無品神探: 第十節
岑世英入到大使館一間房，貌似係一間辦公室。間辦公室因為佢嘅緣故而整到一地玻璃碎。
現場充滿大量佢準備嘅麻醉氣霧，呢種甜甜的香氣，會令人好快沉睡。佢帶住個防毒面罩，帶個手套，開始搜索。
「彭彭彭」，岑世英一面睇辦公室入面嘅文件，一面將睇咗嘅文件掃曬落地。
「屌。」佢好快睇曬呢個辦公室入面嘅文件，自言自語。
咁搵唔係辦法。大使館有三層，每層咁多房，邊有可能搵得曬？時間有限！
「諗野！諗野！」岑世英敲敲自己個腦。
一棟建築物若果有啲野唔見得光要收埋，有咩可能性？
岑世英自己喺心入面用排除法。
幫國民辦事嘅地方唔會有可能。
普通職員辦公室都冇可能。
大使嘅房？如果係其他野都正正常常，但冇可能收埋一個成年男人而唔走漏風聲。清潔呀姐會見到，實會爆出去。
仲有咩可能？
或者換個角度諗：要搵嘅，應該唔係圖則寫到明嘅地方，而係冇寫嘅地方。
又或者，寫得唔清唔楚嘅地方。
岑世英諗到呢點，即刻喺地下嘅文件堆摷張地圖出黎，飛奔出去。
*************************************************************************
大使館入面非常混亂：只有少數人及時走咗出去，因為充滿住麻醉氣霧嘅緣故，大部分人都暈咗、瞓咗喺入面。逃離咗嘅人，通通走到出面聚集；瞓著咗嘅人東歪西倒瞓曬係唔同嘅辦公室同走廊度。
現場遠處經已有記者聚集，佢地準備獲取呢單恐襲嘅獨家新聞，但警察未黎，佢地亦唔敢貿然上前。貿貿然上前容乜易死？恐襲喎。
大使區回蕩住黎越黎越多嘅警笛聲，一間間警車駛往中國大使館嘅方向。醫護車、消防車都跟警車駛過黎戒備。
*************************************************************************
岑世英沿住一樓走廊跑，完全冇留意自己嘅手機震咗震。佢拎住份地圖比對，掃視啲房嘅名。
「Wu~ Wu~ Wu~」佢感覺到警笛聲開始接近，但騎虎難下，冇計。唔入都入咗黎，冇乜理由就咁走咗去。
跑完第一層嘅房，佢停低喘一喘氣，但唔敢久留。隨即又去第二層，一路比對房嘅資料，睇下有冇奇怪嘅地方。
*************************************************************************
一間間警車停到中國大使館出面，警察紛紛落車，一身防暴裝備。
望住呢棟起曬煙兼且傳言有炸彈嘅大使館，佢地一個個持槍戒備，等人齊後長官落命令先行動。
現場濃煙密布，但消防黎到發覺只得煙，冇火。
法國警察開始派出一少隊人進入大樓，摷呢班恐怖分子。
*************************************************************************
岑世英跑跑下，見到有間房寫住「服務器房」，但地圖上並冇一間咁嘅房，呢間房嘅位置，本身應該係廁所。
佢停咗落黎，扭扭度門，但鎖住咗。一腳踢落度門，「彭！」，依然冇料到。
佢蓄力，一下成身撞向度門。「彭！」一聲，門應聲而開。
呢間房並唔係門上面寫嘅咩「服務器房」，入面一台伺服器都冇。
佢…只係間雜物房，放咗啲舊電腦，加一啲雜七離八嘅文檔，咩都有啲。
「今次仆街啦！」岑世英對自己講。佢聽到啲法文聲又近咗，荷槍實彈嘅警察，唔講得笑。以為你係恐怖分子嘅話，一粒子彈就係咁先。
*************************************************************************
法國警察一邊包圍、搜查一樓，一邊派人上二樓。
由於濃煙密集，兼且太多大使館職員暈咗係度，阻塞條路。警察只可以分成小隊行動。
其中上二樓嗰兩個警察都陀住槍，步履迅速。
*************************************************************************
「咦？」芸芸雜物入面，佢見到間房有一件西裝，唔係一般自己著嗰套cheap雞野，而係名牌Armani。當日關芷怡畀咗張相，相入面廖家豪著嘅，正正就係同一款。若果係一般佢著開嗰啲垃圾，佢都可能都會無視咗，但呢件野造工、質地都好上乘。喺件西裝隔離仲有一個好細嘅公事包。
有好多問題都彈咗出黎：點解關中國大使館事？點解廖家豪失蹤時嘅個人物品會喺度？點解啲野過咗一年，仲會放喺度？
但唔到佢諗咁多，當務之急係要蒐集證物。
佢諗都唔諗，即刻攞起嗰個細公事包，收落條腰度。
「彭！彭！彭！」佢啱啱閂咗嘅門呢個時侯畀人爆格。
「屌！」岑世英環觀四週，有啲不知所措。
*************************************************************************
長洲。十一點。某沙灘。
「咁講又係我錯啦？你都係想咁講姐！」一個長髮男人好嬲。
一身MK打扮嘅女仔不甘示弱：「你次次都冇啲誠意，從來唔體諒你女朋友。再係咁落去，我諗都冇咩意思喇。」
男人深呼吸口氣：「分手囉！永遠都只係你啱！永遠都係我錯！」
「好呀，分囉！」女仔頭也不回咁跑，兩眼都充滿淚水。
對佢黎講，去邊都冇所謂，去邊度都好過留喺度見個呢個男仔眼冤。但其實，佢心入面希望個男仔會追上黎，抱住佢，同佢講：「對唔住呀，係我錯，我錫曬你。」
但個男仔冇。理想同現實總係有落差。
跑跑下，沙灘嘅人聲冇咗，海浪聲亦沉咗落黎。甚至度假屋都不見蹤影。女仔開始驚，發覺佢不經意間跑到墳場嗰面。
現場陰陰森森咁，只聽到樹葉婆娑聲同冷風吹過。
「嗒。嗒。嗒。」有腳步聲。
女仔拎轉頭想睇清楚「來人」，係咪人佢都唔知，現場太過黑睇唔到有人，但佢好清楚自己唔係一個。喺呢個環境之下，自身急速嘅心跳聲好似放大咗一百倍咁，「噗通噗通噗通」，吸引住不速之客。
女仔嚇到唔敢郁，眼淚都熛出黎。樹木個樣都變到猙獰，風聲變做鬼怪嘅低吟。
「拍」突然好似有隻手拍佢膀頭，女仔好似突然驚醒咁，一路大叫一路跑：「呀──」
突然，佢感到有野kick跌佢，跑緊嘅女仔因為衝力成個人飛跌向前，撞落地下，擦到損曬。落地嘅時候個頭不幸撞到舊石，啲血係咁流，流滿一地。
「嗒。嗒。嗒。」
腳步聲同流血聲譜成一首詭秘嘅夜曲。
喺佢又驚又攰咁失去意識之前，佢見到一對眼。
一對黃色、又長又細，一對好似狼咁嘅眼。
一對狼望向獵物嘅眼。
明月高掛，冷風凄迷。