搶我自己個妹既男朋友。」 

佢講完就係我身邊行過，留低我一個係廚房。 



你咁講咪即係認左自己鐘意阿明囉… 

唉…一個二個都傻…