「續寫」無啦啦多左幾個家姐同阿妺: 零和

我：「我無所謂架，我請你食飯梗係你揀你鐘意食既野啦。」 

晨：「咁啊，呢個鐘數去食個tea囉，返美星姐度。」 

我：「吓咁樣得嗱？只係食個tea。」 

晨：「得啦，美星姐果度D Cake好好食架你女朋友一定會鐘意，而且果度好適合傾計。」 

既然佢都講到咁，就聽佢講啦。 



之後我地四個就坐的士去左間cafe，上面只係得幾檯客，好靜。 

Sarah同Yui見到係蛋糕櫃入面既蛋糕就好似發左顛咁，叫到成檯都係，差少少連我杯野都無位放。 

晨：「哈哈，都話佢地會鐘意架啦。 」 

我：「我都估唔到會佢地係咁瘋狂… 」 

晨：「唔緊要啦，你都想佢地開心架。」 



我：「係架，佢地開心的話唔知點解我都會開心。」 

晨：「咁咪好。 」 

之後晨哥就開始飲咖啡，突然間就陷入左deadair，好尷尬。 

我又唔知應該點開話題好，結果最後又返左去七星既話題。 

我：「明明話唔可以投自己提名既人，但頭先阿雪話佢投左比佢朋友既？」 



晨：「哦，講起就煩啦，佢死都要親自投比諾儀，結果要同佢交換提名，我提名諾儀，佢提名你朋友。」 

我：「哦…原來係咁。」 

屌，又陷入deadair喇… 

我：「eh…而家咁樣既局面對我地應該好有利喇，五個對兩個，我地可以控制到七星喇。 」 

我都唔明點解自己會咁諗，明明之前一直都諗只要可以安穩就好，可能係自己一時口快喇。 

晨：「唔係，係三對三。」 

三對三？咁仲有一個人呢？

我：「eh…點解係三對三既？我地而家有五個喎…」 



晨：「你最好唔好當阿雪係自己人，佢好易變，太信佢可能會出事。」 

我：「咁就算唔當阿雪係自己人，我地都有我，阿威，果個諾儀同埋你四個吖，唔通連佢都唔可以信？」 

晨：「唔係，諾儀佢係一個黑白分明既人，只要你係跟良心做野，佢一定會支持你。」 

我：「咁何來3對3..仲有一個呢？」 

晨：「其實呢，我大慨以後都唔會參與七星。」 

面對呢個突如其來既消息，我地三個都嚇到即刻放低手上既野，Sarah甚至搶先我一步開口。 

Sarah：「點解既！」 



晨：「冷靜D先，我會講理由既，你抹下個嘴先。 」 

晨哥唔知係邊度拎左紙巾出黎遞Sarah，個表情依然好氣定神閒。 

「我一直都希望七星可以保持係一個零和既局面，無人可以有絕對既優勢，咁先係對大家好。」 

「互相牽制住的話就唔會有咩大事，大家都會專注返係自己既生意度，我相信將來會變成咁既局面。」 

「只要我呢一票一直都棄權，咁係一D大事大非既問題上就應該就會打和。」 

「可能咁樣係會有少少對你唔住，不過咁真係最好。」 

「而且咁樣都應該可以保你安全架啦。」 

「講開我都應該要多謝你先岩，唔係因為你我都做唔到而家咁。」 



我：「多謝我？因咩事？」 

晨：「其實我想咁做好耐，以前七星做左太多衰既決定，但得我一票根本做唔到野。」 

「多得你挑起一場又一場既風浪，令阿偉同阿傑相繼被迫離開七星，我先有機會。」 

講到我好似好重要，搞到我有少少怕醜添… 

咦但係點解晨哥知道我想安安穩穩咁係七星度過？ 

我：「晨哥我想問下點解你會知…」 

晨：「哦，其實早排有人搵過我，叫我幫下你啫，不過我應承左佢要保密佢身份架。」 



有人叫晨哥幫我？邊個？ 

晨：「好喇我真係要走喇，希望你事事順利啦，後會有期。 」 

講完晨哥就再一次揮䄂而去，留低一堆問題比我。 

啊，講開又講，呢個tea最後食左差唔成八百蚊，佢兩個人就已經食左幾廿件cake。