無品神探: 第十二節
「我女朋友…失咗蹤…」
長髮男終於肯開口講野。佢明顯一晚冇合過眼，雙眼浮腫、滿面鬚根。鹹鹹嘅海風搞到佢本身凌亂嘅長髮吹到好似雜草咁。
「OK. 呢句阿sir聽過啦。你講下完整嘅案發經過：幾時、發生咩事、有咩人之類啦。」張德明問。
「尋…尋晚！有鬼捉咗我條女！」長髮男突然暴走，一下捉住張德明個領。張德明畀佢嚇親，一下推開長髮男：「喂，做咩呀？想襲警？」
長髮男好似個漏氣嘅氣球咁：「尋晚我地鬧交，跟住我條女跑開咗…」
「就係喺呢個沙灘度鬧交？」張德明觀察呢個沙灘。呢個沙灘喺長洲都唔算受歡迎嗰幾個，日頭亦唔算好爆。
長髮男點點頭：「嘈…嘈嘈下，我條女話要分手，跟住就向呢個方向跑。」佢指住一個通向墓場嘅路。
張德明望望條路、皺眉。
「我開頭仲係好嬲,」長髮男繼續，「冇…冇跟上去。後尾我聽到我條女嘅尖叫聲，即刻衝過去搵佢。」
「唔。」
「跑到過去墳場嗰面，我…我見唔到我條女，反而見到有個女人嘅面…」長髮男開始有啲抽抽地筋。
「跟住個女人聽到我跑步過黎嘅聲，拎轉身，有第二塊面。佢…佢用第二塊面對住我笑…嗚呀！救…救命！」長髮男碌喺地下，一路係度抽搐。
「喂！你地兩個！」張德明對兩個警察招招手：「送佢入醫院，搵個人睇住佢。」
「Yes sir！」
張德明望住兩個差佬帶走個長髮男，係度自言自語：「屌，今次第幾單？唔會咁邪掛。」
*************************************************************************
黃昏，夕陽斜照。
一間巴士喺明愛醫院前少少停咗，兩個人行咗落黎。一個高，第二個仲高，兩個人都著到金融精英咁。一個拎住個公事包，另一個拎住個果籃。
兩個人行入明愛，搭𨋢上去醫院大堂度。
「幾多號房？」
「二十號。」
上到去二十號病房嗰陣，兩個人推開二十號房門，房入面瞓住一個大概六張度嘅女人，因為病嘅緣故而顯得格外蒼老。女人係度睇緊本書，一見到入黎嘅兩個人，即時笑到好開心：「阿強，你黎啦？」
「媽子！」高啲嗰個男人見到個女人都好開心，即刻衝去病床隔離張凳度坐低。
原來係岑世英同阿強，佢地黎探阿強個呀媽。唔同嘅係，佢地唔知喺邊度換咗兩套嶄新嘅西裝。岑世英一向著一件污污糟糟嘅cheap西裝，阿強更加唔使講，一向polo牛仔褲，唔係做有錢人嘅保鑣著得衰好合理。
岑世英見到嗰女人，鞠咗個躬，打個招呼：「伯母你好！」
個女人有啲尷尬，佢轉頭問：「阿強，呢位係…？」
阿強擺擺手向岑世英，笑笑口咁講：「媽子，呢個就係我老板。」
「岑生，你好！叫我李太就得。」李太坐直個身。
「黃太，」岑世英將個果籃放喺病床隔離張臺。「呢個小小心意。」
「岑生…咁真係好唔好意思…咳、咳、咳。」李太未講完又咳。
阿強去飲水機斟咗杯暖水遞畀李太：「媽子，飲啖水。」李太慢慢咁飲咗杯暖水。
等李太飲完杯水，阿強坐番低，問：「媽子，好啲未？」
李太睇起身有啲憔悴，佢講：「唔係咩大件事，只係呢排咳得有啲勁，去睇醫生佢建議我入院檢查下姐。」
阿強笑咗笑，笑得有啲勉強。
「係呢，」李太講：「你地係咪啱啱喺外國返黎？」
「係呀，媽子。」阿強答：「我地啱啱喺法國返黎呀！法國嗰度有好多葡萄酒架！」
李太笑咗笑，望向岑世英：「岑生，真係唔好意思，一路有你關照阿強不特止，今次仲阻咗你地喺外國做野。」
「唔關事，我地反正都要返黎。」岑世英搖搖頭。「阿強佢叻仔黎，係個好好嘅幫手，一路以黎幫咗我好多，係我畀佢關照就真，哈哈。」講完佢笑咗聲。
李太低頭，講：「我雖然冇文化，但都知你地做金融嘅好辛苦。阿強佢份人唔算精，讀書又唔得，但我見到佢跟住岑生你都成長咗好多，真係好多謝你，岑生。真係唔知可以點報答你。」
岑世英爽朗笑咗笑：「李太唔使客氣啦。真係嘅，送包煙畀我食就得啦。」
阿強拎番原本李太睇緊本書過黎，坐喺床邊教佢媽子，佢好有耐性，一個一個字咁講。岑世英費事阻住佢地兩母子，出咗去門口外面。
過咗陣，護士走過黎同岑世英講：「唔好意思，探病時間完啦。」有個護士推門入去同阿強兩個講。
阿強雙手握住佢媽子隻手：「媽子，我會努力做野、出人頭地架啦。你好好休養，唔使煩我啲野！」
「嗯。」李太應承佢個仔。
講完，兩個人離開病房、搭𨋢落番地下，行出明愛門口。一路上冇講野。
岑世英喺褲袋拎打火機出黎，點著支煙食。
阿強深深呼咗口氣，講：「大佬，多謝你肯同我一齊探我呀媽。」
「得啦屌。今個月出少啲保鏞費。」岑世英回答。
岑世英食啖煙，問：「喂，咁樣呃你呀媽好咩？話我地做金融。」
「我呀媽佢讀書少，」阿強解釋。「同佢講我地搞金融，佢會覺得我有出色，會安心。」
「大佬」阿強等下又講：「我想請個假。」
岑世英望住阿強，佢明阿強點解咁講。佢問：「你呀媽…醫生講佢咩事？」
阿強沉默咗陣，先講：「我呀媽佢…佢個肺照到有陰影，醫生話…應該係cancer。」