無品神探: 第二十六節
「喂，喂，喂！黃sir！」
「咩事呀？」
「黃sir，你一定要睇下呢個！好重要。」
警署。凌晨。
張德明將岑世英畀嘅文件夾交畀佢上司嘅上司黃sir。
「呢個係…？」黃sir接過文件夾，皺住眉頭。
張德明講：「Sir，係長洲失蹤事件嘅新證物。非常有力！」
「又想查陳耀華？咪話冇有力嘅證據唔郁得佢囉。」黃sir睥張德明一眼。
「黃sir，關誠天同溫學儀又黎催問佢個女嘅下落啦。佢地好火滾，要點同佢講呀？」一個差佬急急腳走入黃sir嘅辦公室，一臉焦急。
黃sir有啲惱怒：「屌，咪話查緊囉。你快啲覆佢，話我地已經係各區查緊，盡量請佢地放心。」
個差佬點點頭，又急步行番出去。
「又話要低調，又係咁催話要快啲搵。都黐線嘅。」黃sir喺度自言自語。
「阿sir，我諗我應該知道個有錢女喺邊…」張德明有啲遲疑咁講。
黃sir有啲懷疑，皺眉問：「你知？」
張德明望咗望黃sir，又望咗望手頭個文件夾，點點頭。
*************************************************************************
阿Tim同阿john手執一支手杖行入黎，兩人目無表情，身穿黑西裝。
「我一早就覺得你兩條蛋散有古怪，成日拎住手杖唔知做乜鳩！」岑世英對住兩個保鑣講。「尤其係你，細心到過咗頭，連我支煙跌落地上都幫我整熄番。做野咁有手尾，我諗就係你喺我度裝咗竊聽器，係咪？」後尾呢句對住阿Tim講。
岑世英諗番起佢當初畀John扑暈之後，原本食緊支煙跌咗落地，但有人幫佢整熄咗，冇造成火燭。關芷怡做開大小姐，阿John太粗心，呢件事基本上就只有Tim做。
阿Tim語帶譏諷：「乜你唔覺得而家講呢句，有啲事後孔明咩？」
岑世英不以為然咁講：「咁好夕都做過孔明，唔差嘅。一秒英雄好過一世狗熊。」
岑世英轉向望阿John：「至於你，扮戇鳩仔扮得幾似呀？」
阿John只係冷冷嘅望住岑世英，冇咗平時嘅一臉戇厚。
「凳凳凳凳！」大廳突然奏起貝多芬嘅命運交響曲。
「你要嘅保鑣…黎咗啦！不過唔係保護過你嘅阿強，哈哈哈！」溫友諒手舞足蹈咁喺空氣指揮。
「好可惜。呀溫生，你搞錯咗一件事。」岑世英冷眼望住大廳入面滿懷惡意嘅人。
溫友諒講：「同我搞掂呢條友。」大拇指向下一指，就好似古羅馬鬥獸場群眾要處決角鬥士一樣。
「噠噠噠噠」一個大隻佬手執鐵通跑過黎，一野扑向岑世英。
今次岑世英身邊冇任何人保護佢。
鐵通就要扑到過黎嘅一瞬間。
岑世英沉身，然後一腳地堂腿猛掃。
大隻佬「碰」一聲，成個人被踢跌。
岑世英再輕輕一躍，一腳從上而下，啱啱擊落大隻佬嘅後頸。
電光火石嘅一刻，大隻佬經已倒卧地上，鐵通「噹噹」聲撞落地面。
大廳內鴉雀無聲。
「一直以黎。」
岑世英冷冷嘅望番溫友諒，一字字咁講：「唔係我保鏢保護我，而係我保護我保鏢！」
「吔—」一眾黑衣大隻漢反應過黎，個個拎架生衝過黎。
岑世英將飯臺掀翻，「餸」同餐具冚唪唥倒向衝緊過黎嘅大隻佬，趁混亂反擊。
第一個衝過黎嘅大漢把刀未招呼到岑世英，岑世英已經將佢隻手一扭，順勢把刀推落隔離個大隻佬度，然後一下手刀打落大隻佬條後頸度。兩個大漢即刻仆落地下。
岑世英做個「三」嘅手勢：「三個。」然後起飛腳，一野踢落一個大隻佬嘅頭，將對方擊倒。又照板煮碗，擊倒一個大隻佬。
「哼！」一個大隻佬唔知幾時繞到岑世英身後，用手勒住佢。
前面兩個大隻佬趁機揮兩支鐵通過黎，鐵通打落岑世英個身度，打到佢痛叫：「呀！」
