「續寫」無啦啦多左幾個家姐同阿妺: 報復
有人搞事？？
阿威：「咩搞事，你慢慢咁講清楚。」
阿威唔知幾時離開左佢既籃球機，走左埋去肥仔個邊。
肥仔再深呼吸左一下，就開始一口氣咁講。
肥仔：「我都唔清楚發生咩事，食完飯返到班房想訓陣先喇，點知坐左一陣就有一班人衝左入黎，打爛哂D野。」
一班人？
阿威：「你話一班人？佢地係咪著住校服？你認唔認得係咩人？」
肥仔：「唔知吖，佢地個個著住黑色t-shirt帶哂口罩同cap帽，仲個個拎住支棒球棍！」
嘩，就咁聽佢形容，搞事果班人好似黑社會咁既款咁喎。
我：「喂學校保安點做野，居然比到咁多街外人入黎搞事，要再開會傾下先得喇咁。」
阿惠：「唔係吖阿明，唔關保安事，我估搞事既人應該唔係咩街外人，係我地學校既人。」
我：「我地學校既人？咁會係咩人？」
阿威：「隨便諗下都可以估到喇阿明，多數係Form5班人啦，而家除左阿傑之外仲有邊個可以做到咁。」
係阿傑做既？咁快就出手？頭先Anna同佢反面都只係一個鐘頭前既事黎咋喎！
Anna：「再係度傾都係無意義，我地不如返上去班房睇下情況點先啦。」
係喎，應該上去睇下班房被人搞成點先。
我：「咁…我地返上去睇下先喇，行喇各位。」
我講完之後大家都起左身，準備出發。
但一出到去，Alex就行左去同我地既相反方向。
Alex：「我去保安部問佢地拎下D閉路電視片段睇，睇下可唔可以認下人。」
Anna：「好，麻煩你喇，Ash你都跟埋去啦，幫下眼。」
Anna講完之後我地就兵分兩路，去處理今次呢件事。
今次應該係我地Knight既第一次考驗，難度係惡夢級，定地獄級？
屌，又錯重點。
返到上去我地班房，哇亂到一個點。
玻璃碎滿一地，檯爛左兩三張，壁報爛哂，燈都有兩盞跌左落黎，電腦又爛埋，好似睇戲咁。
大家都係度執返好D野，個個既樣都好似完全唔知到底發生咩事咁。
見到咁既情況，唔知點解我講唔到野。
死喇我無預計到會有咁既情況添。
好彩今次只係打野唔係打人啫，如果唔係我肯定內疚死。
「點解會咁架..」
大鑊，唔記得左一個人添。
我擰轉頭望下Anna，見到佢o哂嘴好surprise咁。
慘，同我諗既一樣，佢而家個樣話俾我知佢好內疚。
我：「喂Anna..」
Anna：「都係因為我..班房先會變成咁，好彩今次無人受傷，如果唔係的話我..」
我：「Anna..」
Anna：「都係因為我..」
「早知會係咁，我就唔..」
「夠喇！而家唔係俾你咁樣頹既時候呀！
」 有人搶先我一步講左呢句野，係Sarah。
Anna：「Sarah..
」 Ellen：「係吖，而家應該諗下點拆掂呢個局先係吖！
」 Ellie：「嗯，自責都係無補於事。
」 Anna：「Ellen，Ellie..
」 哇見到佢地四個咁，我居然有少少想喊。
阿惠：「喂阿明哥，你班女都好團結下喎，係咪因為你係變革者所以個個都冧你？
」 我：「收聲啦而家唔係講笑既時候啊，惠哥仔。
」 阿惠：「知道知道，我錯。
」 講係咁講，但而家應該點做好呢..
望就望Alex果邊有好消息啦..
過左五分鐘，訓導主任就帶左兩三個校工過黎幫手，順手了解下咩情況。
訓導主任：「陳同學，你過一過黎。」
我：「係，搵我有乜事。」
訓導主任：「嗱，我同工友們已經傾過，你地班房爛成咁，唔係好適合上堂。」
我：「所以？」
訓導主任：「所以我已經係新校舍果邊安排左一間空既課室比你地班，麻煩你叫你既同學執野過去。」
阿威聽到咁就即刻叫人執野走，我叫佢幫我執埋。
因為我仲有野想同訓導主任傾。
我：「我想問下訓導主任你地點睇呢件事？」
訓導主任：「我地認為今次既事態非常嚴重，我地會徹查。」
我：「事態梗係嚴重啦，今次就話只係打下檯之類，下次打人咁點呀？
」 訓導主任：「eh..假設性既問題我唔可以答你，不過我會翻查閉路電視，睇下係咩人做。」
我：「咩人做？傻既都知係Form5班人啦！而家係得佢地先..」
訓導主任：「嗱陳同學，凡事都要講證據，你無證據唔可以隨便冤枉人地。
」 我：「你..」
我真係忍夠佢，學校發生D咁既事佢身為訓導主任仲可以咁懶懶閒？
正當我想講粗口鬧鳩眼前呢條廢柴果陣，阿威㩒住左我。
阿威：「算喇阿明，訓導主任有佢既道理，無證據的確唔可以隨便冤枉人地。」
我：「阿威吖！你都知..」
正當我連阿威都想鬧埋果陣，佢將一張紙拍落我心口。
阿威：「幫你執野果陣係你櫃桶搵到，自己睇下。」
我拎起張紙，唔睇尤自可，一睇就嬲到爆炸。
「我地慢慢玩
」 五個字居然就可以激嬲我！你係得既！
好！你要玩我就同你玩！睇下笑到最後既人係邊個！
大家執左一段時間之後終於都執好野，準備搬去新校舍。
臨走前，我再望下呢個已經變到面目全非既班房。
呢度曾經係我地既樂土，我地之前係呢度玩得好開心。
真係無諗過，最後會係因為咁而離開呢度。
我仲以為會係因為升班要轉班房先要同呢個班房道別。
豈有此理…
「唔好咁啦阿明，總可以返黎既，等整返好之後我地咪可以返黎囉。」
阿威好似睇穿左我諗緊乜咁，走左埋黎拍我膊頭。
但係，只係咁係唔夠架..
我：「就算班房整返好都未夠架，只要佢一日..」
阿威：「唔好諗太多啦，始終真係未有證據證明..」
「嘩嘩嘩，因乜解究個班房搞成咁呀？慘慘豬囉~」
呢把聲！係佢！
我望過去聲音既來源，見到阿傑帶住兩個Form5既女仔行緊過黎。
阿傑：「咦？呢個咪係阿明你地既班房？做乜會咁架？」
明知故問，豈有此理。
「女人你拎走左我無所謂，反正我大把。」
「不過你未經我同意就拎走佢就唔同講法，我唔會比人搶走我既野，我一定會報仇。」
「就算你而家肯比返我都無用，我已經唔想要，我而家要玩死你。」
「今日既只係熱身，你準備好未？」
佢好似上次係party咁挨係我旁邊細細聲咁講，講完之後就帶埋果兩條女走。
好，玩囉，玩囉。
阿威：「阿明，你無野嘛？佢頭先同你講左D乜？」
我：「阿威，我地要以其人之道還以其人之身。」
我要報復，應該話要報復既人係我先真。