岑世英雙手搭喺身後大漢嘅雙手度，瞪紅雙眼，強行拉開大漢嘅雙手。即使中鐵通都咬咬牙頂硬上。
大漢有啲驚訝自己竟然唔夠大力，然後畀岑世英一下甩到前面，三個大隻佬撞埋一齊，然後畀岑世英一人一腳踢暈。
剩低兩個大隻佬同時一刀捅過黎。
岑世英扭避開，然後四兩撥千斤，兩個大隻佬反而中刀，倒卧喺地下。
「呼！」岑世英呼口氣，喺地下執番起頭先大隻佬用嘅武器，然後從中執起兩支長長嘅鐵通，就好似舞雙刀咁。
唔知點解，佢突然諗起佢老豆。呢個時候，佢諗佢終於明佢老豆嗰句話咩意思。
「由細到大，我打交從來冇輸過。」岑世英直視住兩個保鑣講：「我老豆驚我太好打而學壞，覺得對我黎講做一個好人反而更難，所以同我講『好人難做，所以要做好人』。」
岑世英冷冷咁講：「你地冇可能贏我。」
阿Tim同阿John手執手杖，杖指岑世英。
阿John冷笑：「不過當日好似某人一杖就畀人扑暈咗。」明顯講緊當日佢扑暈咗岑世英嘅事。
岑世英反言相譏：「當日都有人為咗接近關芷怡，扮戇鳩仔啦。」
阿John聽到呢句，面都黑曬，執杖攻上黎。阿Tim亦扭杖就打。
岑世英一躍，避開阿John掃地一杖，再攻向對方。阿John扭杖一擋，後退幾步。
但阿Tim嘅杖亦緊隨其後，唔畀岑世英絲毫放鬆嘅機會。阿Tim連攻幾下，岑世英連閃帶躲，再用第支鐵通反擊。
岑世英痛叫：「哎呀！」
佢奇怪點解鐵通打落阿Tim度反而自己會痛。原來喺阿John已經又攻過黎。
趁阿Tim中咗鐵通嘅間隙，岑世英轉身攻向阿John，先用鐵通擋下手杖，再用鐵通向阿John招呼。點解阿Tim恢復比岑世英諗嘅快，手杖又一下擊落岑世英身上。
呢兩個保鑣明顯唔同級數，連埋頭先，岑世英已經中咗幾下重擊，再咁落去好快玩完。
「颼颼颼颼」兩個保鑣，手杖亂舞、狂攻猛打，岑世英只可以苦苦招架，仲吃咗幾下重擊，就黎頂唔順。
閃電嘅一瞬間，岑世英連退幾步，阿Tim阿John完全唔畀空間喘氣，衝上前舞杖緊逼。
岑世英大叫：「吔鐵通啦！粉皮！」
兩個保鏢即刻用手杖去擋。
然後，銀光閃閃！
「唰唰唰唰」
阿Tim同阿John應聲倒地，喺地下痛苦蠕動。
阿Tim痛叫：「你條賤人…使矛招。呀…」
「你呢條粉皮…呀…真係一啲品都冇。」阿John亦抱住自己嘅身體扭動。
「係。」岑世英點點頭，講：「我出名無品。做人要符合自己名聲嘛。」
原來頭先岑世英執起鐵通嗰時，順便收埋幾把大隻佬用過嘅刀，趁頭先兩個保鏢分心喺鐵通嗰陣，飛幾把刀落阿Tim同阿John度。兩個保鏢閃避唔切，紛紛中刀倒地。
望住倒地中刀嘅兩位保鑣，岑世英冷冷咁講：「我咁多年黎，打交冇輸過，因為我一向唔跟規矩。」
「呼—」岑世英鬆一口氣，總算搞掂曬大廳入面嘅人。
唔啱，仲有一個人。
話時話，溫友諒呢？
頭先專心應付啲大隻佬同高矮保鏢，完全冇留意呢個大廳嘅情況。而家大廳入面溫友諒啲馬仔東歪西倒，餐具同「餸」散落一地，偏偏唔見溫友諒。
大廳內寂靜無聲，岑世英四周巡視。
穿梭完呢個大廳嘅臺臺凳凳之後，佢確認咗溫友諒唔喺呢個大廳入面。
*************************************************************************
凌晨嘅長洲，今夜有啲不平靜。
大批差佬坐船黎緊呢個島，成條船隊喺海面破浪，蔚為壯觀。
船隊嘅燈光照亮咗漆黑嘅海面，打破平日嘅安寧。
差佬精英盡出，衝鋒隊甚至機動部隊都出曬黎。
張德明亦喺船上面，睇住燈光映住海面，緊張嘅等待著之後嘅突擊。